Saudoza Isabel Hatudu Ezemplu ! Ispíritu Luta Ba Justisa & Solidariedade Labele Hamate

SAPNewsTL, Dili – Familia Jeneral Taur Matan Ruak hamutuk ho entidade oioin realiza misa ba Saudoza Isabel da Costa Ferreira nia falesimentu tinan ida iha Igreja Parokia Imaculada Conceição Balide Dili.

Durante Misa, Padre Ângelo Salsinho deklara tempu no espasu ne’ebe humanidade hotu hetan ne’e Aman Maromak nian, nune’e Jesus Kristu dehan ba ema hotu hodi labele laran susar maibe tau fiar iha Maromak tanba Maromak hun no rohan, moris nia na’in no kbiit tomak na’in.

“Espasu no tempu ne’e Maromak nian, Jesus dehan, ‘keta laran susar, imi fiar iha ha’u no Maromak, iha ha’u aman nia uman iha horik fatin barak, lae karik, ha’u la dehan ba imi’.” Tenik Padre Selebrante Ângelo Salsinho liu husi omilia iha Igreja Balide, 18/06/2024

Padre Selebrante ne’e konsidera familia lakon tebes inan domin na’in ne’ebe sempre hatudu ninia simplesidade iha dedikasaun, haraik an no servi povu Timor-Leste, wainhira Saudoza Isabel Ferreira sei moris, nia sempre hatudu ezemplu ba foinsa’e Timor oan sira.

Padre Ângelo Salsinho fo agradese ba Eis Presidente Repúblika Taur Matan Ruak tanba bele hetan kaben santa iha nia moris ne’ebe nunka hirus, Isabel Ferreira sai ezemplu no figura ba komunidade sira.

“Agradese ba Maun Taur ne’ebe hetan feto ida, kaben ida ne’ebé santa iha nia moris, agradese ba oan sira hetan inan ida ne’ebé santa sai hanesan ezemplu no figura, inan ida sai modelu ne’ebé nunka hirus iha nia vida familia liu-liu iha komunidade”.

Padre ne’e mos fo sasin katak Saudoza Isabel Ferreira sempre luta ba justisa sosial no hatudu solidariedade ba sosiedade Timor-Leste.

“Agradese ba sira ne’ebé hamutuk ho nia luta ba justisa komun no solidariedade,  kiak sira, faluk no difisiente sira, nia hatudu ona ispíritu ida ne’e, ita labele hamate prinsipiu ida ne’e kontinua nafatin, espiritu ida ne’e ba libertasaun no ksolok, tanba espiritu ida ne’e mai husi fuan no domin ne’ebé klean”. Ângelo Salsinho hateten

Saudoza Isabel da Costa Ferreira Moris iha looron 15 Fulan Abril tinan 1974 no hakotu iis iha loron 18 Fulan Junhu Tinan 2023 tanba sofre moras.

“Kuandu ita sei moris, ita moris ba Na’i Maromak, Wainhira ita mate mos, ita mate ba Na’i. Nune’e atu ita mris ka mate, ita nafatin Na’i Maromak nian”. (Romanus, 14:8)

Enkuantu, hafoin misa familia hamutuk ho konvidadu sira kontinua ba kari aifunan ih semiteriu becusse Dili, partisipa iha serimonia kari ai-funan maka hanesan Primieru Ministru Interinu Mariano Assanami Sabino, Eis Primeiru Ministru Mari Bin Amude Alkatiri, Presidente Tribunal Rekursu, Jenerel Lere Anan Timur, membru governu sira, membru Parlamentu Nasional, Padre no Madre sira, konvidadu no familia sira.

Jornalista : Jonh Marito