Imajem : Entrevista uma na’in Fidelia da Conceição iha Lurumata, 08/11/2024
SAPNewsTL, Dili : Relasiona ho insendiu ne’ebe akontese iha area Lurumata, Suku Comoro, Postu Administrativu Dom Aleixo halo komunidade sira sente triste no trauma.
Iha entrevista ho uma-nain, Fidélia da Conceição haktuir insendiu refere mosu derepente halo sira trauma no hakfodak, hafoin akontese sira bolu vizinu hodi halo intervensaun ka hamate ahi liu hosi taka ho rai-henek no tolla.
“Ha’u nia katuas ba haris-fatin, husu atu nono bee hodi haris, nune’e ha’u nono bee, maka derepente mosu ahi lakan iha uma laran, ha’u haree sente trauma entaun ha’u halai sai ba liur hodi bolu vizinhu sira mai hamate ahi”. Tenik Fidélia da Conceição ba SAP News TL iha Lurumata, Suku Comoro, 08/11/2024
Imajem : Dapur ne’ebe sofre inséndiu iha Lurumata, Dili.
Hafoin insidente ne’e mosu, ekipa bombeirus munisipiu Dili to’o kedas iha fatin akontesimentu atu halo intervensaun maibe komunidade sira hamate ona ahi ne’ebe lakan iha dapur laran.
Inséndiu ne’e la rezulta ema kanek no mate maibe halo komunidade sira trauma ho akontesimentu refere.
Nune’e Fidélia da Conceição husu ema hotu hodi kuidadu didiak tanba ema hotu la espera insidente sira iha uma no iha ne’ebé deit.
Jornalista : Conzita Mota & Marciana da Conceição