Imajem : Diretora Nasional Edukasaun Promosaun Saúde Emilia de Jesus Alves Mendonça iha Palasio das Sinzas Dili, 03/06/2024.
SAPNews TL, Díli- Ministeriu Saúde sei lansa Vasina foun kontra Virus Papiloma Humana (HPV), ne’ebe kauza kankru serviku ba feto adolosente ho idade tinan 11-14 anos.
“Tinan ne’e Ministériu Saude sei introduz vasina foun ho naran Virus Papiloma Humana (VPH),vasina ida ne’e sei fo ba labarik feto ho idade 11-14 anos, alvu prinsipal mak ba labarik sira ne’ebe eskola inklui sira ne’ebe la eskola” tenik Diretora Nasional Edukasaun Promosaun Saúde Emilia de Jesus Alves Mendonça iha Palasio das Sinzas Dili, 03/06/2024.
Diretora Nasional hatutan vasina refere sei lansa iha ámbitu komemorasaun loron nasionál saúde ne’ebe sei komemora iha fulan jullu.
“Ita sei lansa programa vasina ne’e iha komemorasaun loron nasional da saúde, maibe diresaun nasionál sei halo advokasia ba komunidade sira liu husi media sira tanba media sira mak liman ain ba povu no Governu”. Nia haktuir
Emilia konsidera vasina ne’e seguru no importante tebes ba foinsa’e feto sira hodi prevene moras kankru serviku iha futuru.
“Objetivu husi vasina ne’e hodi prevene labarik sira labele hetan moras kankru serviku, vasina ne’e seguru teb-tebes tanba liu husi Organizasaun Mundia de Saude (OMS) inklui governu rasik, ita sei fo ba labarik sira hahu iha 22 julhu 2024”.Emilia de Jesus Alves informa
Imajem : Jornalista sira partisipa iha sensibilizasaun ba vasina foun kontra kankru serviku iha palásiu das sinzas
Emilia Alves husu ba komunidade sira hodi hakbesik oan sira ba sentru saúde ne’ebe besik, nune’e oan feto sira bele hola parte iha vasina ne’e.
“Husu ba inan aman sira hotu hodi disponiviliza oan sira hodi partisipa iha vasina ne’e tanba moras ne’e sei halakon ema nia vida bainhira ita la halo tratamento ho sériu”. Nia Deklara
Enkuantu, Ministériu Saúde liu husi Diresaun Nasional Edukasaun Promosaun Saúde (DNEPS) sei halo kampanha no semináriu ba autoridade lokal, professores no inan aman sira inklui reliziozu no relizioza sira iha nivel postu administrativu sira.
Aban, Ministériu Saúde sei realiza semináriu nasionál ida hodi halibur autoriedade kompetente sira husi governu, sosiedade sivil no autoriedade sira seluk hodi introduz programa ne’e ba sira, molok implementa iha area urbanu no rural.
Jornalista : Dircia Baptista Belo