Imajem : Joven Na’in 3 ne’ebé involve kazu na’ok motor iha Igreza Balide, Dili,08/01/2025. Foto : Media PNTL
SAPNewsTL, Dili : Relasiona ho motor ne’ebé lakon iha Igreza Balide, Komandu Polísia Nasional Timor-Leste (PNTL) liu husi Departamentu Servisu informasaun Polísia (DSIP) kaptura ona joven na’in tolu ne’ebé envolve iha kazu na’ok motor.
“PNTL liu hosi DSIP iha loron 07 fulan Janeiru tinan 2025 iha oras 14:30 otl, kaptura joven na’in tolu (3) ne’ebe maka naok motorizada iha area Igreja Balide”. Hakerek hosi Media PNTL iha Dili,08/01/2025. SAPNews asesu
Tuir informasaun ne’ebé SAPNews asesu liu hosi pajina ofisial PNTL, Xefe Departamentu Investigasaun Kriminal Nasional (DIKN) Superintendente Polísia João Belo dos Reis liu husi Konferensia Imprensa kuarta-feira (08/01) ne’e haktuir kapturasaun refere hala’o bazeia ba keixa ne’ebé hato’o husi vitima.
Iha kazu refere akontese iha Igreza Balide wainhira vitima ba partisipa hela misa, fila nia motor lakon no vitima informa ba Polísia hodi buka tuir no kaptura Suspeitu na’in 3 iha area Merkadu Taibesi.
“Informasaun ne’ebe ita nia vitima hato’o ba Polísia liu husi Servisu Informasaun Polísia halo tracking buka tuir paradeiru husi suspeitu no Motorizada ne’ebé mak sira naok hodi lori mai iha DIKN hodi entrega ba Ministeriu Publiku (MP)”. Xefe DIKN informa
Superintendente Polísia ne’e salienta tan katak orseik loron 07 fulan Janeiru 2025 mais ou menus tuku 2 ho balun mak kaptura suspeitu sira iha Taibessi
“Ita nia Servisu Informasaun Polísia detekta movimentu suspeitu iha area Taibesi merkadu nian, nune’e servisu Informasaun Polísia halo kedas intervensaun no kaptura Suspeitu na’in 3 ho evidensia motor ho Xapa Matríkula P-1101 hodi entrega ba iha servisu Investigasaun Polísia nian”.
“”Suspeitu na’in 3 ho inisial JMS, JMN no SX sira na’in tolu kaptura ho Motorizada no na’in rua kaptura tuir informasaun ne’ebe suspeitu aprezenta, Ita halo tracking ho sira balun suspeitu antigu no balun foun tanba PNTL informa ba públiku katak ita la fó dalan ba suspeitu krime organizadu sira ne’ebe halo asaun krime na’ok ema nia sasan iha Dili laran ka iha Munisípiu”.
“Nune’e ita sei buka tuir suspeitu sira no ita nia Servisu Informasaun Polísia sei buka tuir ba suspeitu sira ne’ebe naok ema nia sasan no halo problema depois aprezenta ba Tribunal tuir asaun ne’ebe sira komete”, hatutan Superintendente Polísia ne’e.
Kazu refere rezista ho númeru úniku Krime, NUC 0012/25.PNSIC, kazu ne’e sei kontinua nia prosesu investigasaun iha Ministériu Públiku.
Jornalista : Marciana da Conceição