Imajem : Padre Paroku Luro Tiago da Costa Soares iha Igreza Parokia Nossa Senhora Ranha dos Apostolos de Luro, 02/11/2024.
SAPNewsTL, Dili : Durante Selebra Loron Finadu, Padre Paroku Luro Tiago da Costa Soares husu sarani sira atu reza ba matebean sira, no prepara ida-idak ninia lalehan liu hosi hadomi ema seluk no halo tuir maromak nia ukun fuan.
Padre Tiago da Costa Soares haktuir igreza fahe ba parte tolu, mak igreza peregrinu, prugativa no triunfante, loron finadu momentu ne’ebe presiza halo sakrifisiu liu hosi halo misa no harohan ba Maromak hodi liberta matebean sira iha igreza prugativa ba triunfante.
“Igreza fahe ba tipu tolu mak igreza peregrinu (ita ne’ebe sei moris), igreza prugativa (matebean sira ne’ebe sei hamos an iha ahi purgatoriu) no igreza triunfante (matebean ne’ebe hela hamutuk ho Maromak iha nia kadunan sabtu), ohin Selebra loron finadu, loron ne’ebe dedika ba matebean sira, ita hotu reza ba sira atu hetan libertasaun hosi ahi purgatorium hodi ba igreza triunfante nian”.Tenik Padre Paroku Luro Tiago da Costa Soares iha Luro, 02/10/2024.
Tiago husu ba sarani hotu hodi hatene hatudu domin no hadomi, fiar metin iha Maromak no hadomi maun alin sira nu’udar an rasik.
” Ita hotu ne’ebe sei moris presiza hadomi ema seluk nu’udar ita an rasik, rona malu, respeitu malu, tulun malu no halo tuir maromak nia ukun fuan hanorin katak adora Maromak mesak ida deit no hadomi maun alin sira nu’udar ita an rasik”. Tiago sublinha
Padre Paroku Luro ne’e dehan humanidade ida-idak presiza prepara an, prepara ba lalehan tanba ema ida la hatene sei mate bainhira no mate oinsa, sarani diak presiza halo buat ne’ebe lolos no diak.
“Ohin loron ita sei moris, ita tenki prepara ita nia Lalehan, ita sei iha igreza peregrinu, ita tenki prepara an liu hosi halo buat ne’ebe diak, los no moos”. Tenik Tiago da Costa Soares
Tuir observasaun SAPNews iha Luro nota katak sarani sira partisipa maksimu iha misa ba loron santu/a no loron matebean sira nian, sarani ida halo misa dala rua, molok ba kari ai-funan iha rate.
Iha selebrasaun loron finadu, sarani sira lori ai-funan natural no ai-funan artifisial, maske antes ne’e Igreza Katolika liu hosi Confenrensia Episkopal Timorense (CET) hasai dokumentu ida hodi bandu lori ai-funan artifisial ba igreza no rate.
Jornalista : Ekipa Kobertura