Imajem : Komisaun Organizador no Família Saudozu António Soares Da Silva Maucalo hala’o komunikadu imprensa iha Kintal-Boot Dili,16/10/2024.
SAPNewsTL, Díli — Komisaun Organizadora ba Familia Saudozu informa, Kadaver Saudozu Koronel Antonio Soares da Silva ho kodigu ‘Maukalo’ sei to’o iha Aeroportu Internasionál Prezidente Nicolau Lobato Comoro iha loron Kinta-Feira 17/10/2024 oras 13:30 Otl.
Portavós Marçal Pinto hateten, Komisaun Organizadora ba Familia Saudozu Koronel Antonio Soares da Silva ho kodiku ‘Maukalo’ hato’o sentidu kondolénsia ba família enlutada.
“Ami komisaun organizadora ba Familia Saudozu Koronel Antonio Soares da Silva ‘Maukalo’ hato’o sentidu kondolénsia profundu ba familia enlutada Maktoban Koronel Antonio Soares da Silva, ne’ebe husik hela nia peregrinasaun moris iha mundu hodi fila hikas ba aman maromak nia kadunan santu” Dehan Portavós Marçal Pinto liu husi komunikadu imprensa ne’ebe hala’o iha rezidensia matebian nian iha Kintal-Boot Quarta (16/10/2024).
Tuir kronolojia ne’ebe informa husi familia matebian saudozu hatete saudozu sofre moras prostat durante fulan rua resin no desloka ba nasaun Malásia hodi halo tratamentu ba saudozu nia saúde, maibé familia enlutada simu novidades triste katak saudozu Maukalo hakotu ona nia jornada moris iha ospital internasional Malásia.
“Iha Domingu, loron 13 fulan outubru tinan 2024 familia enlutada, kolegas, amigus no parente sira hotu tu’ur hamutuk estabelese ona komisaun organizadora ba preparasaun prosesu simu Maktoban Saudozu Koronel Antonio Soares da Silva nian hahú husi Aeroportu Internasionál Prezidente Nicolau Lobato to’o serimonia funebre”.
“Komisaun organizadora lori familia enlutada nia naran hato’o obrigadu wa’in ba parte hotu-hotu nia esforsu, apoiu no kontribuisaun ida ba ita nia esforsu no kontribuisaun liu husi ideias, fisiku no material durante ne’e tantu husi Governu Timor-Leste liu husi Ministériu Asuntu Konbatente Libertasaun Nasional no Embaixada Timor-Leste iha Nasaun Malásia”.
Komisaun organizadora informa ba públiku prosesu mate isin Maktoban nian mai husi nasaun Malaysia iha loron 16 Outubru to’o Dili iha loron 17 Outubru.
“Mate isin ‘Maktoban Saudozu Koronel Antonio Soares da Silva “Maukalo” ‘aranka ona husi nasaun Malásia mai Bali-Indonesia, loron 17, fulan Outubru sai husi Bali tuku 10:30 no to’o iha Aeropotu Internasional Prezidente Nicolau Lobato iha tuku 13:30”. Nia informa
Tuir sekuénsia programa agendamentu ba serimonia funebre, Saudozu Koronel Antonio Soares da Silva sei hamutuk mós ho Restus Mortais hanesan Saudoza Etelvina Fernandes, Saudozu Amelita no Anju nain rua seluk.
“Kadaver Saudozu nian sei halo hamutuk ho saudoza nain rua ho anju nain rua nian, ne’ebe familia enlutada rekolla ona husi Postu administrativu Watulari, Munisipiu Viqueque mai tau hamutuk iha Saudozu nia rezidensia, Kintal-Boot”.
Entretantu kona-ba serimonia funebre saudozu nian komisaun organizadora seidauk bele informa, ho rajaun sei hein dekretu husi Prezidente Repúblika Jose Ramos Horta, hafoin komisaun organizadora sei trasa planu ba serimónia ikus halot saudozu nia isin mate.
Imajem : Saudozu António Soares da Silva Maucalo
Antes ne’e, Oan Mane Boot husi Saudozu nia Maun, Pascoal Soares Pinto Sidik Lemorai informa Saudozu sofre moras prostat iha fulan Agustu, nune’e familia lori ba halo tratamentu iha Ospitál Malásia durante fulan rua (Jullu-Agustu) hodi halo operasaun hafoin fila mai Timor.
Iha loron 29 Fulan Setembru, Família lori tan ba ospitál Malásia hodi halo tratamentu maibe hetok grave liután tanba nia kabun bunu, liu tiha loron balun António Soares da Silva hakotu iis.
