Imajem : Votasaun Ba OJE 2025 Iha Parlamentu Nasional
SAPNewsTL, Dili : Parlamentu Nasionál (PN) aprova ona Orsamentu Jeral Estadu (OJE) tinan 2025 ho votus afavor hamutuk 42, abtensaun 0 no kontra 23. Primeiru Ministru Kayrala Xanana Gusmão fo agradese ba deputadu sira hotu tanba bele hola parte ativu iha debate OJE 2025.
Iha intervensaun, Deputada Bankada Frente Revolusionáriu Timor-Leste Independente (FRETILIN) hateten Bankada FRETILIN vota kontra tanba konsidera OJE 2025 laiha alternativu no la hatudu esforsu ne’ebé bele garante no investimentu ba setor produtivu hodi substitui fundu perolíferu iha futuru maske tinan ba rai naruk fiskal iha ona oin.
“Ami vota kontra OJE 2025 tanba ladun, rai naruk fiskal iha ita nia oin hela maibe iha OJE 2025 la hatudu esforsu no medida foun ruma atu hetan fontes finanseiru foun, kadoras greater sunrise ne’ebé promete iha kampanha maibe Primeiru Ministru rekunhese katak la fasil atu dada mai”. Tenik Deputada Maria Angelica Rangel iha PN, 20/11/2024.
Imajem : Deputada Bankada FRETILIN Maria Angelica Rangel
Deputada ne’e deklara FRETILIN vota kontra tanba problema edukasaun, saude, bee moos, malnutrisaun, infraestrutura ne’ebe seidauk rezolve ho diak maibe governu kontinua hatudu ninia ego hodi la rona no fo atensaun ba opiniaun hosi bankada opozisaun durante plenária.
“Osan barak selu funsionáriu, selu viajem rai-laran no rai-liur, sosa karreta ba governu, osan ba saúde la hatudu hodi rezolve kolapsu sira, osan ba edukasaun menuz ba beibeik no laiha vontade hodi hadia ka hasa’e kualidade edukasaun, laiha osan ba povu kbiit la’ek nia oan sira hodi asesu ba ensinu superior no laiha medida kria kampu de traballu ba joven sira”.Deputada Rangel
Deputadu Prezidente Bankada Congresso Nacionál Reconstrução Timorense (CNRT) Duarte Nunes fo agradese ba deputadu sira hotu ne’ebé fo nia kontribuisaun votu iha debate no aprovasaun OJE 2025.
“Agradese ba deputadu sira, uituan ka barak ita hotu bele kontribui ba aprovasaun OJE 2025, ha’u fiar katak Governu ida ne’e merese hodi ezekuta OJE 2025 ho diak”. Hateten Deputadu Duarte Nunes
Primeiru Ministru Kayrala Xanana Gusmão fo agradese ba deputadu sira hotu tanba bele hola parte ativu iha debate OJE 2025, osan povu nian, Governu sei jere ho diak ba interese povu no nasaun iha tinan 2025.
“Agradese ba deputadu sira hotu iha Parlamentu Nasionál, debate ne’ebe partisipativu, kontribui hanoin no vizaun, demokrasia nu’udar identidade timorense nian tanba ne’e kontinua ho diferensa hanoin ba oin, agradese ba proposta hirak ne’ebe fo hosi bankada opozisaun, ami rejista preokupasaun sira hosi deputadu sira, ami sei la haluha”. Sublinha PM Kayrala Xanana Gusmão
Xefe Governu ne’e mós husu ba deputadu sira hotu iha Parlamentu Nasionál hodi kontinua ba halo fiskalizasaun iha terrenu no kontrola mal jestaun sira karik mosu iha instituisaun estadu nian.
“Apelu ba deputadu sira hodi halo fiskalizasaun iha terenu, haree mos ba maá jestaun sira karik akontese”. Nia husu
Lider nasionál ne’e afirma nia parte sei kontinua esforsu ba dezenvolvimentu Greater Sunrise no rezolve fronteira maríima no terrestre ho nasaun vizinu Indonsésia iha futuru.
“Projetu Greater Sunrise, fronteira maritima no terrestre ho Indonesia sei nafatin prioridade governu nian”.PM Xanana afirma
Enkuantu, Parlamentu Nasionál (PN) liu Bankada CNRT< PD no KHUNTO vota afavor Orsamentu Jeral Estadu (OJE) tinan 2025 ho votus hamutuk 42, abtensaun 0, enkuantu Bankada FRETILIN no Bankada Partidu Libersaun Popular (PLP) hamutuk vota ho votus hamutuk 23.
Jornalista : Dircia Baptista Belo