Imajem : Presidente EUA Donald Trump no Presidente França Emmanuel Macron kaer liman iha Bazílika São Pedro, Vatikanu, 26/04/2025. Foto : Vatican News
SAPNewsTL : iha Amu-Papa Francisco nia despedida, iha loron-sábadu dader wainhira loron matan sa’e, sarani sira ho emosaun maka’as no fahe, maske nune’e maibe iha serimonia ne’e lider mundial sira hasoru malu hodi ko’alia kona-ba unidade internasional.
Maromak nia povu ne’ebé hakuak nia iha Domingu Páskua lahó hatene katak ida-ne’e sei sai dala ikus, ohin akompaña nia ho laran-di’ak (carinho) iha parte ikus ninia viajen iha rai.
“Ema kbiit-na’in sira rai nian halibur hale’u nia, maibé mós adolexente barak, ne’ebé planeia ona viajen ba Jubileu Adolesente sira-nian. Hanesan reprezentante barak hosi denominasaun sarani sira seluk no relijiaun oioin halibur iha nia sorin. Hotu-hotu halibur hamutuk iha despedida Pastor fiél ba Evanjellu, ne’ebé saran-an ba haklaken fraternidade, iha nia kama ospitál nian hakilar, nia (Papa Francisco) lae ba funu”. Sita Vatican News, Vatikanu, 26/04/2025.
Pasajen rua liuliu hetan aplauzu iha Kardeál Giovanni Battista Re nia omilia. Ida uluk mak ida iha-ne’ebé nia hanoin hikas katak fiu orientadór Papa Francisco nia misaun mak “konviksaun katak kreda mak uma ida ba ema hotu; uma ida ho odamatan ne’ebé nakloke nafatin.”
Papa Francisco nia liafuan, “Ema hotu, ema hotu, ema hotu”, repete Bispu Roma nian durante Jornada Mundiál Juventude ikus nian, hodi esplika oinsá laiha buat ida no laiha ema ida maka bele haketak ita hosi domin Maromak nian ne’ebé hein nafatin ho liman nakloke atu simu ita, maski ita-nia kondisaun saida de’it.
Uma ho odamatan nakloke mak kreda ne’ebé Fransisku buka atu hari’i hodi fó prioridade ba sira ne’ebé ikus, kiak sira, haraik-an sira, sala-na’in sira. Sira ikus ne’ebé simu nia iha limiar Bazílika Santa Maria Maggiore nian molok hateke ikus Maria Salus Populi Romani nian.
Maibé sarani sira mós basa liman, liuliu, pasajen ne’ebé Re hanoin hikas apelu insesante ba dame no konvite ba razaun no “negosiasaun onestu hodi hetan solusaun posivel sira, tanba funu – so halakon de’it ema nia vida, destruisaun uma sira, destruisaun ospitál no eskola sira.”Konta Kardeál Giovanni Battista Re
Imagem : Presidente EUA Donald Trump no Presidente Ukraina Volodymyr Zelensky halo enkontru breve.
Molok serimónia hahú, Prezidente norte-amerikanu no ukranianu sira hasoru malu durante minutu balun. Ita hein no harohan atu buat ruma pozitivu bele sai hosi konversa ida-ne’e, kolókiu ikus dame nian ne’ebé fasilita hosi Susesór Pedro nian ne’ebé uluknanai hakarak hanaran-an nu’udar santu Assis nian, santu dame nian.
Partisipa iha serimonia funeral ne’e mak Presidente Norte Amerikanu Donald Trump,Presidente Ukranianu Volodymyr Zelensky, Presidente Franca Emmanuel Macron, Presidente Portugal Marcelo Rebelo da Silva, Presidente Republika Italia Sergio Mattarella, Prezidente Brazil Luiz Inacio Lula da Silva, Presidente Demokratika Timor-Leste Jose Ramos Horta, Primeira Ministra Italia, no lider nasional husi nasaun sira seluk.
Jornalista : Marciana Fernandes