Imajem : Xefe Suku Bauro Florindo Miranda, ko’alia ho Jornalista sira iha nia kna’ar fatin, Segunda, (19/11/2024)
SAPNews TL, Díli — Kauza husi mudansa klimátika, implika sobrevivênsia animal fuik no ai-horis sira ne’ebe pertense iha area Parke Nasionál Nino Konis Santana, Suku Bauro, Postu Administrativu Lautem, Municipiu Lautem
Xefe Suku, Bauru Florindo Miranda hateten, suku ne’ebe pertense ba problema mudansa klimátika, implika ba sobrevivénsia fauna no flora iha area protezida Parke Nasionál Nino Konis Santana liuliu iha iha Illa Jaco, banhira tempu bailoron naruk.
“Mudansa klimátika afeita tebes ba animal protejida sira iha ai-laran liliu ba Rusa fuik, Meda, Kakatua, Loriku, Lekirauk, sai afeitadu iha Parke Nasional ne’e.” Dehan Xefe Suku Bauro Florindo Miranda, ba Jornalista sira iha Nia kna’ar fatin, Segunda, (19/11/2024)
Lideransa komunitariu ne’e fundmenta, Parke Nasionál Nino Konis Santana, lokaliza besik suku hitu ne’ebe pertense ba postu Lautem, maibé suku Bauro mak sai sentral ba area protezida refere.
“Suku pertense ba parke Nasional Nino Konis Santana(NKS) iha suku hitu maka Suku Bauro, Com, Mehara, Maupitine, Lore, Fuat, Iliomar II) Suku Bauro rasik iha kedan Parke Nasional nia klaran, entaun agora rusa fuik iha Illa Jaco kuaze aumenta maibé hahan ba rusa fuik menus no be’e mos susar tebes”.
Xefi Suku ne’e salienta, iha loron hirak liu ba suku sira ne’ebe pertense ba Parke Nasional enkontru ho diresaun Floresta atu kaer rusa iha Jaco lori fali mai pertense ba Parke Nasional hodi nune’e bele proteze animal hirak ne’e.
“Agora sira esforsu hela, bainhira lori animal protejida husi Jaco mai fali iha ne’e, hanesan meius ida atu bele hatudu katak preverza duni animal protejida sira ne’e, atu nune’e komunidade sira bele iha konsiénsia, agora balun iha konsensia la kasa ilegal maibé balun nafatin kasa ilegal”. Nia informa
Tuir nia, komunidade sira ne’ebe hela besik iha area protejida sira, koopera ho autoridade lokal no parte relevante sira, oinsa prezerva animal no ai-horis sira ne’ebe sai atrativu ba vizitante doméstika no estranjeiru sira.
“Komunidade sira ne’e serbisu hamutuk ho autoridade lokal, lori hela rusa fuik sira mai, sira mos asiste katak ida ne’e duni mak governu nia hakarak, tanba ne’e komunidade sira iha ne’e hatene liliu atu prezerva rikusoin rusa fuik sira”. Nia dehan
Xefe Suku ne’e mós preokupa tanba menuz guarda florestal hodi kontrola kasa ilegal iha Lautém rezulta animal protejida sira tun ba beibeik.
Enkuantu, kobertura ne’e SAPNews halo durante loron rua (19-20/11/024) liu hosi programa media tour ne’ebé organiza hosi Timor-Leste Press Union (TLPU) no hetan apoia hosi Sekretariu Estadu Komunikasaun Sosial (SEKOMS).
Jornalista : Dircia Baptista Belo