Imajem : Primeiru-Ministru Kay Rala Xanana Gusmão iha Palasiu Prezidensial, Sexta, (03/10/2024). Foto : Guilhermino Ramos
SAPNewsTL, Díli — Polémika Ai-moruk la sufisiente ne’ebe hetan intervensaun husi Bankada FRETILIN iha uma fukun Parlamentu Nasionál (PN) inklui públiku preokupa durante ne’e, Primeiru-Ministru (PM) Kay Rala Xanana responde katak demite Ministra Saúde (MS) Ellia A. dos Santos Reis Amaral, PM Xanana mos sei resigna an hodi hamosu eleisaun antisipada.
Primeiru-Ministru Kay Rala Xanana Gusmão informa, Ministra Saúde laiha kapasidade hodi rezolve problema aimoruk ne’ebe sai polémika iha Timor-Leste, maibé PM Xanana laiha resposta pozitivu katak nia parte konkorda ho intervensaun bankada Partidu Frenti Revolusionario Timor-Leste Independente (FRETILIN) hodi ezonera Ministra Ellia A. dos Santos Reis Amaral husi nia kargu.
“Uluk Governu ida ne’e seidauk tama buat ne’e imi la hatene, buat ne’e la’o diak hela, nia laiha kapasidade tanba Ministra ida uluk ne’e kapas tebe-tebes, ema mate kovid, ema moras kleur ona mak mate ne’e kovid.” Hateten PM Xanana hafoin remata enkontru semanal ho Prezidente Repúblika José Ramos Horta iha Palasiu Prezidensial, Sexta, (03/10/2024)
Xefi Governu fundamenta, problema
Ai-moruk laiha besik tonelada ida, ai-moruk ida ne’ebe fora atu prazu ona maka governasaun dasia mai haree, la sai kestaun fundamentu ba públiku hodi krítika Governu anterior, maibé públiku kritika serbisu Ministra Saúde nian, katak laiha kapasidade atu halo jestaun ba saúde.
“Governu Timor-Leste seidauk selu 18 milhoens ba ospital Singapura no Malaysia deve hela ne’e, públiku tau sala mai ami dehan Governu ida agora ne’e la halo serbisu naok osan deit, entaun atu hasai, Ministra no Ministru sira ne’e agora ha’u mos sai tiha, tamba ha’u sai Primeiru-Ministru diabu barak tebe-tebes, diak liu hamosu eleisaun antisipada hodi Governu aitonka tonka malu ba para semo deit”.Nia dehan
PM Xanana hatutan, Iha tinan 10 CNRT kaer Governu la halo buat ida naok deit osan, maibé nia parte konvida públiku tomak ne’ebe kestiona servisu Governu nian, atu bele la’o kobre territóriu nasionál haree tok estrada kilometru hira mak halo iha distritu inklui Região Administrativa Espesiál Oe-cusse Ambenu (RAEOA).
“Laos deit hasai Ministra Saúde maibé ministru sira hasai hotu, ikus liu ha’u mak sai, para iha eleisaun antisipada, maibé ha’u konvida ita boot sira la’o haleu Timor, husi Tutuala to’o Oe-cusse haree tok estrada kilometru hira ona mak halo no hira mak seidauk halo”.Nia husu
Entretantu iha loron 27 fulan setembru foin lalais ne’e representante povu iha uma fukun Parlamentu Nasionál, Deputada Bankada FRETILIN Maria Angelica hato’o ezijensia ne’e, relasiona ho publiku nia prekupasaun, hodi husu Primeiru-Ministru tenki demite Ministra Saúde, tamba Deputadu ne’e konsidera Ministra Ellia laiha kapasidade atu halo jestaun ba problema saúde.
“Nia laiha responsabilidade atu rezolve problema saude, ne’ebe afeta ba ema nia vida. Tamba ne’e husu ba Governu no Primeiru-Ministru atu demite nia, nia laiha kapasidade atu resolve problema saúde nian, ita hatete katak, Ministériu Saúde nia pilar importante atu toma responsabilidade ba povu nia saúde”. Hatete Deputada Maria Angélica
Nia salienta Konstituisaun RDTL ko’alia kona-ba tratamentu saúde ba povu Timor-Leste tomak ho gratuitu, entaun Governu ne’ebe konsolida husi Partidu CNRT no PD demite Ellia subtitui figura seluk ne’ebe iha kapasidade hodi halo jestaun ba problema saúde ne’ebe durante ne’e povu enfrenta.
“Tratamentu ba ita nia povu ho gratuitu, Ministra Saúde ne’e Primeiru-Ministru tenki demite nia subtitui ema seluk atu lidera instituisaun Governu, liu-liu Ministériu Saúde nian”. Nia husu
Fo hanoin fali katak Primeiru Ministru Kayrala Xanana Gusmão hamutuk membru governu konsolida ona sira nia koligasaun hodi ukun to’o tinan 2028.
Enkuantu, Governu mós aprova ona Osamentu Jeral Estadu (OJE) tinan 2025 hamutuk billiaun 2.6 no entrega ona ba Parlamentu Nasionál hodi prepara ba debate no halo aprovasaun.
Jornalista : Guilhermino Ramos da Cruz