Imajem Omilia Pe. Tiago Soares da Costa, Iha Igreja Luro, 02/04/2023
SAPNewsTL, Lautem: Padre Pároku Nossa Senhora Rainha dos Apóstolos de Luro Pe. Tiago Soares da Costa hateten sarani sira tenke prepara an hodi selebra kristu Jesus nia terus mate no moris hias tanba ida ne’e mak nu’udar sentru fiar nian ba sarani katóliku.
Hafoin missa ba domingu ramus, iha intrevista ho Amu Pároku Luro hateten feriadu ba semana santa ne’e la’os atu la’o pasiar maibe atu hamutuk hodi prepara an hodi selebra Na’I Jesus Kristu nia misteriu terus mate no moris hias
“Ba sarani sira, na’i ulun sira, eskola sira atu prepara an selebra kristu nia misteriu terus mate no moris hias atu nune’e ita nu’udar ema sarani katólika hatene duni ita ninia sentru husi fiar sarani nian mak festa paskoa iha tridium paskal to’o ba domingu resureisaun ida ne’e mak dehan katóliku”. Dehan Amo Pároku Nossa Senhora Rainha dos Apóstolos de Luro Pe. Tiago Soares da Costa ba jornalista SAPNewsTL hafoin missa Domingu Ramus iha Parokia Luro, 2/04/2023.
Padre Paroku Luro ne’e hatutan sarani sira tenke prepara no obrigatoriu hodi partisipa iha festa paskoa atu nune’e bele hatudu nafatin ninia fiar nu’udar ema katoliku no hametin no haklean nafatin fiar ba maromak atu espiritu maromak bele inspira hodi la’o tuir nia dalan.
“Se ita katoliku mas ita la partisipa hodi partisipa ida ne’e, ita ibun katoliku maibe ita nia moris ne’e la’os katoliku, ne’e sarani sira nia obrigasaun, tenke prepara no partisipa”. Nia informa
Nia mos husu ba sarani sira atu haree ba fatin sira ne’ebe iha missa hodi partisipa iha semana santa ne’e hodi festeja loron fiar sarani katoliku nian ida ne’e.
“Husu atu sarani sira hotu atu prepara an hodi partisipa iha missa sira ne’ebe iha fatin fatin sira atu bele prepara hodi festeza ita ninia loron fiar sarani katoliku nian ne’ebe sai hanesan pontu kulminasaun ba fiar katolika iha ne’ebe maromak oan halo sakramentu eukarisitia hodi haruka eskolante sira atu halo no fo an ba mate iha kruz atu bele soi ita ema sira depois moris hias lori ita ba salvasaun”.hatete nia
Entretantu, Padre ne’e mos apela nafatin ba povu tomak no na’i ulun sira atu hamamuk an atu espiritu santu ba inpira sira ho matenek leten aas nian hodi halo sira nafatin sarani katoliku ne’ebe nafatin iha fiar ida de’it ba maromak hodi moris tuir de’it espiritu maromak nian ne’ebe haruka nu’udar ema sarani.
Jornalista: Luis Pailofo