SAPNewsTL, Dili: Assosiasaun Futebol 16 ne’ebe hamahan an iha Federasaun Futebol Timor-Leste (FFTL) altera kongresu anual 2023 muda ba kongresu extraordinariu tanba sira altera ajenda kongresu tuir estatutu federasaun artigu 33 nian.
“Ami Assosiasaun hamutuk 16 ohin husu kongresu extraordinriu tanba hakarak mudansa iha FFTL, ezizi kongresu extraordinariu ho razaun durante ne’e asosiasaun sira hare’e katak lideransa FFTL aktual laiha kapasidade atu ezekuta programa sira uluk”
“Nia promete ba Assosiasaun lori dezenvolvimentu futebol iha Timor-Leste liu husi realiza liga divizaun dahuluk, daruak, datoluk no dahaat, Assosiasaun sira halo bazeia ba Estatutu FFTL artigu 33, hatete hakarak iha mudansa ba estrutura FFTL tenke liu husi dalan uniku no as liu mak kongresu extraordinariu”, dehan Porta voz Assosisaun 16 Ipolito Soares ba jornalista iha fatin kongresu anual FTTL da ualu iha Hotel Novo Turismo Bidau Lecidere, Dili sabadu (01/07/2023).
Ipolito hatutan, durante ne’e publiku akompaña momos katak durante períodu rua lideransa FFTL lahatudu prestasaun servisu diak tuir espetativa publiku hadomi futebol nian tanba Liga profesional La’o latuir kalendariu FIFA, jogu juvenil laiha
Assosiasaun sira kuaze fulan neen mak hetan subsidiu, no komprimisu sira ba liga futebol divizaun dahuluk, daruak to’o kuarta, hahu husi munisipiu mai nasional la realiza to’o agora liga futebol Timor-Leste iha tinan kotuk realiza ho periodu fulan rua ne’e ezijensia no esforsu sira husi klube laos federasaun.
Nia informa, sira laos lagosta Prezidente FFTL ka Sekretariu Jeral, maibe Assosiasaun toma responsabilidade atu halo mudansa, karik sira nonok deit mos publiku sira sei kestiona, tanba ne’e sira mai ho dalan ida legal atu halo mudansa mak liu husi kongresu extraordinariu
Assosiasaun sira sei konfirma nafatin ba parte ezekutivu FFTL atu bele realiza kongresu extraordinariu ne’e, ohin hetan ona aprovasaun iha kongresu anual FFTL ba dala ualu ne’e.
Iha fatin hanesan, Presidente FFTL Francisco Jeronimo iha nia intervensaun iha kongresu anual FTTL da ualu ne’e hatete asosisaun 16 nia ezizensia altera ajenda kongresu ordinariu ba extraordinariu ne’e aprova ona maibe orsamentu federasaun nian ne’e mai husi FIFA entaun sei hein desizaun FIFA nian.
“Ita nia asosisaun 16 nia ezizensia muda ba kongresu extraordinariu ne’e aprova ona maibe ita sei hein orsamentu husi FIFA tanba federasaun nia orsamentu depende ba FIFA”, tenik prezidente FFTL
Entretantu Kongresu ordinariu FFTL da ualu ohin labele realiza ho susesu tanba asosiasaun 21 halo alterasaun ba ajenda ho votu kontra 16, afavor 5 no abstensaun 0 nune’e muda ba kongresu extraordinariu tuir estatutu federasaun artigu 33 no kongresu extraordinariu tenki akontese iha fulan tolu nia laran.
Asosiasaun sira partisipa iha kongresu ordinariu FFTL ba dala ualu mak asosiasaun futebol Dili Leste, Dili Oeste, Manufahi, Manatuto, Baucau, Lautem, Viqueque, Ermera, Likisa, Bobonaro, Covalima, Aileu, Ainaro, Oe-cusse, Arbitrajen, Treinador, Futsal, Feto, Juvenil, Kampiaun divizaun dahuluk 2023 Karketu Dili FC no kampiaun divizaun daruak DIT FC.
Reportajen: Augusto dos Santos