“Saudozu António Soares da Silva hetan moras prostat, mai halo tratamentu durante fulan rua (Jullu-Agustu 2024), iha loron 29 Setembru mak grave uituan ne’ebe ospitál fo aimoruk diak oituan, liu loron tolu komesa kabun bubu mak halo nia isin lolon sira bubu hotu hodi hakotu Iis iha Malásia”. Tenik Pascoal Soares Pinto Sidik Lemorai iha Malásia, 12/10/2024.
Representante família ne’e fo sasin Saudozu Maucalo hanesan mestre ida ne’ebé brani no firme iha desizaun sira hodi eduka no serví povu iha tempu ne’ebé nia sei moris, Pascoal sente triste tanba lakon tebes aman diak ida ne’ebé sempre fo konsellu ba oan sira maibe tanba Maromak nia planu laiha ema ida bele satan desizaun ne’e.
“Ha’u nia apa kiik ne’e ema ne’ebe si’ak, nia hanesan mestri ba oan sira liliu ami familia tomak, nia sempre obriga ami atu kumpri oras servisu, hanorin ami atu sai servidor ne’ebé dixiplina ba tempu no desizaun sira, nia sempre ko’alia ho lia makaas maibe hadomi tebes ami, ha’u sempre konsulta buat barak ba nia nu’udar mestre ida, maibe Maromak nia planu oin seluk, ohin nia laiha ona, ami sente triste no lakon tebes iha situasaun kruel ida ne’e”.Hateten Pascoal Lemorai
Fo hanoin fali katak, Saudozu Koronel António Soares da Silva alias “Maucalo” moris iha Macadiqui, Postu Administrativu Uatulari, Munisipiu Viqueque, loron 09 fulan Dezembru 1962, tinan sanulu resin neen (16) nia partisipa iha luta libertasaun nasionál, iha ne’ebé hola parte iha Postu Desmobilizasaun Komandante de Unidade.
Saudozu Koronel António Soares da Silva simu kondekorasaun ho Medalha Ordem de Guirrilha iha loron 19 fulan Maiu 2007 no hetan fitun tolu bazeia ba ninia partisipasaun, dedikasaun no sakrifisiu naruk ne’ebé nia fo ba Timor-Leste nia luta ba ukun rasik an.
Molok tama iha periodu invasaun Saudozu tama Forsa Armada Libertasaun Nasionál Timor-Leste (FALINTIL) nu’udar Soldado iha sentru instrusaun Taibessi Dili. Hafoin invazaun Maucalo kontinua sai militar ho kargu soldado partensia ba kompanhia movel ho Komando Paulino da Gama Mauk Moruk iha Setor Ponta Leste.
Iha tinan 1976 Maucalo asumi kargu Komandante Pelutaun Movel ne’ebe ikus mai transforma ba forsa intervensaun.
Iha 1977-1978, Maucalo noemadu Komandante pelutaun primeira kompanhia de Choque . Hafoin zona libertadas rahun, husi 1979-1980 Maucalo kontinua Komandante pelotaun forsa konsentrada.
Liu tiha Konferensia reorganizasaun Nasional iha 1981 Maucalo ezerse kargu Komandante pelotaun da kuatru kompanha husi Brigada Vermelha kolokadu iha Regiaun Nakroma.
Iha tinan 1984-1991 Maucalo asumi kargu segundu Komandante ba III Unidade ba forsa konsentrada.
Bataliuan 303 husi forsa invazaun Indonesia kaptura Maucalo iha dia-20 junhu 1991 no sai prizoneiru iha Soibada , Ainaro 1996.
Iha prizaun Maucalo involve iha atividade organizasaun frente Klandestina to’o 1999, ikus mai reingresu ba forsa Armada FALINTIL.
Iha periodu ukun rasik an, Saudozu Maucalo asumi kargu nu’udar Chefe da Repartisaun da Justiça das-F-FDTL hodi servi instituisaun sagradu ne’ebé ho domin, konsisténsia, responsabilidade no honestidade.
Iha tinan 2017, Saudozu António Soares da Silva “Maucalo” eskollidu sai Xefe Casa Militar, Prezidente Repúblika Demokrátika Timor-Leste (RDTL) Francisco Gusterres Lu Olo iha tinan 2017 to’o 2022.
Saudozu Koronél António Soares hakotu iis ka remata ninia peregrinasaun iha mundu ho idade neenulu resin-rua (62), iha loron 12 fulan Outubru tinan 2024, wainhira hala’o tratamentu iha ospitál Malásia tanba sofre moras prostat.
Deskansa ho hakmatek, Saudozu António Soares Maucalo, Ba hamutuk ho Maromak, la’o ho Maromak no hela ho Maromak iha nia kadunan santu.
Obrigadu barak ba dedikasaun no abnegasaun tomak ba Timor-Leste. Adeus no adeus. Até um dia.
Jornalista : Guilhermino Ramos da Cruz