Imajem : Primeiru Ministru Kayrala Xanana Gusmão hamutuk Bispu sira iha Palásiu Governu Dili, 11/09/2024. Foto : Média PM
SAPNewsTL, Díli – Governu no Igreja Katólika agradese ba povu Timor-Leste tanba partisipa máskimu iha eventu nasionál vizita Sua Santidade Papa Francisco ho paz no hatudu imajem diak iha komunidade internasionál nia matan.
Hafoin Papa Francisco fila hikas husi Timor-Leste hodi kontinua vizita apostólika ba nasaun Singapura, lider maksimu igreja katólika hala’o enkontru ho Primeiru-Ministru (PM), Kay Rala Xanana Gusmão hodi parabeniza povu tomak ne’ebe kontribui ambiente hakmatek, harmonia no estabilidade durante loron tolu hodi fó susesu bá vizita Sua Santidade Papa Francisco iha Timor-Leste
“Sira mai hasoru-malu ho Governu, la’ós atu agradese malu maibé hamutuk felisita tanba ho servisu hamutuk mak sai susesu bo’ot ida. Ita atu felisita karik felisita povu ne’ebé ho laran tomak to’o iha Dili, desde tersa kalan tomak aguenta iha Tasi-Tolu”.
“Ha’u felisita liu mak joven sira tanba sira-nia komportamentu di’ak tebtebes, hatudu katak Timoroan sira bele kria nafatin armonia, laiha violénsia, hatudu domin hodi fraternidade umana bele sai realidade iha ita-nia rain”. Informasaun ne’e SAPNews assesu liu husi komunikandu imprensa ne’ebe media PM Xanana Gusmão publika, kuarta (11/09/2024).
Iha fatin hanesan, Arsebispu Arkedioseze Dili, Dom Virgílio Kardeál do Carmo da Silva, SDB akresenta hasoru malu ho parte Governu hakarak fahe ksolok bá malu tanba durante eventu vizita Papa Fransisco bele kolabora hamutuk hodi fó susesu ba eventu nasionál refere.
“Ksolok ne’ebé ita hetan loron hirak ne’e tanba povu no joven ninia maturidade. Ema hotu-hotu hosi ki’ik to’o bo’ot, buat furak ne’e mundu haree tanba esforsu ema hotu-hotu nian. Tanba ne’e Governu ho Igreja hakarak felisita sarani Timor tomak. Hanesan Amu Papa dehan, igreja mak povu, nasaun mak povu ne’ebé tane a’as povu,” Dom Virgílio dehan.
Povu ne’ebé hatudu nia maturidade, servisu makaas, terus hamutuk iha loron manas nia laran durante loron tolu, ulun bo’ot kreda Timor ne’e konsidera hanesan aktu ida kompaixaun sarani nian liu hosi sira nia unidade ho Ierarkia Igreja Universál.
Sua Santidade Papa Francisco vizita ona Timor-Leste durante loron tolu, hosi loron 09 to’o 11 setembru 2024.
Ententantu, iha sorumuru ne’e partisipa husi Primeiru-Ministru Kay Rala Xanana Gusmão, Arsebispu Metropolitana de Dìli, Dom Virgilio Cardeal do Carmo, Bispu Dioseze Baucau Dom Leandro Maria Alves, Bispu Dioseze Maliana Dom Norberto do Amaral no representante Santa-Se iha Timor-Leste Marco Sprizzi.
Jornalista : Marcela Mery da Costa