Sekretariu Estadu Juventude Desportu (SEJD) Abrão Saldanha
DILI-Sekretariu Estadu Juventude Desportu (SEJD) prontu nafatin apoiu finanseiru ba realizasaun Liga Timorense Epoka 2022-2023 tanba orsamentu ba liga epoka ne’e governu aprova ona.
“Ita nia Liga Timorense epoka 2022-2023 bainhira mak atu la’o ami iha ona orsamentu ne’ebe aprova ona hodi apoiu maibe depende ba FFTL ho orgaun LFTL ko’alia para organiza liga futebol iha tinan ne’e ona tanba hela deit fulan rua tinan 2022 remata tama fali ba tinan 2023”, SEJD Abrão Saldanha ba jornalista sira iha salaun Lalini Lariguto Caicoli, Díli sesta (20/10).
Sekretariu Estadu ne’e hatutan, sira rona ona katak FFTL ho orgaun LFTL hahu reuniaun ona atu hala’o liga maibe sira seidauk simu proposta ruma husi FFTL ho orgaun LFTL atu hala’o liga ne’e iha tinan 2022 ne’ebe hein deit prosesu ida ne’e.
Abrão informa, semana kotuk sira enkontru infoma ona ba federasaun aprezenta mai fali katak Liga ne’e bele realiza ka lae tanba orsamentu ezekusaun hela deit fulan rua tama ba tinan 2023 entaun FFTL hatama pedidu antes para sira aloka orsamentu para FFTL organiza Liga Futebol ne’e ona.
Antes ne’e SEJD deklara ona apoiu finanseiru ba Liga Timorense Epoka 2022-2023 ho orsamentu montante 200,000 USD ne’ebe agora sira hein deit parte FFTL ho orgaun LFTL tuur hamutuk ona para realiza Liga Timorense ne’e ona.
Enkuantu, Liga Futebol Timor Leste mos submete ona proposta ba ba SEJD iha loron hirak ba kotuk, portantu, tuir planu Liga Timorense epoka 2022-2023 sei realiza iha fulan dezembru
Jornalista : Augusto dos Santos
Editor : Ekipa Editorial