Liu Tiha Fulan 6, Estudante Seidauk Uza Kadeira & Meza Iha Eskola EBC Luro
Imajem : Estudante Ensinu Báziku Sentral Luro 1⁰ no 2⁰ siklu la uza kadeira no meza ba prosesu ensinu aprendijajem, iha postu administrativu Luro, munisípiu Lautém, 21/06/2024. Foto : Ermelinda Soares
SAPNewsTL, Lautém : Estudante 1⁰ no 2⁰ siklu husi Ensinu Baziku Sentral Luro (EBC Luro sigla Portugues) hetan tan edifísiu foun unidade ida maibe to’o oras ne’e seidauk tur iha kadeira no uza meza hodi tuir prosesu ensinu aprendizajen tanba ministériu edukasaun la fo atensaun durante fulan neen (6) maske simu ona pedidu hosi eskola refere.
Edukasaun mak prosesu ida ne’ebé ema aprende koñesimentu, abilidade, no valor sira liu husi ajuda ema dezenvolve sira-nia kapasidade inteletuál, físiku, no moral, iha ne’ebé ho objetivu atu prepara ema bele moris di’ak iha sosiedade, hetan servisu, no kontribui ba sira-nia komunidade. Edukasaun atu ajuda dezenvolve pensamentu krítiku, kreatividade, no abilidade rezolve problema iha presente no futuru.
Infraestrutura ba dezenvolvimentu edukasaun iha area rural importante tebes tanba bele fasilita foinsa’e sira aprende ho diak no konfortavel, iha ne’ebe fo oportunidade di’ak liu ba labarik sira-nia futuru, ajuda adolesente sira komprende mundu, promove dezenvolvimentu nasionál, redús pobreza no desigualdade iha futuru.
Ligadu ho problema laiha kadeira no meza ba foinsa’e sira, Diretor Ensinu Baziku Sentral Luro Filipe Soares informa edifisiu foun unidade ida halo ona maibe seidauk kompleta fasilidade sira, nune’e to’o agora estudante sira sei tur deit iha azuleju hodi tuir aula.
“Kona-ba 1⁰ no 2⁰ Siklu Ensinu Baziku Sentral Luro ninian ne’e atu informa katak kondisaun ne’e la favorese ba labarik sira, edifisiu halo ona maibe kadeira no meza laiha, estudante sira tur deit iha azuleju tuir aula, ida ne’e nia impaktu ne’e orsida bele moras no difikulta tebes ba prosesu ensinu aprendizajen nian”. Katak Diretor EBC Luro Filipe Soares ba jornalista SAPNews iha nia knaar fatin Luro, 21/06/2024
Filipe hatutan, bazeia ba falta meza no kadeira, “Ami hato’o pedidu no proposta mobiliáriu nian ba diresaun munisipal no nasional, proposta hirak ne’e dala barak ko’alia fila fila ona, haruka beibeik ba parte kompetente maibe seidauk atende to’o agora”.
Imajem : Estudante Ensinu Báziku Sentral Luro 1⁰ no 2⁰ siklu la uza kadeira no meza ba prosesu ensinu aprendijajem, iha postu administrativu Luro, munisípiu Lautém, 21/06/2024. Foto : Ermelinda Soares
Diretor eskola ne’e dehan kondisaun la favoravel ba estudante sira, manorin sira labele garante estudante nia kualidade konsentrasaun durante hanorin, tanba ne’e husu ba Ministériu Edukasaun atu oferese fasilidade sira hanesan kadeira no meza, nune’e bele uza hodi tuir ensinu aprendizajen.
“Ita-nia esperansa mak eskola atu sai kualidade maibe kuandu kondisaun la favorese, ita bele ko’alia maibe kualidade ne’e mosu liu husi ne’ebe ? Ha’u nu’udar diretor eskola situasaun ida ne’e presiza duni mobiliáriu, husu ministériu edukasaun hodi ajuda kadeira no meza, atu estudante sira bele tur partisipa ensinu aprendizajen ho diak no seguru”. Tenik Diretor
Diretor Filipe hateten kondisaun la favoravel ba estudante sira labele garante nia kualidade tanba ne’e husu atu oferese fasilidade sira hanesan kadeira atu bele tur hodi tuir ensinu aprendizajen.
Iha sorin seluk, Diretor Servisu Edukasaun Munisípiu Lautém Anibal Fernandes haktuir nia parte rekunhese preokupasaun ne’e no hato’o ona pedidu ba nasional, nune’e meza no kadeira ne’e sei prosesa, maske seidauk fo resposta pozitivu maibe hein katak Ministériu Edukasaun bele responde nesesidade refere ho urjente.
“Problema laiha kadeira no meza iha Ensinu Baziku Sentral Luro 1⁰ no 2⁰ Siklu, ita hato’o ona pedidu ba nasional maibe sei iha prosesu laran, ita hein atu responde nesesidade urjente ne’ebe estudante sira hasoru liliu ita-nia estudante falta meza no kadeira, ita bele kompleta, ita husu hodi bele responde ida ne’e”. Anibal hato’o
Entretantu, Ensinu Báziku Sentral Luro hetan edifisiu foun unidade ida iha tinan 2023 maibe to’o agora seidauk hetan kadeira no meza ba edifisiu foun refere, to’o ohin loron estudante sira sei tur deit iha azuleju hodi tuir prosesu ensinu aprendizajen.
Jornalista : Ermelinda Soares