Imajem : Xefe suku Lauana Miguel Gomes Maia iha sede suku Lauana, (19/11/2024).
SAPNewsTL, Ermera – Mudansa klimátika ne’ebe akontese halo bailoron naruk, komunidade suku Lauana, postu administrativu Letefoho, munisipiu Ermera preokupa be maran afeta ba plantasaun sira hanesan kafé inklui produtu lokal sira seluk.
Xefe suku Lauana Miguel Gomes Maia hateten, mundansa klimátika fó impaktu ba plantasaun kafé no produtu sira seluk moris la diak, nune’e aproveita media ne’ebé to’o iha suku Lauana, hodi husu ba Ministériu Agrikultura Peskas Pekuaria no Floresta (MAPPF) hodi apoiu reabilitasaun ba kafé tuan.
“Relasiona mudansa klimatika ne’ebé mak akontese, halo bain loron naruk afeta ba bee maran no plantasaun moris la di’ak, liu-liu plantasaun kafé sira, tanba ne’e mak aproveita média sira iha momentu ida-ne’e, husu ba Ministériu Agrikultura Peskas Pekuaria no Floresta atu bele apoiu reabilitasaun ba kafé sira ne’ebé mak tua ona”. Dehan Xefe suku Lauana Miguel Gomes Maia ba jornalista sira iha sede suku Lauana, (19/11/2024).
Autoridade lokal ne’e salienta, dezevolvimentu barak la’o maibé estraga mos ai-horis barak hanesan ai-samtuku tan ne’e afeta ba komunidade nia produsaun sai mihis ba beibeik.
“Ai-horis antigu ne’ebe tuan ona presiza troka, dezevolvimentu balun mai mós estraga ai horis barak, liu-liu mak hanesan ai-samtuku sira hasai hotu entaun afeta ba ai-han no produsaun komunidade sira nian mihis ba beibeik”. Nia subliña.
“Ami husu ba governu bele apoiu agrikultor sira, liu husi reabilitasaun viveirus atu bele apoiu ba komunidade sira, nune’e bele kuda fali ai-horis ne’ebé tuan ona.” Nia hatutan.
Nia afirma, ekstensionista suku iha no ativu maibé atividade ka planu hodi orienta sira halo servisu la iha, nune’e nia husu ba Ministeriu Agrikultura Peskas, Pekuária no Floresta hodi orienta sira hala’o servisu.
“Agora iha pesoál ekstensionista sira ativu hela, maibé laiha orietasau husi sira nia diresaun, entaun loro-loron sira mai ami la halo buat ida, pelu menus ministériu tenke kria planu ruma para sira servisu ekipa, nune’e bele atende problema plantasaun iha Letefoho”.
“Entaun oinsá mak governu bele kria ekipa tekniku hanesan ekstensionista hodi bele apoiu plantasaun sira ne’e, maibé sira mai la iha orientasaun husi Ministreriu entaun sira mak loro-loron hamutuk hela iha sede suku”. Nia kestiona.
Imajem : Sekretáriu Jeral AJTL Acasio hamutuk ho Xefe suku Lauana Miguel Gomes Maia iha sede suku Lauana.
Nia Informa, iha tinan 2023 kompaña Associação Café Timor-Leste (ACTL) haruka komunidade sira halo reabilitasaun no halo pagamentu lori osan governu ne’ebe hanaran osan povu nian maibe selu deit 40% no promete sei selu 60% iha tinan oin.
“Iha tinan 2023 mosu ona reabilitasaun atravez kompaña ka organizasaun balun hanesan Asosiasaun Kafé Timor-Leste maibé halo reabilitasaun no hatan hela ba komunidade sira dehan ita boot sira bele halo reabilitasaun, ami halo pagamentu lori osan povu nian, lori osan governu ne’ebé hanaran povo nia osan mai dehan ami selu ho 40%, no 60% depois tinan oin mai ita kontínua hadia plantasaun depois ami selu fila fali.”
“Mais durante tinan ida ona governu la selu mós komunidade sira halo hela, maibé to’o agora 60% ida ne’e seidauk bele halo pagamentu”. Nia dehan.
Autoridade lokál dúvidas relasiona ho osamentu ne’ebé kompaña ACTL ka iha governu tanba to’o agora seidauk iha esklaresidu ka karta ruma relasiona ho osan refere.
“Ami dúvidas, osan ne’e hela iha ACTL ka sei iha governu tanba to’o agora ami seidauk bele hetan esklaresidu, se karik hetan esklaresidu hanesan Autoridade lokál tenke simu karta ruma maibe laiha, osan 60%, sei hela iha governu ne’ebe aloka ba iha kompañia bele selu ona ba komunidade sira.” Nia hatutan.
Ligadu ho osamentu kona-ba reabilita plantasaun kafé 60% ne’ebé seidauk selu, Staf kompanha Marxis de Deus informa kompanha fasilita deit ekipamentu no governu mak selu maibe governu sei halo verifikasaun fila fali hafoin sei halo pagamentu tanba kompanha ACTL & CCT la konsege foti osan tuir tempu determina hosi governu.
“Reabiltasaun ami la fo osan, ami fo deit ekipamentu hodi fasilita komunidade sira hanesan kado, botas, kapa no teizoura, kona-ba pagamentu ba 60% ne’e governu mak sei selu, hafoin halo verifikasaun”. Nia informa
Entretantu, suku Lauana iha aldeia 10 ho totál uma-kain 991 kompostu husi mane 1989 no feto 1970. Kobertura ne’e SAPNews halo liu hosi programa média tour ne’ebé organiza husi Asosiasaun Jornalista Timor-Leste (AJTL) ho OXFAM Timor-Leste, Programa ne’e hetan apoiu masimu hosi OXFAM iha Honkong.
Jornalista : Marciana da Conceição