Prémiu Kampiaun 2.000 USD, ES 16 Prontu Kompete Taça Esperansa 2023

SAPNewsTL, Dili: Eskola Sekundaria 16 prontu kompete iha “Taça Esperansa 2023” ne’ebe sei realiza iha loron 30 fulan agostu to’o 30 fulan setembru 2023 tanba hakarak hadau premiu kampiaun ho orsamentu montante 2000 USD.

“Iha ekipa 16 tuir konvite ami hasai maibe iha eskola rua ESG 28 de Novembro ho Eskola Sekundario Seminario Menor mak rezigna an depois ami troka kedas, nune’e komesa horseik kedas eskola sira ne’e hatama hotu ona estudante sira nia kartaun estudante, kaderneta no foto”.

“Razaun sira tenki tuir rekezitu, ami husu ne’e tanba ami tauk eskola bolu ema husi liur maski komisaun organizador iha regulamentu bainhira eskola bolu ema liur sei fo sansaun”, Dehan Koordenador Komissaun Organizador Domingos Caeiro ba jornalista SAPNewsTL iha Estadium Munisipal Dili sabadu (26/08/2023).

Koordenador ne’e hatutan, objetivu husi kompetisaun ne’e atu harmoniza fila fali joven sira tanba iha fulan juñu to’o mai semana rua kotuk ba ne’e joven sira mak halo problema involve mos husi estudante sira

“Konvite ami fahe ba eskola iha Postu haat iha sidade Dili, iha Postu Administrativu Cristu Rei sira fo oportunidade ba eskola 5, ESG 12 de Novembro, Escola Secundaria Sagrado Coração de Jesus, ESTV ECC Becora, ESG 5 de Maio no ESG Herois da Patria, ba Postu Administrativu Nain Feto maka ESG Paulo VI, ESG São José Operario no ESG Cafe Taibessi”.

“Ba Postu administrativu Vera Cruz maka ESG 4 de Setembru ho ESG Cristal no ba Postu Administrativu Dom Aleixo ESG An’nur, ESG Externato de São José, ESG Santa Madalena de Canossa, ESG Nicolao Lobato, ESTV EEC São Miguel no ESG São Pedro Comoro”. Nia informa

Domingos informa, sira sei la limita jogador liga ka selesaun nasional tanba jogador sira mai kompete estudante hotu maski eskola balun sei reforsa husi jogador liga no selesaun nasional.

Aban sei dada sorteiu ba joga nian no ba farda nian tanba komisaun organizador sei distribui farda no subsidiu montante 150 USD ba eskola sekundaria 16 hodi mai kompete iha iha “Taça Esperansa 2023” refere

Jogu sei abertura iha loron 30 fulan agostu 2023 no remata tuir data tentative iha loron 30 fulan setembru 2023 tanba total jogu 31.

Nia afirma tan, sira mos agradese ba FFTL autoriza kampu demokrasia ba komisaun organizador utiliza hodi hala’o kompetisaun ne’e lolos sira hakarak utiliza kampu Lecidere maibe MJDAC la autoriza no sira mos sei iha planu nafatin katak kompetisaun sei akontese nafatin iha tinan oin, bele mos hala’o iha kada rejiaun iha Timor-Leste no sira hakarak kolabora hamutuk ho ministériu edukasaun hodi realiza halo diak liu tan iha tinan oin tanba jogu eskolar ba estudante sira.

Sekretariu Jerál SLB ne’e aumenta tan, sira hetan apoiu masimu husi Kompania haat tan ne’e sira sei fo premiu ba manan husi dahuluk to’o dahaat.
“Patrosinador ba “Taça Esperansa 2023” ne’e iha haat mak prinsipal Kompania ETO, Gota, Kafe Timor Oan (KTON) no BRITAS

“Nune’e ami sei fo premiu ba manan dahuluk sei hetan medalla, tasa ida ho orsamentu montante 2000 USD, ba manan daruak sei hetan medalla ho orsamentu montante 1500 USD, manan nain datoluk sei simu medalla ho osan 1000 USD no manan nain dahaat simu osan 500 USD, ekipa sira partsipa sei hetan mos sertifikadu agradesimentu ho partisipante”, tenik Domingos