SAPNewsTL, Dili: Organizasaun Arte Marsial Persaudaraan Setia Hati Terate (PSHT) sei fo graduasaun ba membru nain 10.161 iha loron 7 to’o 15 fulan agostu 2023 husi treinador sira ne’ebé delega husi Indonesia hamutuk nain-136.
“Lista ba Membru PSHT atu gradua iha 2023, komisaun organizador aprezenta mai iha KRAM hamutuk nain-10.161, Nune’e ami husi KRAM apela mos ba organizasaun arte marsial ho ritual (AM & AR) sira seluk hodi fo kontribuisaun ba graduasaun PSHT tinan ne’e liuliu paz no estabilidade tanba ita nia nasaun ne’e presiza hakmatek”, dehan Prezidente KRAM Octavio da Conceição ba jornalista sira iha nia knaar fatin Lecidere, Dili sabadu (05/08/2023).
Prezidente hatutan, sira hakarak anunsiu ba públiku katak PSHT sei fo graduasaun ba membru sira iha loron 7 to’o 15 fulan agostu 2022 tanba rezultadu reuniaun KRAM hamutuk ho estrutura PSHT ho komisaun organizador ho fundador sira, tuir konkordansia iha reuniaun komisaun organizador ba graduasaun sei lidera husi Prezidente Komissaun maka Fabião Oliveira ho vise João dos Santos la iha tan komisaun organizador seluk ona
Sira husu mos ba parte hotu liuliu ba internal organizasaun PSHT, ba treinador sira prepara ona membru sira ba graduasaun submete lista membru sira ba komisaun organizador hodi hetan legalidade nivel organizasaun nian.
Nia husu mos ba komisaun organizador atu hatama lista ba treinador sira husi Indonesia atu fo graduasaun ba membru sira tanba aumenta nain-15 aprezenta husi vise prezidente komisaun organizador João dos Santos maibe daudaun ne’e KRAM seidauk simu lista inklui pasaporte ba treinador nain-15 refere
Tan ne’e husu ba vise prezidente komisaun João dos Santos atu submete lista nain-15 hodi kompleta treinador sira husi Indonesia hamutuk nain-136 mai Timor-Leste fo graduasaun ba membru sira durante semana ida iha munispiu 12 ho RAEOA.
Octavio afirma tan, bainhira lista nain-15 la submete mai KRAM depois la entrega ba komandu PNTL to’o loron 7 fulan agostu 2023 iha oras 14:00 loraik sei la iha kuñesementu atu sira fo graduasaun no sei iha medida seluk hodi fo informasaun ba sira tanba ema hotu hakru’uk ba lei iha Timor-Leste.
Reportajen: Augusto dos Santos