Imajem : AJTL hamutuk ho parseiru sira lansa média senter iha Farol, 25/06/2025
SAPNewsTL, Dili : Assosiasaun Jornalista Timor Lorosa‘e (AJTL) servisu hamutuk ho parseiru dezenvolvimentu sira, ofisialmente lansa sentru média hodi reforsa servisu advokasia média nian ne’ebe foku ba programa produtividade foinsa’e iha setor produtivu
Ekipa Kobertura – SAPNewsTL
Presidente AJTL Zevonia Viera hateten, AJTL hamutuk ho parseiru sira realiza serimonia lansamentu sentru média ho objetivu atu promove foinsa’e sira iha setór produtivu.
Nune’e labele dependensia ba fundu petroliferu, tanba kazu Bayundang sai preokupasaun bo’ot ba nasaun Timor-Leste iha futuru.
“AJTL kontinua foti papel halo advokasia ho parseiru sira ne’ebé durante ne’e halo nia atividade ba setór produtivu hodi dezenvolve ekonomia iha Timor-Leste di’ak liu husi setór produtivu sira, tanba atividade ne’ebé mak produtivu tebes atu dezenvolve ekonomia rai laran liu husi kriatividade foinsa’e iha setor produtivu,” Dehan Prezidente AJTL, Zevonia Vieira, iha Fundasaun Haburas, Kuarta (25/06/2025)
Lideransa AJTL ne’e fundamenta, programa lansamentu sentru média ne’e, sai nu’udar fatin no mahon ba jornalista sira no ba parseiru hotu hodi kontinua atividade liuhusi parseiru sira ne’ebe durante ne’e kolabora ho AJTL hodi tulun foinsa’e sira iha atividade produtivu.
Iha fatin hanesan, Diretór Mata Dalan Institute (MDI), Estevanos Coli, haktuir MDI hola parte iha atividade husi AJTL sira ne’ebé divulga informasaun kona-ba prosesu dezenvolvimentu iha Timor-Leste.
“Ami hola parte iha atividade sira ne’ebé mak sei halo parseiru ho kolega jornalista sira liuliu membru AJTL sira, nune’e bele halo divulgasaun ba informasaun sira ne’ebé mak relasiona ho prosesu dezenvolvimentu iha rai laran, iha atividade sira ne’ebé mak ita sei halo iha relasaun barak ho diversifikasaun ekonomia no promove joven ka foinsa’e sira ne’ebé mak iha abilidade no kuñesimentu atu halo produsaun”.Dehan Diretor MDI
Jestor Mata Dalan Institute ne’e akresenta, produsaun sira ne’e atu ajuda sidadaun no komunidade sira iha reziliensia ba moris entermos ekonómikamente ba ai-han ne’ebé sufisiente ba sira atu bele moris (sobrevive) ba situasaun sira ne’ebé difisil.
Koordenador projetu Hakfoun husi Alumni Parlamentu Foinsa’e Timor-Leste (APFTL), Domingos Belo de Jesus, hatete, projetu Hakfoun atu hametin relasaun husi grupu foinsa’e sira no membru governu sira, nune’e APFTL aproveita halo advokasia ba polítika sira husi públiku sira hodi kria servisu no apoiu sira iha emprendedorizmu.
“Husi projetu Hakfoun, APFTL aproveita atu hametin grupu foinsa’e produtivu sira no membru governu sira, iha projetu Hakfoun APFTL hakarak aproveita opurtunidade ida ne’e atu halo advokasia ba polítika públika sira ne’ebé bele fo ba Juventude sira hodi bele kria servisu ba komunidade no mós bele fo apoiu ba emprendedorizmu”.
Kordenador Projeitu Hakfoun APFTL realsa, Projetu Hakfoun iha atividade tolu (3) maibé atividade la’o ona mak kapasitasaun ba grupu koligasaun agrikultura ne’ebé hala’o iha munisípiu Ermera no RAEOA, atu grupu agrikultura bele halo intervensaun ba siklu Orsamentu Jerál Estadu (#OGE).
“Ami nia atividade rua (2) sei hala’o iha loron 26-27 fulan Juñu tinan 2025 iha fundasaun oriente no konvida grupu sira husi munisípiu 12 inklui RAEOA, atu partisipa iha atividade refere”
Entertantu, partisipa iha lansamentu media senter ne’e maka parseiru Dezenvolvimentu husi #AJTL nian mak #OXFAM iha Timor-Leste, Timor-Leste Organiku Fertiliser (#TILOFE) Mata Dalan Institute (#MDI) Alumni Parlamentu Foinsa’e Timor-Leste (#APFTL) Ai- Kulat Mutin Organiku (#EAMO) no Forum Juventude Defisiensia Ermera (#FJDE).