Imajem : Eis Prezidente Autoridade Munisípiu Dili, Gregorio da Cunha Saldanha “Mouris” iha Dili, 28/01/2025.
SAPNewsTL, Dili : Grigorio Saldanha Mouris resigna an husi kargu Prezidente Autoridade Munisipál Dili (PAM-Dili) tanba mosu irregularidade administrativa no finanseiru, falta autonomia administrativu, obstákulu ba realizasaun administrativa, desizaun unilateral no falta kordenasaun, konflitu kompeténsia no preokupasaun étika no sosial.
Sentidu responsabilidade kle’an ba povu Munisipiu Dili, hafoin tetu no hanoin didi’ak maka deside resigna an hosi kargu Prezidente Autoridade Munisipál ka PAM-Dili tanba iha razaun neen mak tanesan tuir mai :
- “Irregularidade Administrativu no Finanseiru: Durante ha’u-nia mandatu, ha’u hasoru iregularidade grave sira iha prosesu administrativu, inklui falsifikasaun dokumentu no prosesu sira ne’ebé duviduzu”.
“Preokupante liu mak situasaun iha servisu rekolla lixu manual ne’ebé identifika tinan ida halakon osan Estadu mais ao menos dólar millaun ida. Dadus sira-ne’e fasilita husi relatóriu sira, rejistu husi sistema automátiku Tibar nian no evidensia fotográfiku no videográfiku husi fulan Agostu 2023 to’o Agostu 2024. Foin loron hirak liu ba Sua Exelénsia SEATOU konfirma rasik, wainhira halo verifikasaun surpreza ba kamioneta tula lixu nian sira”.
- “Falta Autonomia Administrativu: Dependénsia demais Autoridade Munisipiu Dili (AMD) ba Ministériu Administrasaun Estatal (MAE) estraga kapasidade atu prepara didi’ak desentralizasaun poder lokál, tuir polítika Governu IX nian”.
- “Obstákulu ba Realizasaun Auditoria: lha fulan Setembru 2024, ha’u husu ba Sr. Ministru Administrasaun Estatal atu halo auditoria ba servisu AMD nian. Maibé, auditoria ne’e foin hahú iha Dezembru no to’o agora, ha’u seidauk simu Informasaun ruma kona-ba ninia rezultadu. Situasaun ida-ne’e fo impaktu no trava implementasaun medida koretiva sira neʼebé urjente”.
- “Desizaun Unilaterál no Falta Koordenasaun: Intensaun atu transfere unidade Project Management Unit (PMU) husi AMD ba MAE prejudika ami nia kapasidade atu superviziona téknikamente servisu limpeza urbana. Piór liu tan, MAE halo estensaun kontratu empreza limpeza sira, sem konsulta uluk ho AMD. Ida ne’e hamate esforsu sira ba melloria no prejudika ijiene no saúde públiku sidadaun Dili nian”.
- “Konflitu Kompeténsia: Diresaun Jestaun Merkadu no Turizmu (GMT) ne’ebé halao serbisu munisipál nian, tuir lolós submete ba’a Autoridade Munisípiu Díli, maibé infelizmente SEATOU maka kontrola lor-loron hodi atua ho violénsia hasoru vendedores ambulantes ka komunidade kiak sira neʼebé hela iha espasu públiku ho sira nia sasán. Hanesan konsekuénsia, AMD maka hetan fali kritiku no akujasaun husi públiku hanesan autór no responsável”.
- “Preokupasaun Étika no Sosiál: Hanesan sidadaun, veteranu no Prezidente Autoridade Munisipál. ha’u labele simu prátika violentu sira ne’ebé haterus tan sidadaun Dili, sem kria uluk kondisaun mínima alternativa. Ami rejista katak, situasaun ida ne’e atu repete fali prátika desumanu sira neʼebé uluk ema rai seluk sira halo hasoru ita nia povu, hahalok iresponsável neʼebé ita nunka konkorda to’o ita manán Independénsia”.
Ligadu ho kestaun hirak ne’ebé temi iha leten, katak realidade sira ne’e maka trava Gregorio Saldanha atu hala’o ninia knaar ho efikásia no integridade ne’ebé konsidera importante ba populasaun sira iha kapitál Dili.
“Ha’u ho ha’u nia ekipa servisu makaas ona atu hadi’a AMD, kombate indisiplina, korupsaun, nepotizmu no prátika familiarismu nian, tuir kompromisu Governu IX nian. Maibé infelizmente, obstákulu sira ne’ebé ami hasoru”.
“Sente hanesan la hetan apoiu institusionál hodi kumpri promesa sira ne’ebé ita halo ona ba povu Timor Leste, liu-liu kapitál Díli. Nune’e, halo ha’u-nia prezensa iha kargu PAM Díli ne’e, la sustentável ona atu kuntinua.” Tenik Eis PAM-Dili Gregorio da Cunha Saldanha Mouris ba Jornalista sira iha Matadouro, 28/01/2025
Saldanha hatutan, “Maski nune’e, hau nia dever atu hato’o ha’u-nia agradesimentu ba fiar no kolaborasaun husi ha’u-nia kolega sira iha AMD, husi ha’u-nia superiór sira iha MAE no Governu IX, iha lideransa Maun Boot Xanana Gusmão.”
“Ikus, ha’u hakarak husu deskulpa ba povu sidade Díli tamba ha’u tenki para iha dalan klaran, maski iha ona planu oinsá dezenvolve sidade Díli ba oin kona ba lixu, merkadu, rate, jardin, no atendimentu sira seluk ba komunidade nia nesesidade sira. Nune’e, dala ida tan ha’u deklara ba públiku ha’u nia Rezignasaun nudar PAM Díli”.
Grigorio da Cunha Saldanha Mouris hala’o komunikadu imprensa ligadu ho ninia rezignasaun husi PAM-Dili
Eis PAM Dili ne’e husu PAM foun hodi servisu makaas no lolos hodi lori mudansa no dezenvolvimentu sidade Dili.
“Ha’u deseja susesu ba PAM foun atu kontinua serbisu lailais maibé lolos hodi lori mudansa sira, no afirma ha’u nia kompromisu ba dezenvolvimentu sidade Dili, no moris diak ba sidadaun sira hotu”. Nia hakotu
Enkuantu, hafoin pedidu resignasaun ne’e fo sai, to’o agora seidauk iha PAM-Dili foun ne’ebé substitui nia fatin hodi kompleta restante mandatu ne’e.
Fo hanoin fali katak Gregorio da Cunha Saldanha Mouris asume kargu Prezidente Autoridade Munisipiu Dili iha loron 1 fulan Marsu tinan 2024, submete nia karta resignasaun iha loron 13 fulan Janeiru 2025 no ofisialmente husik kargu iha loron 28 fulan janeiru 2025.
Jornalista : Ermelinda Soares