Imajem : Ekipa Araña junta ho FP (Forsa Polisia), kaptura joven inisial AMA iha Dili, 27/05/2024. Foto : Kredit Serviço Relações Públicas
SAPNewsTL, Dili – Servisu Informasaun Polísia Nasional (SIPN), liu hosi Ekipa Araña junta ho FP (Forsa Polisia), kaptura ona joven mane ida ho naran inisiál AMA alias AL tinan 17.
Joven mane AL ne’e hela iha Suku Manleuana, Postu Administrativu Dom Aleixo, Munisípiu Dili, AL hosi Suai, Munisípiu Covalima, ne’e envolve krime jerál ba kazu naok motor no telefone iha Kapitál Dili.
Iha prosesu identifikasaun suspeitu AMA deklara katak nia hamutuk ho Ariki Malinamuk maka naok motor rua inklui telefone-6.
Motor rua ne’e marka Beat Street kor metan sira naok iha area Bebonuk tasi ibun no fa’an ona iha Maubisse. Motor ida tan marka Beat kor kinur metan sira naok iha area Comoro Aldeia 4 de Setembru iha loron 15 fevereiru 2024 horas 02:00 madrugada.
Enkuantu telefone 6 ne’e faan hotu ona ba vendedores sira iha area Merkadu Taibesse ho presu ne’ebe baratu tebes.
Suspeitu AMA mos akresenta tan katak motor ne’ebe nia grupu seluk naok ne’e hamutuk 18, balu tranzitu Dili no Tranzitu Nasional prende ona tanba komete infrasaun, nune’e sira sei la ba foti motor refere.
Enkuantu durante halo asaun nia hamutuk ho grupu rua seluk hosi Squad Domin no Mautebe inklui nia maun alin sira husi Grupo RK (Rabat Kesi).
Suspeitu mos deklara katak motor barak mak sei iha nia maluk nain rua seluk ne’ebe oras ne’e ekipa konjunta buka tuir hela. No sira ne’ebe hetan ona kapturasaun mak hanesan Ogi, Ricky Malinamuk, Rivaldo, Ebi, Manekas, Akon, Asaba no Apeu Xina.
Hosi naran hirak ne’e, sira komete bebeik ona kazu naok osan, naok telfone no-mos hadau telefone iha dalan públiku ne’ebé mak rejista ona iha PNTL.
Hafoin halo identifikasaun ekipa servisu kontatu kedas ba SIKN (Servisu Investigasaun Kriminál Nasional) hodi mai foti atu kontinua halo prosesu investigasaun antes submete ba tribunál hodi tuir porsesu julgamentu.
Notisia ne’e SAPNews asesu liu husi Pajina Ofisial Serviço Relações Públicas, Seguransa PNTL nian ohin loron, 27/05/2024, mais ou menuz tuku 16:40 oras loraik nian.
Jornalista : Dirçia Baptista Belo