Imajem : Koordenadór Komisaun Ezekutiva Zona Ekonomia Espesiál Dezenvolvimentu Oé-Cusse-Ambeno (ZEEDOA), João Mendes Gonçalves, iha palásiu governu, 05/08/2024. Foto : Juvita Guterres
SAPNewsTL, Díli – Primeiru Ministru (PM) Kayrala Xanana Gusmão enkontru ho Koordenadór Komisaun Ezekutiva Zona Ekonomia Espesiál Dezenvolvimentu Oé-Cusse-Ambeno (KKE-ZEEDOA), João Mendes Gonçalves hodi hato’o relatóriu relasiona ho mandatu ne’ebe nia hetan husi konsellu ministru.
Koordenadór Komisaun Ezekutiva Zona Ekonomia Espesiál Dezenvolvimentu Oé-Cusse-Ambeno (ZEEDOA), João Mendes Gonçalves hateten nia hetan mandatu husi konsellu ministru hodi prepara estabelesimentu zona ekonomika espesial desenvolvimentu Oe-cusse Ambeno.
“Ohin hasoru Sua Eselensia Primeiru Ministru hodi hato’o relatorio kona-ba ami nia progresu servisu, tanba ha’u hetan mandatu husi konseillu ministru atu prepara estabilesimentu zona ekonomika espesial desenvolvimentu Oe-cusse Ambeno”. Dehan ZEEDOA, João Mendes Gonçalves ba jornalista sira hafoin enkontru ho PM iha palásiu governu, 05/08/2024.
Koordenador Komisaun ne’e salienta, sira hala’o ona servisu no entrega ona dokumentus balun ba PM, nune’e ohin hala’o sorumutu ho PM tanba presiza orientasaun no desizaun politika husi konsellu ministru liliu Primeiru Ministru.
“Servisu la’o dadaun no ohin ha’u mai konsulta ho PM tamba foin dadauk entrega ona dokumentus balun, ami presiza orientasaun no desizaun politika husi konsellu ministru liu-liu husi Primeiru Ministru ne’ebe nomeia ami iha Primeiru Ministru nia tutela”.
Koordenador Komisaun ne’e mos hateten, Atu prepara planu estratejia desenvolvimentu Oe-cusse Ambeno ba tinan lima to’o tinan 2030, tenke prepara projesaun orsamental hodi implementa iha sira nia planu, no identifika prioridade saida mak atu halo durante mandatu.
“Atu prepara planu estratejia desenvolvimentu Oe-cusse ambeno ba tinan lima to’o tinan 2030, ami tenke prepara mos projesaun orsamental ba implementasaun planu, no idetifika prioridade saida mak atu halo durante ami nia mandatu, prepara osamentu ba programa sira ne’ebe atu implementa kada tinan ida ne’e mak servisu, ami tenki prepara mos enkuadramentu legal ne’ebe mak sei hari’i entidade jurídika ne’ebe sei lidera Zona Ekonomia Espesiál Dezenvolvimentu Oé-Cusse-Ambeno (ZEEDOA) iha tinan lima nia laran”.
João Mendes Gonçalves akresenta, sorumutu refere hato’o relatóriu ba PM kona-ba sira nia progresu, planu orsamentu tinan oin, tanba dadaun ne’e ZEEDOA seidauk iha osamentu rasik.
“Ohin ha’u mai hato’o relatóriu ba PM kona-ba progresu servisu no ami ko’alia mos kona-ba orsamentu tinan oin tamba dadaun ne’e ZEEDOA seidauk iha osamentu rasik, nune’e hare ba oin oinsa bele hetan osamentu hodi implementa programa ne’ebe maka ami sei idetifika iha tinan ida nia laran”.
Jornalista : Juvita Guterres