Notifikasaun Ba Média Independente, KI Konsidera SIKN La’o La Tuir Dalan

Dili, Relasiona ho Karta Notifikasaun husi Polísia Nasionál Timor-Leste  (PNTL), Komandu Jerál, Servisu Investigasaun Kriminal Nasionál ne’ebé dirije ba Xefe Redasaun Jornál Independente, Jorgino dos Santos no Jornalista Domingos Gomes, liu husi komunikadu imprensa Presidente Conselho Imprensa de Timor Leste Virgilio Guterres konsidera aktu uza Kódigu Penál hodi nofitika jornalista ka kanál mídia ida tanba ninia produtu jornalístiku ne’e la tuir nia dalan loloos (salah kamar)

Tuir Virgilio Guterres Notifikasaun ba Média Independente ne’e la reflete prinsípiu no valor sira demokrasia ne’ebé país ne’e opta hanesan haktuir iha Konstituisaun RDTL, Artigu 40 no 41  konvensaun sira internasionál ne’ebé país ne’e ratifika atu garante sidadaun hotu nia direitu fundamentál sira nu’udar konstituisaun garante.

“Conselho de Imprensa (CI) nu’udar instituisaun Independente Estadu nian ne’ebé hala’o nia kna’ar importante sira tuir Lei Komunikasaun Sosiál, Artigu 44 atu garante liberdade imprensa no liberdade espresaun iha país ne’e, haree katak notisia ne’ebé Diáriu Independente publika ho títulu “Ejizénsia Demite Gastão, Komisariu Mateus: PNTL Simu Karta husi Vise MJ no Vise MOP no notisia ho títulu “Deskonfia Vise MJ Haruka Karta ba Komando PNTL atu Demite Gastão nu’udar produtu jornalístiku ne’ebé bazeia ba faktu no verasidade jornalizmu tuir Kódigu Étika Jornalistika no prinsípiu sira jornalizmu nian,” dehan Virgilio  iha Salaun Conselho imprensa Balide, 25/10/2022.

Conselho de Imprensa mós haree katak karta notifikasaun husi Servisu Investigasaun Kriminál Nasionál mós la refleta valor sira luta libertasaun nasionál iha-ne’ebé jornalista no mídia mós kontribui maka’as ba luta direitu umanu no kontribui ba povu Timor-Leste ninia ukun rasik-an iha tempu okupazaun Indonézia nian.

Nia hatutan, Tuir loloos notifikasaun polisia nian ne’e ba politika ka governante sira ne’ebé foin dadauk ne’e halo intervensaun ba instituisaun seluk nia servisu, la’ós haruka ba fali notifikasaun ne’e ba xefe redasaun no jornalista Diáriu Independente nian tanba públiku dadauk ne’e hein hela prosesu legál ba kazu intervensaun ne’e.

Konsellu Imprensa Lamenta no Kondena makaas notifikasaun husi SIKN tanba afeita ba ranking liberdade imprensa

“Lamenta no kondena notifikasaun ne’ebé Servisu Investigasaun Kriminál Nasionál haruka ba Xefe Redasaun Diáriu Independente, Jorgino dos Santos no Jornalista Domingos Gomes tamba ida-ne’e sei afeita ranking index liberdade imprensa ne’e’e dadauk ne’e Timor-Leste hetan”. nia sublinha

CI Husu ba Komanda Jerál PNTL atu retira notifikasuan ne’ebé Servisu Investigasaun Kriminál Nasionál haruka ba Redasaun Diáriu Independente tanba la tuir ninia dalan loloos hanesan haktuir Lei Komunikasaun Sosiál, Artigu 34 kona-ba direitu resposta no direitu retifikasaun.

Conselho de Imprensa prontu sai mediadór atu halo mediasaun ba kazu desputa entre PNTL no Diáriu Independente hodi hetan solusaun ida-ne’ebé justu no loloos ba parte rua tuir Lei Komunikasaun Sosiál.

Lider KI mos Husu ba Komandu Jerál PNTL atu rezolve problema desputa entre mídia no polisia ne’ebé ninia kauza mai husi publikasaun notisia ka produtu jornalístiku ho Lei Komunikasaun Sosiál, Artigu 34 kona-ba direitu resposta no direitu retifikasaun, la’ós uza fali Kódigu Prosesu Penál hodi notifika no kondena jornalista no mídia sira tanba sira nia obra jornalístiku.

Entretantu, nia Husu ba entidade Estadu hotu-hotu atu respeita jornalista no mídia nia servisu iha kontestu kobertura no publikasaun notisia tamba jornalista no mídia hala’o ninia papél kontrolu sosiál nu’udar pilár demokrasia iha país demokrátiku hanesan Timor-Leste.

Enkuantu, Presidente KI mos husu ba jornalista no kanál mídia hotu atu fó solidariedade ba Diáriu Independente ne’ebé dadauk harosu hela prosesu legál liuhusi publikasaun notisia ne’ebé kontinua to’o problema ne’e hetan solusaun no kontinua kumpri Kódigu Étika Jornalístiku no prinsípiu sira jornalizmu nian.

Journista : Jonh Marito

Editor     : Ekipa Editorial