SAPNewsTL, Dili : Ohin Ministériu Juventude Desportu Arte no Kultura (MJDAK) Nélyo Isaac Sarmento hamutuk ho Alumni Parlamentu Foinsa’e Timor-Leste (APFTL) ofisialmente lansa ona ba públíku selesaun no eleisaun Parlamentu Foinsa’e Nian (PFN) ba periodu 2024-2026
Iha Diskursu, Ministru Juventude Desportu Arte no Kultura (MJDAK) Nélyo Isaac Sarmento hateten aprende iha Parlamentu Foinsa’e lalos sai ativista maibe sai sidadaun ne’ebe krítiku no responsabilidade
“Aprende iha Parlamentu Foinsa’e la’os sai ativista maibe sai sidadaun krítiku no responsabilidade, Ha’u husu imi sira ne’ebe hola parte iha prosesu selesaun tenki hateke ba dook, hateke ba tinan 10-20 mai”. Tenik MJDAK Nélyo Isaac Sarmento iha Salaun UCT Balide Dili, 13/10/2023
Governante ne’e hatutan, Guvernu sei komunika ho Institutu Nasionàl Defeza no Seguransa hodi fo formasaun ne’ebe subsistifikadu uituan hodi forma Membru sira, nune’e sira bele sente iha responsabilidade no síviku iha nasaun ne’e
“Ba APFTL tinan ne’e sei fo formasaun ne’ebe subsistifikadu, sei ko’alia ho institutu Nasionàl Defeza no Seguransa hodi afina kakutak Membru APFTL sira nian oinsa sente nu’udar Timor Oan ne’ebe síviku no responsabilidade”. Afirma MJDAK
Nélyo Isaac husu APFTL tenki fo hanoin beibeik ba foinsa’e sira hodi partisipa, aproveita tempu feriadu ne’e hodi fo formasaun ba Membru Parlamentu Foinsa’e ne’ebe sei mai, forma sidadaun Ne’ebe síviku no hanoin oinsa lori nasaun ne’e ba oin, APFTL tenki sai ezemplu ba foinsa’e sira ba futuru
Iha fatin hanesan, Presidente APFTL Zaulino Gomes da Silva haktuir, Alumni Parlamentu Foinsa’e Timor-Leste (APFTL) mai husi programa Parlamentu Foinsa’e, benefisiáriu husi Parlamentu Foinsa’e prontu toma responsabilidade no fo kontinuidade hodi lori nasaun ne’e ba oin
“APFTL mai husi benefisiáriu programa Parlamentu Foinsa’e, tan ne’e prontu hodi toma responsabilidade no fo kontinuidade hodi lori nasaun ne’e ba oin”. Zaulino Gomes da Silva hateten
Liderança APFTL ne’e mos husu guvernu hodi halo investimentu ba foinsae sira hodi prepara sira ba futuru, nune’e bele garante lider foinsa’e diak no kualidade hodi servi povu no nasaun ba futuru
Partisipa iha Serimónia lansamentu no workshop Nasionàl ba Selesaun no Eleisaun ba membru Parlamentu Foinsa’e ba Periodu 2024-2026 ne’e partisipa husi MJDAK, CNJTL, Funsionáriu MJDAK, Sentru Juventude Munisipiu sira no Membru APFTL sira
Tuir orariu ekipa selesaun ne’ebe destake iha kada Postu Administrativu sira iha territóriu nasionál sei hahu halo desiminasaun iha loron 23-27 Fulan Outubru, hafoin sei kontinua ba registrasaun no Selesaun, ikus liu sei halo kampanha eleisaun sei hala’o iha loron 15 Fulan Novembru no tomada de posse ba Membru Parlamentu Foinsa’e eleitu sei realiza iha 12 de Dezembru tinan ne’e
Jornalista: Zenoveva Lopes Sarmento