Imajen lansamentu Sensus Uma kain 2022, iha Salaun Ministeriu Finansas, Aitarak-Laran, 15/11/2022
SAPNewsTL, DILI – Iha ámbitu komemorasaun loron ba populasaun Billaun ualu iha Mundu, Timor-Leste anúnsia nia total populasaun 1.340,434 iha tinan 2022, tuir Reprezentante UNFPA iha Timor-Leste Pressia Arifin-Cabo haktuir iha loron populasaun ho Billaun Ualu ohin ne’e, fo hanoin hikas katak ita moris iha mundu ida ho oportunidade rohan-laek ba ita hotu-hotu, maski iha mos dezafiu oioin ne’ebé mundu hasoru hela
“Ohin loron mos sai hanesan loron importante ida – Lansamentu ba rezultadu prelimináriu husi Sensu Dijital ba dala uluk liu ne’ebé hala’o iha Timor-Leste, iha tinan ida-ne’e, Iha loron populasaun ho Billaun Ualu ohin ne’e, fo hanoin hikas katak ita moris iha mundu ida ho oportunidade rohan-laek ba ita hotu-hotu, maski iha mos dezafiu oioin ne’ebé mundu hasoru hela, Ida ne’e hanesan marku ida ba umanidade no oportunidade boot ida atu harii reziliénsia demográfiku ba dezenvolvimentu ne’ebé sustentável”, Dehan Reprezentante UNFPA iha Timor-Leste Pressia Arifin-Cabo ba jornalista iha Fatin auditorium Ministériu Finansas iha Aitarak-Laran Díli Tersa Feira (15/11/22).
Ba Timor-Leste, fó sai rezultadu prelimináriu sensu, ne’ebé indika populasaun iha Timor-Leste ho total 1.34 millaun pessoas, oferese mós oportunidade ida atu investe iha dadus hodi hare ba orsamentu jerál, formulasaun politika no planeamentu jeral ba dezenvolvimentu ba tinan 10 tuirmai – to’o wainhira sensu tuir mai hala’o fali, Demográfiku Timor -Leste husi sensu sira uluk hatudu katak , populasaun iha Timor- Leste nakonu ho foinsae – no 74% ho idade 35 mai kraik.
“Nasaun ida ne’e sei kontinua nia profile demográfiku foinsa’e ba tinan balun tuir mai, ne’ebé signifika katak persija atu investe liutan iha joven sira nia edukasaun, oportunidade ba empregu no saúde inklui nesesidade sira ba saúde reprodutiva, Ida ne’e importante atu hatutan joventude sira nia potensial hodi kontribui ba dezenvolvimentu ekonómiku iha railaran”. nia teni
Imajen Intervista Reprezentante UNFPA iha Timor-Leste Pressia Arifin-Cabo
UNFPA habo’ot liutan posibilidade ba feto no joventude sira atu lidera moris ne’ebe saudável no produtiva. Ezemplu, hasa’e asesu ba planeamentu familiar, ne’ebé iha hela pursentu 22 ba feto kaben-nain sira iha Timor-Leste, no servisu saúde reprodutiva ba feto sira ne’ebé barak mak foinsa’e hela, formasaun ba parteiras sira ne’ebé iha esperensia hodi asisti partus nomos fornese edukasaun sexualidade ne’ebé apropriadu ba joventude sira, presiza mos investe ba timor nia emar sira – inklui salvaguarda sira-nia direitu no opsaun sira- ba páz, dezenvolvimentu ekonómiku no dezenvolvimentu sustentável iha sosiedade.
“UNFPA, iha mundu nomos iha Timor-Leste iha istória ida ne’ebé naruk hodi fó apoiu ba sensu sira, ne’ebé mak sai hanesan fonte dadus populasaun ne’ebé esensiál tebes ba planu dezenvolvimentu, Durante tinan rua ikus ne’e, UNFPA fó apoiu hela ba Governu Timor-Leste liu husi Diresaun Geral Estatístika (DGE) iha dijitalizasaun ba sensu nia faze ida-idak”. nia hatete
UNFPA mobiliza fundus no fornese péritus xavi sira iha aspetu oioin sensus nian atu asegura katak sensu dijitalizadu ba dala-uluk ne’e hala’o tuir prinsípiu no matadalan internasionál, UNFPA mos koordena apoiu sira husi ajénsia Nasoins Unidas sira seluk – UNICEF, UNDP, WFP, UN WOMEN no Australian Government Department of Foreign Affairs and Trade (DFAT).
