Imajem Atleta 22 ne’ebe prepara atu partisipa iha Sea Games 2023 Iha Cambodia
SAPNewsTL, Dili: Atleta nain-22 husi modalidade lima halo preparasaun intensivu durante fulan rua iha kuartel jeral Polisia Militar ne’ebe finansia husi governu liu husi Sekretariu Estadu Juventude no Desportu (SEJD) responsável husi Konfederasaun Desportu Timor-Leste (CDTL sigla portuges) ne’ebe sei realiza iha loron 5 to’o 17 fulan maiu 2023.
“Ohin ita nia atleta nain-22 husi modalidade lima taekwondo, voleibol praia, siklismu, boxing no karate-Do ofisialmente tama gazerna durante fulan rua hodi halo preparasaun intensivu iha kuartel jeral Polisia Militar tanba modalidade futebol ho atletizmu iha fatin rasik, ita lansamentu ofisial ba sira nia preparasaun hala’o iha loron 3 fulan fevereiru 2023 ne’ebe durante fulan ida sira halo treinamentu iha idak-idak nia federasaun nian maibe antes mos sira halo preparasaun atleta sira halo treinu regular hela”, dehan vise prezidente Komisaun Prezidente Integradu (KPI) Elias de Jesus ba jornalista sira iha kuartel Polisia Militar Kintal Boot, Dili sesta (3/03/2023).
Elias hatutan, atleta husi modalidade sira iha kuota la hanesan tuir kapasidade governu nian ne’ebe modalidade atletizmu atleta prinsipal nain tolu, rezerva ida, boxing atleta prinsipal nain haat, rezerva ida, taekwondo iha atleta nain tolu prinsipal, rezerva ida, Karate-Do iha atleta prinsipal nain tolu rezerva ida, siklismu iha atleta prinsipal nain rua rezerva ida, voleibol praia iha atleta prinsipal nain haat, rezerva rua ne’ebe atleta sira ne’e sei akompaña husi ofisial ida ho treinador ida no atleta rezerva sira sei subtitui atleta prinsipal sira karik iha difikuldade ruma.
Nia informa, atleta sira sei treinu tuir idak-idak nia orariu ne’ebe kada modalidade bazeia ba nesesidade sira iha no treinu iha sira nia fatin ne’ebe antes ne’e sira halo preparasaun regular ba no sei utiliza mos fatin no ekipametu iha kuartel jeral Polisia Militar rasik ne’ebe durante atleta taekwondo ho karate-Do halo treinamentu regular iha jinajiu desportu Dili, siklismu iha estrada publiku, boxing iha Benfica no Lecidere EL-Matador nia fatin, atletizmu iha Ermera, futebol iha kampu demokrasia no voleibol praia iha kampu voleibol Lecidere.
Vise Prezidente KPI afirma tan, treinamentu fulan rua ne’e maximu ona husi apoiu governu liu husi SEJD oferese no CDTL hanesan responsavel masimu ba atleta sira nia preparasaun nivel nasional tenta ona kria kondisaun minumu balun ba atleta sira halo preparasaun durante fevereiru nia laran durante sira mai iha gazerna iha kuartel jeral Polisia Militar ne’e antes atleta sira halo ona preparasaun regular maibe tama gazerna ba preparasaun intensivu nian ba partisipa Sea Games Cambodia 2023.
Iha fatin hanesan reprezentante SEJD Cesarino da Silva dehan, ohin loron atleta sira tama gazerna durante fulan rua depois sira partisipa SEA Games Cambodia 2023.
“Ohin ne’e ita lori atleta sira mai tama gazerna durante fulan rua iha kuartel jeral Polisia Militar nian para halo preparasaun intensivu tuir orariu federasaun nian depois mak sira ba partisipa Sea Games Cambodia 2023”, Cesarino hateten
Cesarino akresenta, motivasaun ba sira mak hakarak enkoraja atleta sira dixiplina iha preparasaun no treinador sira fo treinamentu diak ba atleta sira, durante fulan rua ne’e sufisiente para atleta sira halo preparasaun hodi hetan rezultadu diak iha Sea Games Cambodia 2023, sira ne’ebe tama gazerna ne’er atleta selesionadu sira husi federasaun idak-idak nian reprezenta Timor-Leste ba Cambodia.
Entretantu atleta sira nia preparasaun intensivu ne’e responsável husi Komisaun Preparasaun Integradu (KPI) hola parte husi SEJD, CDTL ho CONTL no preparasaun ba atleta sira ne’e finansia husi governu liu husi SEJD ho orsamentu montante 83,000 USD ba atleta sira nia preparasaun hodi partisipa Sea Games tinan 2023 iha Cambodia ne’ebe sei komesa iha loron 5 to’o 17 fulan maiu 2023.
Reportajen: Augusto dos Santos