Imajen : Porta Voz Jose da Costa, Estudante Universidade Católica Timorense (UCT) iha Jardim 5 Maiu, 26/06/2024
SAPNewsTL, Díli – Estudante Organizasaun Timor-Leste (OBTL), lamenta ho desizaun IX Governu ne’ebé halo revogasaun ba subsidiu bolsa hakbiit, hodi muda ba bolsa parsial. Tanba koksidera governu hatama sira ba rai-ku’ak no hamate sira nia futuru.
Portavos Estudante Universidade Katolika Timorense Jose da Costa hateten, ohin estudante ensinu superior públiku tantu privadu hamutuk sanulu resin-neen (16), total estudante 3.030 halo komunikadu imprensa hasoru programa IX Governu nian ne’ebé injustu Liu husi muda bolsa hakbit ba bolsa parsial, ne’ebé bele hamate kbiit laek nia oan sira nia futuru.
Tuir Postavoz Jose da Costa hateten, Timor-oan iha direitu atu asesu edukasaun hahú husi pre-primária to’o ensinu Superior ne’ebé estipula iha Lei Inan, Constituição Republica Democratica de Timor-Leste (Sigla Português, RDTL), artigu 59⁰.
“Edukasaun nu’udar direitu bàziku ba Timor-oan hotu hodi bele asesu hahú husi pre-primária to’o ensinu superior ne’ebe estipula iha lei inan Constituição RDTL artigu 59⁰, edukasaun nu’udar setór ida ne’ebé importante iha àmbitu prosesu konstrusaun estadu, nune’e estadu kria polítika públika oioin hodi tulun ka salva timoroan sira hotu atu asesu ba edukasaun, nune’e sidadaun hotu tenki matenek iha nia rain rasik tanba ne’e, liu husi baze dekretu lei númeru 13/2020, 15 de abril, kona ba regulamentu FDCH”.
“Diploma Ministeriál no. 9/2021, 10 de Março, VIII Governu Konstituisionál oferese bolsa ho tipu integrál ka hakbi’it ba estudante sira ne’ebé kategoria inan-aman la iha kbi’it, objetivu husi bolsa ne’e atu tulun ami kbi’it la’ek nia-oan sira hodi bele asesu ba ensinu superiór iha rai laran”. Hateten portavoz Jose da Costa ba jornalista liu husi Komunikadu Imprensa iha Jardim 5 de maio, 26/06/2024.
Postavoz ne’e mos hateten, dadus ne’ebé Fundu Dezenvolvimentu Kapitál Humanu (FDCH) fó sai iha 30 abril tinan 2024, estudante ne’ebé asesu ba bolsa kbiit laek, iha ensinu superior públiku nomos privadu hamutuk sanulu resin-neen (16) ho total estudante 3.030.
“Tuir dadus ne’ebe Fundu Dezenvolvimentu Kapitál Humanu (FDCH) fó sai iha 30 de abril de 2024 katak, estudante sira neʼebé asesu ba bolsa hakbi’ it, dadaun ne’e eskola iha ensinu superiór públiku tantu privadu hamutuk sanulu-resin-neen (16) ho totál estudante 3.030”.nia informa.
Jose da Costa salienta, bolsa hakbi’it, tulun tebes sira hanesan kbi’it laek nia oan, ne’ebé hala’o estudu iha nivel ensinu superior iha kapital Díli no Munisipiu.
“Ho bolsa integrál ka hakbiit, tulun tebes ami kbi’it la’ek nia oan sira hodi bele asesu edukasaun iha nivel ensinu superior, tanba ita hatene, estudu iha kapital hanesan Dili no Munisipiu, la’os de’it selu eskola, maibė mós presiza sosa ai-han, selu kós, selu bemo, sosa livru, pulsa internet, print, fotokópia no nesesidade sira seluk ne’ebé bele fasilita estudu estudante kbi’it la’ek nian ho di’ak bazeia ba kontratu nebé iha”. Nia deklara.
Portavoz ne’e mos hateten, sente infelizmente ho politika IX Governu ne’ebé lidera husi Sua Exelensia Kay Rala Xanana Gusmão, ho baze diploma ministeriál no. 11/2024, loron 7 fulan fevreiru deside muda bolsa hakbi’it ba bolsa parsial, ne’ebé injustu no sei la tulun sira hodi asesu Edukasaun nivel ensinu superior iha Timor-Leste.
“Infelizmente ho politika IX governu nian neʼebé lidera hosi Suai Exclénsia Kay Rala Xanana Gusmão ho baze diploma ministeriál no. 11/2024 de 7 de fevereiru, deside muda bolsa hakbi’it ba fali bolsa parsiál, desizaun ida ne’e, tuir ami injustu teb-tebes no sei la tulun ami kbi’it la’ek nia oan sira atu bele asesu ba ensinu superiór iha Timor-Leste, tanba ne’e, muda bolsa hakbi’it ba fali bolsa parsiál la’os deit difikulta estudante kbi’it la’ek nia oan sira atu aprende ho di’ak, maibé iha konsekúensia seluk mak lori ami kbi’it la’ek nian oan sira hotu tama ba rai-ku’ak, nune’e, ami estudante bolsa hakbi’it iha Timor laran tomak totalmente la konkorda no sei la asina ba karta kontratu foun bolsa hakbi’it muda ba bolsa parsiál”. Nia deklara.
Imajen : Estudante Bolseiru Timor-Leste halo komunikadu imprensa.
Fundu Dezenvolvimentu Kapitál Humanu (FDCH) atribui ona ba kada Universidade ho data ne’ebé determinasau ona, sira ejize ba IX Governu liu husi Ministeriu Planeamentu Investimentu Estratéjiku ho nia tuteladu FDCH atu kansela imediata ba desizaun politiku ne’ebé injustu.
“FDCH atribui ona ba kada Universidade ho data ne’ebé determinadu, ho hanoin sira iha leten, ami estudante bolsa habi’it iha Timor laran tomak hodi ejize ba IX Governu, liu husi Minussériu Planeamentu Investimentu Estratéjiku ho nia tuteladu FDCH, atu Kansela imediata ba desizaun politika injustu neʼebé, muda bolsa hakbi’it ba bolsa parsiál ne’ebé bele hamate ami kbi’it la’ek nia oan nia futuru”. Nia husu.
“Tenki mantein desizaun ho baze anterior ne’ebé fó bolsa integrál ba ami kbi’it la’ek nia oan sira hodi ami bele kontinua ami-nia estudu to’o remata, Estadu liu husi governu labele foti desizaun tuir de’it nia gostu, maibé tenki buka hatene, konsulta no diskuti ho estudante bolsa hakbi’it sira molok toma desizaun ida”. Nia hatutan.
Entretantu, Estudante husi Universidade sanulu resin-neen (16), ne’e rekomenda ba reprezentante povu iha Parlamentu Nasional liu komisaun Governu neʼebé trata asuntu edukasaun atu levanta problema ida ne’e iha Parlamentu ho seriedade.
Estudante bolsa hakbi’it mos afirma, karik ejizensia hirak ne’e ladauk responde iha tempu badak, estudante sira sei organiza malu hodi halo asaun pasifika ba ministériu kompetente ho nia tuteladu sira.
Estudante hirak ne’e estuda iha universidade sira hanesan UNTL, UCT, UNITAL, IOB, UNDIL, UNPAZ, ICS, Instituto Superior de Cristal, inklui universidade sira seluk.
Liga ba notisia ne’e SAPNews tenta atu halo komfirmasaun ho parte FDCH maibe seidaul ehtan resposta husi parte kompetente.
Jornalista : Ermelinda Soares & Geronimo da Purificação