Imagen Enkontru Entre Prezidente Republika Jose Ramos Horta ho Bilionariu Amerikanu George Soros iha ONU, 24/09/2022
SAPNewsTL, ONU: Hafoin Prezidente Repúblika, José Ramos-Horta, hala’o audiénsia ho Billionáriu Amerikanu, Xefe Estadu hateten liu husi reuniau ne’e atu bele buka apoia ba media privada sira ne’ebe hatudu sira nia komitmentu durante ne’e, nune’e bele fasilita no desenvolve diak liu tan sira nia infraestrutura no ekipamentu sir aba futuru
Tuir Xefe Estadu, Na’in ba Open Society Foundation, George Soros hanesan Billionáriu ho idade tinan 90-resin ona, maibé iha kondisaun saúde di’ak, nomos iha influénsia ba mundu.
Prezidente Horta fundamenta, delegasaun husi Open Society Foundation vizita ona Timor, hodi diskuti hamutuk programa espesiál ne’ebé fundasaun ne’e atu implementa, liu-liu feto iha negósiu, mídia no demokrasia iha mundu.
“Ha’u sei haree oinsá sira bele apoia mídia iha Timor-Leste, mais ha’u lakohi rona apoiu kona-ba “training”, tanba halo ‘training” tinan lubuk nia laran, ha’u hakarak haree apoiu konkretu ba mídia mak saida?, Favór tau osan ruma apoiu ba ekipamentu apoiu ba sede, infraestrutura mídia sira-nian buat sira-ne’e. Portantu, buat barak ha’u sei ko’alia ho sira para haree oinsá señór George Soros bele apoia Timor-Leste makas liu,”. hatete Xefe Estadu iha ONU, 24 setembru 2022
Xefe Estadu ne’e hatutan, Open Society Foundation hakarak apoia hadi’a infraestrutura husi instituisaun mídia privada sira.
“Ha’u buka ba mídia privadu, preokupasaun númeru 1 ba mídia privada, sira ne’ebé kleur ona hatudu sira-nia komitmentu mídia privada ne’ebé ho sira-nia rekursu rasik ho difikuldades ne’e inklui mós “online”. Ba mídia privadu, ha’u buka atu apoiu husi governu ou fundasoens iha li’ur para ita-nia jornalista sira bele iha ekipamentu, iha infraestrutura ne’ebé di’ak liu para sira bele dezenvolve,” afirma nia
Prezidente PR Horta mos prontu atu buka apoiu ba nasaun seluk hanesan Koreia no seluk tan, hodi apoia mídia estatal hanesan RTTL.Ep, maibé kestaun ne’e tenke koordena ho governu, tanba instituisaun mídia iha papel importante hodi habelar informasaun.
Enkuantu, Molok hala’o enkontru ho Na’in Open Society Foundation, Xefe Estadu sorumutu uluk ho George Soros nia oan mane Alex Soros hamutuk ho eis Vise Primeiru-Ministru Inglaterra atuál CEO Open Society Foundation hodi ko’alia kona-ba ajenda enkontru ho George Sorus nian.
Jornalista : Vencensius Saldanha
Editor : Luis Pailofo