Imajem : Graduadu UNTL, Fakuldade Medicina Siensia Saude (FMCS sigla Portugués) Departamento Kursu Laboratorium, Ricardo Afonso Vaskonselho, iha GMT, 11/07/2024. Foto : Ermelinda Soares
SAPNewsTL, Díli – Graduadu Universidade Nasional Timor Lorasa’e (UNTL sigla Portugués) Fakuldade Medicina Siensia Saude (FMCS sigla Portugués) Departamento Kursu Laboratorium, Ricardo Afonso Vaskonselho, senti onradu tanba kaer metin nia prinsipiu ‘Láran Luak no Obedese’ hodi konsege hakat liu obstakulu durante aprende iha UNTL.
Tuir Graduadu Ricardo Afonso Vaskonselho hateten, nia parte senti ksolok tebe-tebes, tamba maske hasoru dezafiu iha prosesu aprendijazem nia laran maibé nia parte konsege hakat liu obstakulu hodi trasforma husi obstakulu sira ne’e nakfilak sai haksolok, prega ho kapítulu foun iha faze ikus aprende iha Universidade Nasional Timor Lorosa’e.
“Prosessu hirak ne’ebe liu ida ne’e normalmente kontein dezafius, obstáculus, dificuldades liu-liu kabe ba finansialmente no oinsa ita brani luta kontra ita nia barukten sira, entaun hirak ne’e mak sai hanesan buat ida ne’ebe la fasil atu ita ultrapassa bainhira apoiu husi Inan-Aman no Familia, ho ida ne’e ha’u senti katak prosessu ida né’ebe nunka lori ita atu hamnasa to’o finalidade,” Dehan Graduadu Ricardo iha nia rezidiensia Manleu Qinta,(11/07/2024)
Nia afirma, infelizmente vida estudante iha prosesu aprendijazem nia laran hasoru obstakulu oi-oin hanesan problema finansial, sosial, no necessidades sira, maibé la sai hanesan bareira hodi impede nia atividade, durante hala’o estudu iha UNTL, pesoalmente iha sosiedade ida ne’ebe mai ho diversidade, no perspetiva la hanesan ho interese, Tenik nia.
“Ha’u hanoin katak buat ida ne’ebe halo ha’u kaer metin no oinsa firmi iha prosesu hotu mezmu akontese difikuldades ka bareira oin-oin xave maka “Láran Luak no obedese ita ninia an atu kontra ita nia aan husi baruk ten” fiar katak ida ne’e lori ita ultrapasa barreira, esperansa katak Graduasaun ida ne’e títulu ida né’ebe ita assume ho responsabilidade no garante atitude akadémiku, Tane Almamter UNTL nafatin no prontu obedese atu kontribui ba bem estar, no bele oferta kapasidade né’ebe durante ne’e hetan liu liu iha area saúde atu sai servidor ida né’ebe iha komitmentu hodi servi Timor-Leste”.
Nia hatutan, universidade fatin ida né’ebe halo kapasitasaun no produz recursos humanos laos oferese servisu, ida ne’e kompetensia, planu no politika governu ida nian kada períodu, haree ba numeru Graduadu barak né’ebe la hetan servisu atu dehan katak hanoin atu kria servisu né’e diak liu duke hein oinsa atu buka servisu.
“Universidade fatin ba kapasitasaun rekursu humanu, universidade la fo servisu, kampu servisu ne’e kompeténsoa governu nian, espera katak parte kompetente tau mos prioridade oinsa apoiu rekursu sira ne’ebe produs husi UNTL, nune’e rekursu hirak né’e bele kontribui ba empregu ida ne’ebe bazeia ba meritu”. Nia sublinha
Enkuantu Graduadu Ricardo Afonso Vaskonselho husu ba estudante universtariu sira né’ebe frekuente hela iha banku universitáriu atu konsidera problema, desafiu, obstakulu sira ne’e maka parte ida né’ebe kontribui makas ba estudante ida-idak sai forte iha prosesu sira, tamba ema ne’ebe brani hasoru buat hirak ne’e mak ema sira ne’ebe susesu iha futuru.
Imajem : Graduado nia aman Agapito Afonso ho familia sira.
Iha fatin hanesan, Graduado nia aman Agapito Afonso senti kontenti bainhira oan mane Ricardo remata ona nia prosesu apredizasen iha nivel superior, hodi simu apelidu foun husi UNTL iha Fakuldade Medicina Siensia Saude Departamento Kursu Laboratorium.
“Hanesan aman ida senti orgulu ba oan mane nia nia prosesu maske moruk maibé nafatin iha vontade no esforsu hodi finaliza nia estudu, ha’u hanesan aman hato’o parabens ba oan mane, Ricardo ne’ebe ohin hetan ona graduasaun ne’e laos hotu ona iha ne’e maibe sei iha espasu seluk atu bele aprende hodi bele dezenvolve an, kontribiu ba dezenvolvimentu no hadia kualidade moris familia nian iha aban bainrua”. Nia gratidaun
Aman graduadu ne’e fundamenta nia parte hato’o koragen, esforsu no pasiensia nafatin ba nia oan hodi bele sai oan ne’ebe diak, hatudu maturidade, etika no resposabilidade iha prosesu no prova liu husi implementasaun ba servi familia no sosiedade Timor-Leste.
“Hanesan aman la espera katak ohin loron oan nia esforsu bele susesu, ohin loron hatudu ona ksolok ba familia maske la soi rikusoi osan no karreta maibé importante riku ba oan sira nia futuru hodi bele dezenvolve an no familia, Ricardo nia esforsu hotu liu husi familia nia kolaborasaun, ita hotu nia orasaun, nia labele la’o mesak hamutuk ho familia, kolega no ema hirak ne’ebe iha nia sorin hodi bele ajuda nia”.
Iha loron 11-12 fulan Jullu ne’e Universidade Nasionál Timor Lorosa’e (UNTL) gradua graduadu hamutuk rihun ida atus hitu ruanulu resin ualu (1728), entre sira iha graduadu na’in 15 mak auzenta iha serimónia solene graduasaun ba XXX.
Jornalista : Ermelinda Soares