Imajem : Vise Primeiru Ministru no Ministériu Planu Ordenamentu Jose Reis hamutuk ho Reitor Universitariu sira, iha Auditorium FEST-UNTL, Hera, 07/02/2023 . Foto : MO-MPO
SAPNewsTL, Dili : Vise Primeiru Ministru no Ministériu Planu Ordenamentu tersa-feira orseik realiza semináriu Nasionál, iha ne’ebe hala’o apresentasaun kona-ba Projetu Planu Nasionál Ordenamentu Teritóriu ba akadémiku sira no estudante universitariu sira iha auditorium fakuldade enjenharia siénsia no Teknolojia Hera, iha intervensaun Ministru José Reis hateten tinan ne’e sei kria sentru akollamentu iha Hera
“Tinan ne’e sei kria sentru akollamentu ka multifunsaun ida iha hera ho 15 ektares, nune’e bele akumula ita nia sidadaun sira, wainhira hasoru dezastre natural sira hanesan tinan rua ba kotuk sira bele ba hela”. Vise Primeiru Ministru no Ministériu Planu Ordenamentu José Reis iha Auditorium FEST-UNTL, Hera, 07/02/2023
Vise Primeiru Ministru no Ministru Planu Ordenamentu Territoriu konsidera Politika Planu ordenamentu territoriu importante tebes ba prosesu desentralizasaun no futuru poder lokal, nune’e lei baze ordenamentu territorial, planu nasional ordenamentu territorial sei orienta ba planu ordenamentu munisipiu, iha ne’ebe bele garante jestaun ne’ebe efikaz no programadu ne’ebe bele jere didiak rikusoin no promove desenvolvimentu sosioekonomiku iha kada munisipiu
Ministeriu Planu Ordenamentu Territoriu fundamenta Politika Planu ordenamentu territoriu reajusta planu estratejiku desenvolvimentu nasional tanba atu produz dokumentu sira operasional no orietador ne’e tenki hetan intervensaun publika no privadu ne’ebe kualidade liliu iha desenvolvimentu sosial, kultural, ekonomiku ne’ebe ekilibradu no integradu hodi hadia povu nia moris
Portantu, liu husi planu ordenamentu territoriu bele identifika potensialidade sira hodi desenvolve no propoin organizasaun territoriu ba utilizasaun rekursu iha territoriu nasional tuir potensia no kondisaun ne’ebe iha hodi hatur mos iha Lei Grande Opções Políticas ba Timor Leste, hanesan zona funsional ne’ebe identifika ona hamutuk sanulu resin ida (11) tuir karakteristika no potensia territorial
Imajem : Intervista Magnífiku Reitor UNTL João Soares Martins
Iha fatin hanesan, Magnífiku Reitor UNTL João Soares Martins sente kontente tanba bele hetan apresentasaun husi ministeriu planu ordenamentu kona-ba modelu nasional ordenamentu territoriu
“Ami nu’udar akadémiku sente kontente tebes tanba bele hetan apresentasaun kona-ba Planu Nasionál Ordenamentu Territóriu, apresentasaun ne’e furak teb-tebes bele hatudu dalan ba ita kona-ba investimentu ba oin, se ita konsege investe ho diak bele transforma Timor Leste sai bem ordenadu, organiza no planeadu, ita bele sai diak liu komunidade internasionál
Reitor UNTL ne’e apresia ho Ministériu Planu Ordeamentu José Reis tanba konta nafatin ho akademista sira nia kontribuisaun no halo komunikasaun ida diak tebes, iha ne’ebe sempre valoriza papel akadémiku sira kona-ba desenvolvimentu planu ordenamentu
Nia konsidera akademista sira, peskijador sira importante tebes ba desenvolvimentu tanba sira bele fo hanoin krítiku ba guvernu oinsa hadia rai ida ne’e ba futuru
Entretantu, Reitor UNTL mos husu ba Ministériu Planu Ordeamentu atu konsidera sidade universitariu Hera ne’ebe planeadu ona iha tinan hirak liu ba ho master plan
“Importante liu mak atu muda sidade administrativa husi Dili ba Hera no Metinaru, Ami husu mos atu enkaixa mos sidade universitária Hera tanba ne’e planu anterior ne’ebe ami tau ho 390 ektares ho master plan ne’ebe kompletu, nune’e ami husu atu konsidera hanesan parte ida husi planu ordenamentu territóriu sidade Dili nian”. Magnífiku Reitor UNTL João Soares Martins
Enkuantu, iha serimonia apresentasaun ba planu nasional ordenamentu territóriu ne’e hetan partisipasaun maksimu husi reitor kada universidade, instituisaun sira, inklui dosente no disente sira
Jornalista : Antonio Altamirando