Imajem : Presidente Repúblika Jose Ramos Horta & Eis Prezidente Repúblika Taur Matan Ruak iha resintu Palasiu Presidensial Aitarak-Laran, 24/07/2024. Foto : Media PR
SAPNewsTL,Díli – Eis Xefi Governu Taur Matan Ruak, prontu kordena ho IX Governu Konstitusional, ne’ebe lidera husi atual Primeiru-Ministru (PM) Kay Rala Xanana Gusmão hodi apoiu auditoria internasional kona-ba reforsa jestaun institusional.
Tuir eis Primeiru-Ministru Taur Matan Ruak hateten, nu’udar Timoroan prontu koopera ho Governasaun dasia, apoiu prosesu auditoria internasional hodi garante boa governasaun no hadia kualidade jestaun institusional iha Timor-Leste hodi garantia no lori moris diak ba povu no nasaun iha futuru.
“Auditoria ne’e prosesu ida normal, ha’u laiha problema ho ida ne’e, ha’u hanoin nu’udar Timoroan prontu koopera ho IX Governu tenki halo auditoria”. Informa eis Prezidenti Republika Taur Matan Ruak ba Jornalista sira hafoin remata enkotru ho Prezidenti Republika José Ramos Horta, iha resintu Palasiu Prezidensial Aitarak-laran, Quarta (24/07/2024)
Tanente reformadu Taur Matan Ruak, afirma, auditoria internasional ne’e sidadaun hotu-hotu tenki hola parte iha prosesu ne’e, ema ida labele hases aan husi prosesu auditoria internasional ida ne’ebe ho sentidu atu hadia boa governasaun.
Enkuantu, Prezidenti Republika José Ramos Horta, esklarese liu tan katak prosessu auditoria internasional ne’ebe Primeiru-Ministru (PM) Kay Rala Xanana inisia ho nia objetivu atu haree problema balun ne’ebe akontese ona laos halo persegisaun politika.
Auditoria internasional ho nia objetivu Governu bele komprende mudansa sistema finansas, laos Governasaun dasia halo persegisaun politika, tamba ne’e nia parte konkorda ho desizaun PM Xanana nian atu hala’o auditoria internasional, Tenik nia.
“Hanesan xefi estadu ha’u konkorda ho desizaun Primeiru-Ministru Kay Rala Xanana Gusmão nian inisia prosesu auditoria internasional, tamba hatudu ita nia sentidu estadu, agora prosesu ida ne’e sei apakah duni ba oin”
Entretantu, iha loron 18 fulan Julhu foin lalais ne’e Primeiru-Ministru Kay Rala Xanana Gusmão deklara ba públiku katak IX Governu Konstitusional sei hala’o auditoria internasional hodi identifika lakunas balun ne’ebe akontese iha implikasaun ba muda sistema finansas ida uluk ne’ebe laiha responsabilidade no laiha auditoria.
“Ho buat sira ne’e hotu maka ami hasai ona konkursu ba auditoria internasional laos atu persegi malu, auditoria ne’e atu hatudu ba futuru lider katak buat hotu-hotu tenki tuir regra”. Nia deklara.
Jornalista : Guilhermino Ramos