Imajen konferensia imprensa husi Uniaun Estudante Universitariu Munisipiu Ermera (ENEUMER) iha Jardim 5 de Maiu, Sexta-Feira,30/09/2022
SAPNewsTL,Dili: Uniaun Estudante Universitariu Munisipiu Ermera (ENEUMER) hala’o konferénsia imprensa kona-ba problema ne’ebé Magnifiku Reitor halo suspensaun total ba aktividade akadémiku liu-liu prosesu aprendijazen no trava dosente sira nia salariu iha Instituisaun East Timor Cofee Institute (ETCI) Ermera.
Liu husi konferensia imprensa, portavoz Uniaun Estudante Universitariu Munisipiu Ermera (ENEUMER) Xisto Alves do Santos haktuir Uniaun Estudante Universitariu Munisipiu Ermera (ENEUMER) foti desizaun hodi realiza Konferensia Imprensa ida ne’e, relasiona ho problema ne’ebe mak agora dadaun East Timor Coffe Instituto (ETCI) hasoru hodi suspende total aktividade akademiku, liu liu prosesu aprendijazen ne’ebe suspende total, kuaze fulan tolu liu ona.
“Bazeia ba kronolojia mak hanesan, falta fasilidade aprendijazen, Rekursu Humanu limitadu, falta ekipamentu Laboratoriu, laiha seguransa sosial ba dosente sira, inklui funsionariu hotu seida’uk hetan direitu durante fulan tolu (3) liu ona”. Dehan Porta voz Xisto Alves do Santos ba jornalista iha Jardim 5 de Maiu, Sexta-Feira,30/09/2022.
Portavoz ne’e akresenta, husi UNEUMER haree ida ne’e hanesan problema seriu ne’ebe mak fo impaktu bo’ot tebes ba povo Agrikultor no Ai-leba nia oan sira ne’ebe mak dadaun ne’e hala’o sira nia estudu iha ETCI sai vitima ba sira nia estudu tanba ne’e sira ba ezize ba Reitor atu responde ba problema ne’e.
“Ezize ba Reitor ETCI, fundasaun Cafe LAHER atu responde lalais problema ne’ebé mak akontese iha ETCI – Ermera durante fulan tolu nia laran, laiha aula apredijazem, parte relavantes sira loke matan hodi haree, loke tilun hodi rona problema hirak ne’ebé mak estudante sira infrenta iha ETCI daudaun nee”. nia dehan
Iha fatin hanesan, Prezidente Uniaun Estudante Universitáriu Munisipiu Ermera (UNEUMER), Elderito Pinto Salsinha hateten, ezizensia ne’ebe sira hato’o ona ne’e mak nafatin laiha iha solusaun sira sei nafatin luta hodi defende.
“Ezizensia ne’ebé ami hato’o se karik la iha solusaun entaun ami husi uniaun estudante universitariu Munisipiu Ermera nafatin kopera ho sivil akademiko sira ne’ebe mak agora dadauk kontinua estudo iha ETCI hodi nafatin luta ba defende estudante ETCI sira nia diretu ho estratejia seluk tanba problema ne’ebé mak dadauk povu agrikultor no ai leba oan sira ne’ebé mak enfrenta iha ETCI problema husi instituisaun maibé vitima ne’e maka estudante”. nia sublinha
Prezidente UNEUMER ne’e fundamenta, ba oin atu halo asaun ka la halo asaun depende ba rezultadu husi konferensia imprensa ida ne’e inklui mos hein rezultadu husi ezijensia ne’ebe hato’o husi Xefi Departamentu tolu no Dekanu Fakuldade tolu no Korpu Dosente sira no estudante sira nia ne’ebe hato’o ona iha loron hirak liu ba.
“La iha solusaun ruma ba ezijensia hirak ne’e maka UNEUMER nafatin koopera ho parte sira ne’ebe hato’o husi ezijensia hodi nafatin eziji para labele abandona povo agrikultor no ai leba oan sira ne’ebe mak dada’uk mai hala’o estudo iha ETCI”. Nia hakotu.
Jornalista: Antonio Tilman
Editor: Ekipa editorial