Imajem : Eis Primeiru Ministru Taur Matan Ruak iha Farol,26/11/2024. Foto : Marciana da Conceição
SAPNewsTL, Díli – Relasiona ho loron proklamasaun independénsia 28 Nevembru dala 49⁰, Eis Presidente Repúblika Taur Matan Ruak husu ba ukun nain sira atu kuidadu no hadomi povu no nasaun Timor-Leste tanba ukun rasik an ne’e sosa ho ema rihun ba rihun ninia mate.
Eis Presidente Repúblika Tauk Matan Ruak hateten tinan ne’e Timor-Leste kompleta proklamasaun independénsia dala 49⁰, ukun rasik an ne’e sosa ho sofrementu no terus tanba ne’e Timoraon hotu tenke hadomi povu no nasaun.
“Tinan ida ne’e kompleta 49 anos, tinan 1975 mai to’o ohin ne’e istoria ida ne’ebe diak no buat aat, sofrimentu mai to’o ohin, ha’u nia mensajen ba povu Timor mak ne’e, hadomi ita nia rai no hadomi ita nia povu tanba ema la fó ba ita husi bandeza, ita sosa hodi ran no terus mak hetan ukun an”.Tenik Eis PR Taur Matan Ruak iha Farol, 26/11/2024
Matan Ruak hatutan “se buat ne’ebe mak ita lori osan mak sosa, ita nunka soe, nunka halo aat no ita kuidadu, tanba sa mak ema mak sosa la kuidadu, ema rihun ba rihun mate mak sosa ukun an, ita tenki kuidadu rai ne’e ho didiak”.
Eis Primeiru Ministru ne’e husu ba governante sira atu kuidadu, hases interese grupu no privadu hodi tau matan ba povu no nasaun tanba kadeira ne’ebé tur ne’e mai hosi terus no sakrifisiu ema barak nian.
“Ha’u nia mensajen ba populasaun tomak, autoridade sira hahú husi Presidente Repúblika, Prezidente Parlamentu Nasionál, Primeiru Ministru no membru governu sira to’o Xefe Aldeia sira katak fatin ida ita boot sira tur ne’e ema rihun ba rihun nia terus no sakrifisiu tanba ne’e kuidadu, haluhan ita nia an, tau matan ba ema barak, tau matan ba ita nia nasaun boot liu interese grupu no individial”.Taur husu
Eis Primeiru Ministru ne’e husu ba makaer ukun sira hodi servisu makaas hodi hametin paz, estabilidade no garante bem estar sidadaun nian.
“Servisu makaas hodi hametin paz, estabilidade no bem estar sidadaun sira nian, servisu maka’as ita sei manan, parabens ba povu tomak, parabens ba sira ne’ebe lakon nia inan, aman, oan, familia tomak, onra no gloria ba sira ne’ebé fo an ba mate hodi liberta nasaun ne’e”. Nia sublinha
Eis Guerileiru ne’e husu ba joven sira atu halo reflesaun barak, hamoris ispíritu krítiku, no fo akompanhamentu ba dezenvolvimentu nasaun nian tanba todan nasaun nian sei fo ba joven sira.
“Jovens tenki halo reflesaun barak, hamoris ispíritu krítiku, brani hateke ba ema nia matan hodi ko’alia, buat ne’ebe mak ami la halo agora sei entrega ba imi hodi kontinua, situasaun difisil lori terus, bainhira terus lori lisaun, ita aprende”.
Taur Matan Ruak akresenta, joven sira tenki hetan tratamentu saúde ne’ebé ho moris naruk, iha asesu ba siensia, teknolojia no inovasaun, no asesu ba rendimentu ne’ebé sufisiente ka moris diak.
“Ami nia matan la dukur, tilun la diuk, ami la pikun, ami kontinua akompanha prosesu hotu, ami nia sentimentu pasadu ne’ebé lori ami ba ai-laran sei iha nafatin, ha’u preokupa Timor maibé ha’u fiar Timor-Leste sei ba oin, jerasaun agora tenki moris ho saude diak, asesu ba siénsia, teknolojia, inovasaun no asesu ba rendimentu ne’ebé sufisiente”.Nia hakotu
Durante apresentasaun, Eis governante ne’e mós preokupa kona-ba problema kiak multdimensionál (41.2%), Malnutrisaun (48%), Dezempregu (9.6%) no inseguransa alimentar (36%).
Hafoin sorumutu entre Eis Primeiru Ministru Taur Matan Ruak ho jornalista sira, kontinua kedas ho foto hamutuk no jantar konfraternizasaun iha Farol, molok fahe malu.
Jornalista : Dircia Baptista Belo