“Ita mos presiza atu hare’e klean liutan ba iha numerus sira husi sensu no foka iha loke dalan ba ema ida-idak ba kualidade moris ne’ebé tulun sira atu bele moris diak iha mundu modernu ida-ne’e”. nia sublinha
UNFPA sei kontinua atu investe no apoiu sensu ho kualidade ne’ebé fornese dadus disagregadu atu permite indikasaun ba nesesidade sidadaun hotu-hotu no assegura laiha ema ida mak hela iha kotuk. Ezemplu, feto sira, joventude sira no ema idozus sira nomos sira ne’ebé ho defisiénsia.
“Enkuantu ita marka hela Loron ba Billaun Ualu no lansamentu rezultadu prelimináriu ba sensu, mai ita serbisu hamtuk hodi hadia Timoroan sira nia moris, UNFPA sei kontinua fó apoiu ba DGE durante passu tuir mai ba prosesamentu no análize ba dadus sensu husi dadaun ne’e to’o iha Marsu, 2023 hafoin ida ne’e mak detailus ba rezultadu sensus ne’ebé ita hein sei publika iha Abril, 2023”. nia fundamenta
Imajen Ministru Finansas Rui Agosto Gomes
Iha fatin hanesan, Ministru Finansas Dr. Rui Agostu Gomes hateten dadus sensu populasaun ne’e sei apoia ba planeamentu no alokasaun orsamentu iha programa desenvolvimentu
“Governu Timor-Leste, Liu husi Diresaun Gerál Estatístika (DGE) halibur ona informasaun husi populasuan no uma-kain hotu-hotu iha Timor-Leste, desde inísiu husi sensu ne’ebé hahú husi loron 5 Fulan Setembru , dadus sira ne’e sei apoiu ba planementu no alokasaun orsamentu ba programa dezenvovimentu iha Timor-Leste”. tenik MF Rui Gomes
Governante ne’e konsidera, importante teb-tebes ba Timor-Leste hanesan rai ida ho populasaun jovén barak liu iha Ázia, ho porsentu 70 husi nia total populasaun.
Dadus Sensu husi Sensu Dijitál dahuluk sei tulun implementasaun ba Planu Estratéjiku Dezenvovimentu Nasionál Timor-Leste nian 2011-2030 no tulun atualiza indikador sira no monitorizasaun ba kompromisu globál sira hanesan Objetivu Dezenvolvimentu Sustentável (ODS).
“Dadus ne’e mós sei tulun ba atualizasaun informasaun estatístika kona-ba Demografia, Ekonomia no Karáter sosiál husi Populasaun,”nia haktuir
Investe iha dadus hanesan populasaun no sensu no Kapital Umanu sei tulun nasaun atu aproveita potensial tomak husi nia rezidente sira, inklui sira ne’ebé tradisionalmente marjinalizadu, hanesan ezemplu;Feto, Foinsa’e, Idozu no Maluk sira ne’ebé moris ho difisiénsia.
Durante sensu ikus hala’o iha 2015, Timor-Leste rejistu populasaun ho total millaun 1.18 Hahú husi 2004, UNFPA kontinua fornese asisténsia téknika ba Governu Timor-Leste liu husi Diresaun Gerál Estatístika hodi realiza Sensu, iha sensu tinan 2022 TL regista populasaun hamutuk milliaun 1.34
“Globalmente, UNFPA apoiu nasaun sira ba iha Sensu Populasaun no Uma-Kain, no peskiza sira seluk ne’ebé ho baze ba populasaun liu husi parseira tempu naruk ho eskritóriu Estatístika iha mundu tomak, Investimentu iha dadus no Sensu ho Kualidade sei tulun hodi hatan ba nesesidade hotu-hotu husi sidadaun sira no asegura la husik hela ema ida ba iha kotuk”. nia hakotu
Jornalista : Antonio Tilman & Marcela Merry da Costa
Editor : Ekipa Editorial