Imajem : Prezidente Repúblika José Ramos Horta iha RAEOA, 28/11/2024. Foto : Media-PR
SAPNewsTL, RAEOA : Proklamasaun Independénsia 28 Novembru ba dala 490, Prezidente Repúblika José Ramos Horta hateten hamutuk hodi defende dame, lia-loos no rekonsiliasaun tanba laiha justisa iha vingansa.
Xefe Estadu Timor-Leste ne’e haktuir la haluha matan-ween sira ne’ebé monu iha funu laran tanba mosu assasinatu oioin ne’ebé rezulta timoroan didiak barak nia vida liu hosi luta naruk ne’ebé mosu hahu iha tinan 1975-1999.
“Se ita atu julga pasadu, mai ita hahú ho epizódiu violénsia nakukun sira ne’ebé rejista hosi Agostu 1975 mai oin, inklui masakre Aileu no Same no purga ideolójika sira. Ita labele haluha matan-been hosi vítima sira hosi asasinatu polítiku sira ne’ebé sura labele ne’ebé hasai Timor-Leste nia oan di’ak barak”Tenik Jose Ramos Horta liu hosi nia Diskursu Iha RAEOA,28/11/2024.
Prezidente Repúbliku rekunhese inspirasaun ne’ebé Kayrala Xanana Gusmão hetan hodi defende paz, lia-loos no rekonsiliasaun liu hosi hakuak inimigu antigu sira hodi hari’i damen no estabilidade iha rejional.
“Rekoñese katak “laiha justisa iha vingansa”, Kay Rala Xanana Gusmão, sobrevivente hosi baze apoiu Matebian nia monu no sasin ba konsekuénsia sira hosi radikalizmu ideolójiku, hetan inspirasaun hosi ita-nia matrix sarani hodi defende dame, lia-loos no rekonsiliasaun”.
“Vizaun magnánimu ida ne’ebé permite ona ita atu hakuak inimigu antigu sira no hari’i hamutuk futuru ida dame no estabilidade nian iha rejiaun”.Ramos Horta sublinha
Aman Nasaun ne’e dehan, Primeiru Ministru Xanana Gusmão mak lori povu Timor ba dalan rekonsiliasaun ho matenek hodi husik pasadu rai ba pasadu, tau matan ba sobrevivente sira no fo onra ba matebian sira.
“Separasaun ne’e susar, maibé inevitavel iha sirkunstánsia sira tempu nian. Felizmente, ita-nia líder boot, Kay Rala Xanana Gusmão, lori povu Timór ba dalan rekonsiliasaun nian ho matenek, nia mobiliza timoroan tomak hodi apela atu husik trajédia pasadu ba pasadu, tau matan ba vítima sira no fó onra ba matebian sira, tantu iha Timor-Leste no Indonézia”. Hateten Ramos Horta
“Lideransa vizionáriu ida-ne’e halo posivel atu hakuak ita-nia maun-alin sira iha Indonézia, inklui sira ne’ebé, luta ba autonomia, hili atu mantein sira-nia ligasaun sívika ho Indonézia. Kompatriota sira-ne’e barak maka hetan obriga atu hela iha Atambua, Kupang, Java, Sumatra no rejiaun sira seluk iha Indonézia, tanba drama hosi ita-nia istória komún. Maski dalaruma ema haluha tiha, sira nafatin lori ahi-lakan no espíritu identidade timoroan nian”.
Ramos Horta kontinua husu ba povu tomak hodi promove fraternidade umana, pás no seguransa iha estadu Timor-Leste.
“Hakuak fraternu ida-ne’e kontinua fó fuan, hodi promove pás no seguransa. Fronteira sira ne’ebé uluk haketak ita agora simboliza lasu sira unidade nian, kontaktu no rekonsiliasaun nian — pilar fundamentál sira ba dezenvolvimentu no progresu ne’ebé fahe bainhira ita hakat ba integrasaun tomak iha Komunidade ASEAN”.
Imajem : Eis Primeiru Ministru Taur Matan Ruak iha Farol,26/11/2024. Foto : Marciana da Conceição
Antes ne’e, Eis Primeiru Ministru Taur Matan Ruak hateten rekonsiliasaun lolos sempre mai hosi ema ida-idak nia fuan no neon.
“Normalmentu rekonsiliasaun mosu iha fatin ruma tanba krize ruma akontese, krize ne’e ita nunka bele rezolve so bele ultrapassa, depois de krize iha efeitu ba ema nia moris, entaun ita halo prosesu rekonsiliasaun, entaun verdadeiru rekonsiliasaun mak ida ne’ebé mai hosi fuan, buat ne’ebé mai hosi fuan presiza lori tempu hodi ultrapassa “. Tenik Eis Prezidente Repúblika Taur Matan Ruak iha Farol, 26/11/2024
Eis Prezidente Repúblika Taur Matan Ruak hatutan husik pasadu rai ba pasadu tanba haree beibeik pasadu mak sei la la’o ba oin.
“O passado pertence o passado, katak pasadu ita la haluha mais ita labele beibeik iha pasadu porque haree beibeik pasadu ita la la’o ba oin, se mak hakarak la’o ba oin, nia tenki haluha uituan no nia tenki tau diak tiha buat ne’ebé pasadu”. Matan Ruak hateten
Jeneral ne’e ilustra katak, “Se ita sira sa’e karreta karik labele haree beibeik ba espellu, se fihir beibeik ba espellu mak ita boot sira monu ho karreta ou tama kuak tanba espellu ne’e so ajuda ita atu haree karik atu hakiduk ka haree karreta ruma hosi kotuk”.
Eis Primeiru Ministru ne’e akresenta, uluk UDT, FRETILIN & APDETI halo golpe kontra golpe maibe tempu la’o, situasaun halo ema hamutuk fila fali maske la haluha.
“Ita ba FRETILIN nian, UDT no FRETILIN halo golpe kontra golpe hodi oho malu, iha tinan 1980 mai oin, kuandu halo manisfestasaun kona ba ukun an, UDT, APODETI no FRETILIN nia oan iha ne’eba ne’e katak situasaun ne’e halo sira husik ba kotuk buat ne’ebé pasadu, sira la haluha mais sira husik hela “. Taur konta
Matan Ruak aprofunda, prosesu rekonsiliasaun ema hotu hakarak maibe estadu presiza haree tempu tanba rekonsiliasaun ne’ebé mai hosi fuan presiza lori tempu naruk simplesmente balun preparadu agora balun seidauk.
“Rekonsiliasaun agora, estadu bele halo maibe rekonsiliasaun ida mai hosi fuan, prosesu ne’e lori tempu, ida ne’ebé impōem deit nia sei la sobrevive tanba ne’e estadu halo maibe estadu mos tau atensaun kona ba tempu, deputadu sira ko’alia mais sira laos lakohi maibe dehan tempu ida ne’e seidauk preparadu, se mak lakohi rekonsiliasaun, ita hotu hakarak maibe presiza tempu, balun preparadu agora no seidauk”. Taur Sublinha
Primeiru Ministru Kayrala Xanana Gusmão husu povu tomak hodi simu realidade iha pasadu hodi hari’i futuru ne’ebé diak liu ba jerasaun foun sira.
“Ha’u husu ba povu tomak atu simu realidade iha pasadu hodi kria futuru ne’ebé diak liu ba joven sira”. Hateten PM Kayrala Xanana Gusmão iha Parlamentu Nasional durante debate OJE 2025.
Jornalista : Ekipa Kobertura