Imajem : Sekretariu Estadu Protesaun Sivil Domingos Mariano Reis ko’alia ho SAPNewsTL iha Tasi-tolu, Díli 03/09/2024.
SAPNewsTL, Dili – Relasiona ho vizita Sua Santidade Papa Francisco iha loron 09-11 Fulan Setembru, Governu liu hosi Sekretaria Estadu Protesaun Sivil kontinua orienta Bombeirus fase estrada públiku husi rotunda Nicolau Lobato to’o Tasi-Tolu.
Sekretáriu Estadu Protesaun Sivil (SEPS), Domingos Mariano Reis haktuir SEPS & SEATOU servisu hamutuk hodi organiza ekipa Bombeiros halo lavajem iha kapitál Dili, molok Santu Padre to’o iha Timor-Leste.
“Autoridade Protesaun Sivil liu husi SEATOU orienta ekipa Bombeirus halo lavajen iha Dili laran, hahú husi Tasi-Tolu to’o Palasiu Prezidente ne’ebe hala’o lavajen horseik kalan, ohin kalan no aban sei kontinua to’o remata, antes Papa Francisco to’o Timor-Leste”. Dehan Sekretariu Estadu Protesaun Sivil Domingos Mariano Reis bá jornalista SAPNewsTL iha Tasi-tolu Díli 03/09/2024.
Ligadu ho kontinuidade ba fase estrada hafoin eventu boot ne’e, Sekretáriu Estadu ne’e deklara, lavagem ne’e foku ba preparasaun vizita Papa Francisco, kona ba kontinuidade ne’e presiza rekursu finanseiru ne’ebé sufisiente.
“Ita iha eventu ne’ebé maka importante hanesan ne’e maka ita halo lavajen, tanba ida ne’e presiza kustu bo’ot hodi aloka osamentu, presiza fasilidade no rekursu umanu ne’ebe tenke sufisiente hodi responde atividade sira hanesan ne’e, maibe iha eventu sira hanesan ne’e hau sempre orienta ekipa hodi halo lavajen.”Nia sublinha
Domingos Mariano informa, prosesu fase estrada atinji ona 40%, tuir planu to’o loron 8 Fulan Setembru mak atinji 100%.
“Prosesu servisu nian ohin kalan ita bele dehan katak atinji ona 40%, ita sei kontinua halo servisu iha aban to’o dia 8 ita bele atinje ona 100%”. Nia informa
Autoriedade Protesaun Sivil sei garante estabilidade nasionál no asegura ambiente saudavél iha sidade Dili.
“Primeru tenke garantia estabilidade, Autoridade Protesaun Sivil sei asegura seguransa nasionál no garantia ambiente ne’ebe maka saudavél iha Díli laran”.Mariano Reis salienta
Sekretariu Estadu ne’e husu komunidade sira hodi garante ambiente ne’ebé moos no seguru hodi hatudu imajem diak Timor-Leste nian ba mundu liu hosi vizita Santu Padre Papa Francisco.
“Komunidade sira hotu tenke koopera hamutuk hodi eduka ita nia familia no ita rasik tenke halo asaun konkreta hodi garantia ambiente iha ita nia uma hun, ita nia ambiente ne’ebe mak saudavel bele fó impaktu saúde ne’ebe saudavel ba ita”.
“Liga ba vizitasaun Sua Santidade Papa Francisco nian, ita tenke garantia ambiente ne’ebe mos tanba vijita husi estranjeiru barak hodi fó imajen diak husi Timor maske kiik maibe saudavel”. Nia hakotu
Enkuantu, SEPS sei kontinua akompanha no apoia ekipa bombeirus hodi fase estrada públiku sira iha kapitál Dili, molok Santu Padre to’o iha loron 9-11 Fulan Setembru tinan ne’e.
Jornalista : Conzita Mota & Marciana da Conceição