Imajem : SEKOMS Espedito Dias Ximenes no Eis Primeiru Ministru Marí Bin Amude Alkatiri iha Salaun ISC Balide,26/02/2025. Foto : Sejar Tutuhafa
SAPNewsTL, Díli – Media Sa’ani Asamana Prazer News (SAPNews) selebra aniversariu ba dala tolu ho tema renova komprimisiu, ser independente e SAPNews profisional, secretario estado comunicação sosial (SECOMS), Espetido loro Dias husu jornalista tenke servisu ho neutralidade no imparsialidade.
Sekretariu Estadu Komunikasaun Sosiál Espedito Dias Ximenes sente haksolok tanba presensa iha aniversariu media SAPNews ba dala tolu (3), husu dirijente no jornalista SAPNews hodi servisu ho natural no imparsial.
“Ha’u sente haksolok tanba Media SAPNews ne’ebe kria husi jovem universitariu sira iha area jornalismu, ohin ha’u mai ne’e fo palestra iha aniversariu ne’e, sente haksolok tanba bele partisipa aniversariu media SAPNews nian, ha’u hein aniversariu ba dala tolu ne’e nafatin kaer metin etika jornalismu no nafatin kumpri lei komunikasaun sosial hodi servisu ho imparsialidade no neutral” Dehan Sekretariu Estadu Komunikasaun Sosiál, Espetido Dias Ximenes ba jornalista sira, Quarta-feira (26/02/2025).
SECOMS husu jornalista media SAPNews atu servisu tuir prinsipiu jornalizmu nian tanba bainhira la hare ba imparsialidade, neutralidade sei hetan intervensaun husi públiku.
“Ha’u husu jornalista husi SAPNews atu nafatin servisu ho imparsialidade, neutralidade no la’o tuir prinsipiu jerais jornalismu nian ne’ebe mak la interven husi publiku, no husu atu nafatin respeita prinsipiu sira seluk ne’ebe mak ita bolu retifikasaun no direitu de resposta”. Nia informa
Nia haktuir bainhira produtu jornalista afeta ba privasidade ema nian tenke halo retifikasaun, nune’e jornalista nafatin sai imparsial.
“Ha’u sempre dehan jornalista mos laos anju, dala ruma halo sala maibe tenke iha prinsipiu katak bainhira ita halo sala tenke retifika ka hadia, bainhira produtu jornalitiku ne’e afeta ba privasidade ema nian, direitu resposta ita tenke atende”. Nia husu
Sekretariu estadu komunikasaun sosial husu ba media juvenil SAPNews atu nafatin respeita no tuir kodiku etika jornalismu no publika informasaun ne’ebe mak saudável.
“Ha’u hein katak partisipasaun husi jovem sira nian bele lori informasaun ne’ebe mak saudável nafatin respeita kode étika jornalismu nian”. Nia espera
Iha fatin hanesan, presidente Media SAPNews Clementino Bragança Machado haktuir aniversariu media nian ba dala tolu (3) ne’e sira foka liu ba tema Renova kompromisso, ser independente e SAPNews profissional.
“Tinan ida ne’e, ita mai ho tema sentral renova kompromisso, ser independente e SAPNews profissional, tema ida ne’e importante tebes mai ami tanba hetan resumu badak husi sekretariu estadu komunikasaun no doutor Mari Alkatiri sai orador prinsipal liga ho ita nia ezistensia hodi ko’alia kona-ba ba papel Media iha libertasaun povu entre dejafiu ameansa no oportunidade”. Nia informa
Prezidente Konsellu Imprensa, Otelio Ote parabeniza no apresia ba Mídia SAPNews tanba bele hamrik metin no selebra ezisténsia ba dala tolu.
“Dahuluk ha’u fo parabens ba SAPNews, tanba hamrik metin no halo tinan tolu, baibain mídia ida hari’i hahú teste fulan tolu, bainhira fulan tolu ne’e nia publika notísia lorloron, entaun nia hakat liu dejafiu primeiru”.
“Tuir mai, teste ba tinan tolu, iha tinan dahuluk nia hari’i, tinan daruak nia haburas no tinan datoluk nia hametin, bainhira nia halo ona tinan tolu nia liu ona dejafiu barak signifika nia atu haburas mídia sai boot no sustebtavel ba futuru”. Hateten Otelio Ote.
Otelio konta iha tinan 2022, bainhira atu rejistu iha konsellu imprensa hasoru intervensaun oioin no la passa iha plenária dala rua tanba la hatene se mak hari’i mídia ne’e no se mak iha kotuk, maibe to’o ikus konsege rejistu tanba konsellu imprensa avalia katak midia ne’e iha Padre ida mak iha laran (Pe. Mouzinho Pereira Lopes).
“Mídia hahú rejistu iha tinan 2022, iha konsellu imprensa la passa iha plenáriu dala rua tuituir malu, hafoin ami haree katak midia ne’e iha Padre ida mak iha laran, ami mós haree ninia notísia diak no publika lorloron, entaun ha’u mak dehan ita apresenta fali no aprova tanba mídia hatun notísia diak no garantz bele ba oin”. Nia konta
Iha okaziaun ne’e lansa mós revista visipa Papa Francisco, Filmajens Konstrusaun SAPNews, Istória Susesu Sergio Alves da Costa no entrega ekipamentu live streaming hosi família Doador Franzelino da Conceicão ba ezekutivu Mídia SAPNews ne’ebé representa hosi SEKOMS.
Enkuantu, dies natalis media SAPNews ba dala tolu (3) ne’e partisipa husi Eis Primeiru-Ministru Mari Bin Amude Alkatiri, Sekretariu Estadu Komunikasaun Sosiál Espedito Dias Ximenes, Prezidente Conselho Imprensa Otelio Ote, Diretor Fundasaun Cristal, estudante Cristal, media nasional sira no familia mídia SAPNews.
Jornalista : Marcela Mery da Costa