Imajem : Ministru Interior Francisco da Costa iha Igreja Katedral Dili,26/08/2024.
SAPNews TL, Dìli – Delegasaun Vatinakanu konsidera Forsa Tarefa Konjunta husi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) preparadu simu vizita Papa Francisco no hili ona Timoroan ida hodi sai ajudante ba Santu Padre durante iha Timor-Leste.
Ministru Interiór, Francisco da Costa haktuir, delegasaun Vatikanu apresia preparasaun parte seguransa Timor-Leste ba simu vizita Papa iha fulan Setembru.
“Ekipa avansadu husi Vatikanu hasoru ona ami, iha diskusaun ne’ebé kapas tebes, sira apresia ita-nia aprezentasaun ba seguransa ba Papa nia vizita, sira kontente no prontu servisu hamutuk ho ita durante vizita Amu Papa iha Timor-Leste,” Dehan Ministru Interior Francisco da Costa ba jornalista, iha igreja katedral, 26/08/2024.
Francisco hatutan, delagasaun Vatikanu husu ba Ministeriu Interiór atu fó seguransa másimu durante Amo Papa nia vizita iha Timor-Leste iha loron tolu nia laran hahu iha 09 to’o 11 Setembru.
“Ami akompaña delegasaun Vatikanu mai halo inspesaun iha ne’ tanba fatin ida ne’e mós, nu’udar fatin ida ba vizita Amu Papa nian no ohin sira husu atu fó seguransa másimu ba fatin sira ne’ebé Amu Papa sei halo nia vizita ba”, dehan nia.
Governante ne’e fundamenta, Ministru Interiór seidauk simu lista lolos ema na’in hira mak atu partisipa serimonia misa Papa nia iha Tasi-Tolu, maibé autoridade forsa Tarefa Konjunta preparadu hodi fo seguransa durante vizita.
“Ita la haree ba ema na’in hira, maibé atu hateten katak seguransa ne’e preparadu atu hasoru eventu ida ne’e”.
Ministru Interiór, informa, Vatikanu deside ona hili timoroan ida sai ajudante ba Papa Francisco durante nia vizita iha Timor-Leste.
“Vatikanu rasik mak husu ita atu oferese ita-nia ema ida sai ajudante ba Papa Francisco vizita iha Timor-Leste no ami deside ona ita-nia timoroan ida ne’ebé atu sai ajudante Papa Francisco hodi akompaña Papa durante nia vizita iha Timor-Leste,”
Nia dehan, ajudante ne’e nia servisu atu akompaña de’it Amo Papa nia vizita durante mai iha Timor-Leste sei hamrik kedas iha Amu Papa bainhira vizita fo bensa ba Timoroan iha fatin ne’ebé sei vizita ba.
“Ha’u lakohi koalia sai ema ne’e nia identidade katak, nia ne’e husi institusaun polísia ka militár, maibé ha’u atu hateten de’it katak nia sidadaun timoroan ne’ebé iha intelijente, kapasidade ho abilidade, no priense hodi halo funsaun hanesan ajudante,” deklara nia.
Timor-Leste tenke orgullu tanba marka iha istória katak Vatikanu hili sidadaun Timoroan ida hodi sai hanesan ajudante ba Papa durante nia vizita iha Timor-Leste.
“Ita tenke orgullu tanba Vatikanu hili ita nia ema sai ajudante ba Amo Papa durante nia vizita iha Timor-Leste, buat sira ne’e akontese tanba sira haree ita-nia seguransa lao di’ak tebes, tanba ne’e mak sira mak husu, se bele Timor-Leste oferese nia sidadaun sai Ajudante ba Amo Papa durante nia vizita mai Timor-Leste,” Hateten Francisco.
Ministru sublinha, “Sai ajudante laos buat fasil, liu husi prosesu barak, lingua tenke hatene, aspeitu tátiku no inklui buat balun espesifiku nia tenke domina no sidadaun timoroan ne’e priense buat hirak ne’e”.
Governante ne’e husu sidadaun hotu hodi agradese Vatikanu tanba bele hili Timoroan ida sai nia ajudante durante vizita.
“Ita hotu tenke agradese tanba ita nia sidadaun ida bele sai ajudante ba Amu Papa, hamutuk ho seguransa Papa sira seluk hodi fó asistensia ba Amo Papa durante nia vizita mai iha ita-nia rai,” nia hakotu.
Enkuantu, Papa Francisco sei to’o Timor-Leste iha loron 9 to’o 11 Fulan Setembru tinan 2024, Fatin hirak ne’ebe Papa Francisco sei vizita mak Palásiu Prezidensial, Orfanatu Alma, Centro Convenções Dili (CCD), Tasi-Tolu, Igreza Katedral no Sekretariadu Vatikanu Iha Motael.
Jornalista : Dircia Baptista Belo