SAPNewsTL, Dili : Hafoin selebra loron Domingu Ramos iha Parokia Sagradu Korasaun de Jesus (SAKROJES), Pe. Bernardo Paiva konsidera terus ne’e diak tanba husi terus ne’e bele purifika fiar sarani nian sai forte no dekobre liu tan sira nia an.
“Terus ne’e diak, terus ne’e laos buat aat, terus ne’e halo ita purifika ita nia an, dekobre diak liu tan ita nia an, terus ne’e bele halo ita sai forte no metin liu tan iha fiar no hahalok, tanba ne’e sarani diak tenki hatene halo sakrifisiu no hafoun aan molok to’o ba ita nia objetivu”. Tenik Pe. Bermardo Paiva ba SAPNews iha Igreja SAKROJES Bekora, 24/03/2024
Bernardo konsidera sosiedade agora buka deit buat ne’ebe kman, fasil, midar no lais, lakohi buat ne’ebe kleur no difisil tanba ne’e sosiedade ida ne’e presiza halo reflesaun klean ba ida-idak ninia hahalok katak buat hotu ne’ebe halo ne’e diak ka aat.
“Ita Timor ne’e iha mental easy going, ita iha mental ida buka mak buat hotu hakarak midar no midar, kman kman, lailais no lailais, ema dehan, hakarak lailais la’o mesak, maibe la seguru, la’o hamutuk ne’e la’o neineik seguru no sei to’o fatin ne’ebe ita ba”. Bernardo Paiva hateten
Administrador Parokia SAKROJES Bekora ne’e husu sarani sira atu hahu hadia an no hatudu hahalok ne’ebe diak iha familia nia laran hodi buka perdua malu, hadomi malu, rona malu no moris hamutuk iha unidade nia laran.
“Domingu Ramos ne’e Jesus mai hatudu an hanesan ema baibain tama ba sidade jerujalem, hatudu mai ita Jesus ninia paixaun no mate, Sidade Jerujalem sidade ne’ebe Jesus simu terus, mate, no gloria, Momentu espesial ne’e atu ita hotu hanoin kona ba Jesus, oinsa hatudu perdaun ba malu no moris iha unidade”.
“Momentu ikus Jesus atu mate, Jesus dehan, Na’i Perdua sira salan ba, basa sira la hatene buat sa mak sira halo, ne’e Jesus hatudu momos Maromak nia gloria, simbolu kasu ema hotu nia salan, faktu ida ne’e hatudu katak Jesus Kristu ne’e Maromak nia oan”. Nia konta
Padre Selebrante ne’e mos husu ba sarani sira hotu atu banati tuir hahalok ne’ebe Jesus Kristu hatudu ona, buka halo diak no moris iha unidade nia laran, sarani hotu-hotu tenki hola parte no partisipa iha Jesus Kristu ninia terus no mate ida ne’e iha semana santa.
Jornalista: Ekipa Kobertura