Imajem : Xefe Suku Wani-Uma Postu Administrativu Uatukarbau Munisipiu Viqueque Gabriel da Silva.
SAPNewsTL, Viqueque — Xefi Suku Wani-Uma Postu Administrativu Uatukarbau Munisipiu Viqueque Gabriel da Silva, informa, komunidade knua Ala-oli uma-kain atus ida resin, to’o ohin loron seidauk asesu ba bee moos no eletrisidade.
Tuir lideransa komutariu Gabriel da Silva hateten, komunidade Suku Wani-Uma iha aldeia rua mak hanesan knua Ala-oli, Boro-Bohae, Osso-Mali, Uatoliloli, Ala-Oli nian, kuaze uma-kain atus ida resin mak seidauk asesu ba liña eletrisidade, ne’ebe fornese husi Eletrisidade de Timor-Leste Empreza Publika (EDTL-EP sigla Portugués).
“Tinan uluk iha xefi suku sesante nia tempu ami tenta halo komfimasaun ho parte EDTL-EP maibé sira responde katak tinan oin mak sei halo instalasaun liña eletrisidade ba uma komunidade, maibe to’o agora ami nia komunidade sira kuaze atus ida resin seidauk asesu ba naroman”. Dehan Xefi suku Wani-Uma Gabriel da Silva, ba Jornalista SAPNews iha nia kna’ar fatin, Sexta (11/10/2024)
Xefi suku ne’e fundamenta, tan hakarak oan sira senti naroman no estuda iha tempu kalan, familia balun iha Aldeia Osomali nian, foti risku obrigadu dada rasik liña eletrisidade ba to’o sira nia rezidensia, maibé fiu ne’ebe komunidade sira utiliza hodi dada eletrisidade liu husi ai leten deit.
“Familia balun iha Aldeia Osomali nian, dada fiu husi ai leten de’it, entaun husi parte Eletrisidade de Timor-Leste Empreza Publika nia ekipa munispiu Viqueque nian, mai monta kontador, ba komunidade nia uma, ita haree fiu ne’ebe komunidade sira dada husi ai leten risku ba sira nia vida, entaun foin lalais ha’u ba fó hatene administrador postu, nia haruka ha’u mai rekoilha dadus komunidade sira nian lori ba iha Postu Administrativu”. Nia informa
Nia salienta, antes ne’e ekipa EDTL-EP tun direita mai iha aldeia Alaoli nian, hodi halo estudu survay ba area ne’e tanba iha projetu dada liña eletrisidade ba komunidade nia uma, maibé to’o ohin loron projetu refere seidauk implementa.
“Iha tinan hirak liu ba kotuk ekipa tékniku EDTL-EP mai halo ona survei iha ami nia area, sira ne’ebe seidauk asesu ba eletrisidade maibé survei ne’ebe sira halo to’o agora komunidade sira sei moris iha nakukun nia laran, komunidade balun sosa rasik painel solar no jenerator hodi uza iha tempu kalan, tamba tinan barak iha area ida ne’e la asesu ba eletrisidade komun ne’ebe EDTL-EP halo instalasaun” Dehan Xefi suku Gabriel.
Nia hatutan, tuir informasaun ne’ebe autoridade lokal simu husi parte relevante informa katak, ekipa tékniku eletrisidade Timor-Leste sei halo instalasaun fazeadamente hahu husi area bahatata, to’o finaliza maka ekipa EDTL-EP sei kontinua hakat mai iha area Alaoli nian, maibé sei iha prosesu nia laran.
“Ami nafatin enkoraja komunidade sira atu kolabora ho autoridade lokal, tamba ami halo ona komfimasaun ho EDTL sira sei halo instalasaun iha area bahatata, iha ne’ebá finaliza mak sei kontinua mai iha ne’e, area ida ne’e falta mós bee-moos ba komunidade durante ne’e”. Nia informa
Entretantu, Komunidade uma-kain atus ida resin ne’ebe seidauk asesu ba bee moos no liña eletrisidade hola parte iha Aldeia Alaoli Suku Wani-Uma Postu Administrativu Uatu-karbau Munisipiu Viqueque.
Hafoin notísia ne’e tun, SAPNews seidauk halo komfirmasaun ho parte EDTL,E.P ligadu ho preokupasaun komunidade Alaoli, Munisípiu Viqueque.
Jornalista : Guilherminho Ramos da Cruz