SAPNewsTL, Dili: Federasaun Boxe Amadora Timor-Leste (FBATL) halo relatoriu ba konfederasaun Desportu Timor-Leste (sigla portuges CDTL) liu husi rezultadu avaliasaun katak boxista Timor-Leste nain haat labele kompete Asian Games 2023 iha Hangzhou, China tanba inkapasidade husi Komite Nasional Olimpiku Timor-Leste sigla portuges (CONTL).
“Ami hakarak klarifika ba publiku katak boxista nain haat la kompete Asian Games 2023 iha Hangzho, ami la priense kriteria tanba ami la rona informasaun klaru technical meeting nian husi CONTL hodi nune’e ami to’o China tarde hodi la tuir technical meeting rejista boxista sira naran, ne’e duni boxista sira la tuir jogu no medical record ami lori hela, antes doutor husi CDTL halo teste ba boxista nain haat iha Timor-Leste laos tanba problema iha rekezitu CONTL fo sai publiku antes ne’e”, dehan prezidente FBATL Januario Brites ba jornalista sira liu husi aprezenta relatoriu ba CDTL iha edifisiu CDTL Caicoli, Dili segunda (16/10/2023).
Prezidente hatutan, kona ba orariu jogu modalidade boxing sira hetan husi CONTL ne’e sira so hatene aranka iha loron 21 fulan setembru 2023 ba Bali depois loron 22 fulan setembru 2023 aranka husi Bali ba Singapura to’o China maibe iha loron 22 fulan setembru 2023 komisaun organizador Asian Games halo ona technical meeting ba modalidade boxing iha Hangzhou, China.
Tuir lolos technical meeting sira hatene iha loron 23 fulan setembru 2023 maibe iha mudansa mai fali loron 22 fulan setembru 2023 hodi nune’e ami to’o tarde, sira la hetan informasaun ba mudansa orariu technical meeting tanba halo viajen hela la hetan informasaun husi CONTL ba ida ne’e.
Iha sorin seluk, liu husi avaliasaun sekretariu jeral FBATL Rogerio Amaral relata tan, iha modalidade boxing technical meeting mak check atleta sira nia kondisaun no presiza mos tenki asina formulariu balun bolu responsabilidade klube nune’e la tuir technical meeting boxista la kompete Asian Games laos tanba la priense kriteria la hatama medical record nian.
“Iha modalidade boxing iha technical meeting presiza mos tenki asina formulariu balun ita bolu responsabilidade klube para atu nune’e boxista hetan tuku makaas labele kontinua jogu treinador ami bele soe toalla ba rin laran ka boxista hetan sansaun arbitrajen hapara nia iha rin, dokumentu sira ne’e presiza asina husi ofisial ka treinador laos boxista la priense kriteria la hatama medical record, boxing ne’e tuir technical meeting mak bele check atleta sira nia kondisaun”, tenik Rogerio
Rogerio informa tan, iha aprezentasaun relatoriu saúde ba organizasaun boxing internasional ne’e boxista sira foin fila husi kompete Sea Games 2023 iha Cambodia seidauk to’o fulan para aprezenta medical record ba organizasaun boxing internasional no medical record boxista sira lori hela bainhira tuir technical meeting mak foin bele aprezenta maibe sira tarde la tuir technical meeting hodi nune’e atleta sira labele kompete Asian Games 2023 iha Hangzhou, China.
Portantu, antes ne’e Vise Prezidente CONTL Mateus da Cruz, esklarese ba públiku katak boxista la joga ne’e la’as tanba CONTL mak sala, maibe tanba sira laiha relatóriu administrasaun ba Federasaun Boxing Internasional, FBATL laiha record ida para hato’o ba Federasaun Boxing internasionál no uluk Timor-Leste sempre hetan toleransia, no CONTL rasik sempre fo hatene antes ba kada Federasaun, maibe sira ladun tau atensaun.
Mateus afirma tan, sira-nia problema ne’e tanba laiha record mediku nian no laiha tan kona-ba anti dopazen nian, no iha mos problema sira kona-ba dokumentu administrativu balun FBATL tenke kompleta mais dokumentu sira ne’e tahan ida deit mos iha federasaun internasionál laiha.
“FBATL mak tenke responsabiliza no CONTL nia responsabilidade mak rejista sira ba sistema para mai joga agora kona-ba uma laran ne’e sira tenke rezolve ho federasaun internasionál la’ós CONTL no bainhira federasaun internasionál ho IFC mai husu sira nia dokumentu tahan ida mós laiha” nia subliña
Nia esklarese tan katak boxista Timoroan sira la joga laos tanba tarde, maibe sira mak la prienxe rekizitu sira federasaun internasionál iha no CONTL iha ne’e para atu rejista sira no sira mai atu joga de’it laos atu tuir tan technical meeting.
Entretantu iha avaliasaun entre Federasaun desportiva sanulu lori atleta kompete Asian Games 2023 iha Hangzhou, China ho CDTL, federasaun boxe ho tiru mak hetan problema to’o China tarde la tuir technical meeting atleta labele kompete jogu iha Asian Games.
Federasaun sira lori atleta kompete maibe la hatudu prestasaun diak, federasaun sanulu lori atleta kompete Asian Games 2023 mak federasaun boxe, tiru, taekwondo, karate-do, tennis kampu, badminton, natasaun, atletizmu, voleibol no halterifilizmu.
Reportajen: Augusto dos Santos