Imajem : Papa Leão XIV iha Bazílika São Paulo Vaticano, 20/05/2025. Foto : Vatican News
SAPNewsTL : Papa Leão XIV vizita Bazílika Saun Paulo iha Tersa-feira loraik. Iha ninia omilia, Santu Padre destaka tema prinsipál tolu husi Saun Paulo nia Surat ba Romanu sira: grasa, fiar no justisa, no konfia “inísiu Pontifikadu foun ida-ne’e nian ba intersesaun Apóstolu jentiu sira-nian.”
Marciana Jornalis – SAPNews. Fonte sira – Notísia Vatikanu
“Iha abut vokasaun ida-idak nian mak Maromak: ninia mizerikórdia, ninia laran-di’ak, laran-luak hanesan inan ida, ne’ebé naturalmente, liuhusi ninia isin rasik, fó han ninia oan bainhira ida ikus ne’e seidauk iha kapasidade atu fó han nia an rasik”, Hateten Papa Leão XIV iha Vatikanu, 20/05/2025. Sita Vatican News
Iha tempu hanesan, nia agradese Na’i ba vokasaun ne’ebé nia transforma nia moris, Leão XIV kontinua, “ita husu ba nia atu hatene hatán ho modu hanesan ba ninia konvite sira, sai sasin domin nian ne’ebé fakar iha ita-nia fuan husi Espíritu Santu ne’ebé haraik mai ita”.
“Ita husu atu ita bele haburas no habelar ninia karidade hodi hakbesik ba malu iha luta hanesan sentimentu nian ne’ebé husi enkontru ho Kristu, lori persegidór uluk nian atu sai “buat hotu ba ema hotu”, to’o pontu martíriu nian. Nune’e iha frakeza isin nian, kbiit fiar nian iha Maromak ne’ebé sei revela justisa”.
Imagem : Papa Leão XIV iha Basílica São Paulo
Hafoin ne’e nia hanoin hikas katak Bazílika Saun Paulo nian iha li’ur hosi parede sira hetan konfiansa ba kuidadu hosi komunidade beneditina ida durante sékulu barak. Tanba ne’e, obrigatóriu atu ko’alia kona-ba Saun Bento no ninia Ukun no kona-ba Bento seluk, Amu-Papa Bento XVI, hodi sita ninia liafuan ba foin-sa’e sira:
“Maluk doben sira, Maromak hadomi ita. Ida-ne’e mak lia-loos boot, ita-nia moris nian no fó sentidu ba buat hotu-hotu. Iha orijen ita-nia ezisténsia nian, iha planu ida Maromak nia domin nian” no fiar “lori ita atu loke ita-nia fuan ba mistériu domin nian ne’e no atu moris nu’udar ema ne’ebé hatene katak Maromak hadomi sira.”
Ida-ne’e mak abut simples no úniku ba misaun hotu-hotu, inklui ha’u-nian, nu’udar susesór Pedro nian no erdeiru ba Paulo nia laran-manas apostóliku. Na’i haraik grasa mai ha’u atu hatán ho laran-metin ba nia bolu.”