Imajem : Reprezentante Oxfam iha Timor-Leste Adilsónio da Costa iha Salaun Oxfam Hudi-laran, Segunda-Feira, (19/08 /2024).
SAPNewsTL, Díli – Assosiasaun Jornalista Timor-Leste (AJTL) hamutuk ho Oxfam no SECOMS lansa boletin média tour no relatóriu peskiza mata dalan ba grupu joven sira iha setór ekonómia produtivu.
Prezidente AJTL Maria Zevonia Vieira hatete, AJTL servisu hamutuk ho Oxfam kria programa media tour hodi lori jornalista sira ba kobertura iha área rural liuliu setor agrikultura, turizmu no setor sira seluk ne’ebe envolve ema ho difisiente, grupu marjinàl no joven sira.
“Tinan kotuk liu ba AJTL servisu hamutuk ho Oxfam iha Timor-Leste, realiza programa média tour hodi lori jornalista ne’ebé sai ona menbru AJTL ba hala’o kobertura no foti istória susesu sira kona-ba joven iha área rurál, futuru produtivu hanesan agrikultura no turizmu ne’ebé envolve ema ho defisiénsia, grupu marjinál hanesan LGBTIQ no joven sira ne’ebé kontribui ba oinsá diversifika ekonómia.” Dehan Prezidente Asosiasaun Jornalista Timor-Leste Maria Zevonia Vieira ba jornalista sira iha Salaun Oxfam Hudi-laran, Segunda-Feira, (19/08 /2024).
Presidente AJTL ne’e salienta, objetivu husi lansa istória buletin média tour ne’ebe jornalista sira produz hodi distribui ba governu, parlamentu no instituisaun importante sira, nune’e bele hatene istória refere sai hanesan estudu kazu hodi tau matan ba setor hirak refere.
“Objetivu lansa istória buletin média tour ne’ebé jornalista sira hakerek nomós prodúz atu distribui fali ba governu, parlamentu no instituisaun importante sira atu bele hatene istória hirak ne’e sai hanesan estudu kazu ne’ebé bele foti, oinsa governu tau matan ba setór importante sira, entaun AJTL nia servisu ne’e halo advokasia no fó espasu ba ema kiik iha área rurál foti istória ne’ebé sira halo.” Nia dehan.
Prezidente ne’e haktuir, jornalista nia papel importante tebes hodi buka tuir istoria ne’ebe sai hanesan preokupasaun públiku nian no oinsa bele ajuda governu hodi buka solusaun ba preokupasaun povu nian iha setór oioin.
“Foti istória importánsia kona-ba joven sira aplika seasonal worker ba servisu iha Australia, oinsa sira muda ekonomia uma-laran, no oinsá joven produtivu involve setór agrikultura hodi diversifika ekonómia, istória husi Bunda ne’ebé liga ho nia moris LGBTIQ, no kona-ba defisiénsia sira ne’ebé luta hasoru susar, nune’e jornalista nia papél importante loos atu foti istória sira ne’ebé sai hanesan preokupasaun públiku nian no oinsa ajuda governu atu bele fó solusaun ba sira”.
Iha fatin hanesan, reprezentante Oxfam Adilsónio da Costa haktuir, lansamemtu buletin ne’e hanesan parte ida husi relatóriu atividade entre AJTL ho Oxfam hodi hakerek istória kona-ba ema ho defisiénsia liga ho joven agrikultura no seluk tan.
“AJTL ho nia membru sira halo média tour ba munisípiu Ermera, halo kobertura no hakerek istória kona-ba asuntu ne’ebé liga ema ho defisiénsia, joven agrikultura nomós liga ho ema ne’ebe LGBTIQ, ohin oportunidade di’ak tebes ita konsegue lansa relatóriu rua, relatoriu husi buletin média tour, ida mak relatóriu peskiza ne’ebe Oxfam halo atu explora esperiénsia prátika husi grupu joven sira iha Ermera”. Dehan Adilsónio.
Nia dehan grupu esperiénsia husi joven sira ne’ebé hala’o servisu iha setor agrikultura ne’e akumula hamutuk sai nu’udar dokumentu ba joven sira seluk iha Munisípiu sira.
“Grupu joven sira ne’ebé halo servisu iha setor agrikultura, husi sira nia esperiénsia ne’e rasik, ita koko elabora sai hanesan dokumentu ida, ne’ebé bele sai lisaun importante ba grupu joven sira iha munisipiu sira seluk”.
Aleinde ne’e, dokementu refere bele ajuda mós jornalista sira atu hatene kle’an kona-ba saida mak grupu joven tolu ne’e halo iha Ermera, no oinsá sira kontribui ba ekonómia iha uma-kain, kria oportunidade servisu ba maluk joven sira seluk nomós suporta agrikultor sira atu sosa sira-nia produtu no bele asesu ba merkadu”.Esplika nia.
Sekretariu Estadu Komunikasaun Sosial (SECOMS, sigla Portugés) Expedito Loro Dias Ximenes
Sekretariu Estadu Komunikasaun Sosial (SECOMS, sigla Portugés) Expedito Loro Dias Ximenes akresenta, atividade média tour ne’e importante tebes tanba bele ajuda jornalista hodi aprende ideia agrikultór husi nia baze, hodi hare kontekstu hodi aprende esperiensia agrikultór sira nian iha munisípiu no hato’o informasaun kona-ba saida mak governu no estadu hala’o.
“Atividade média tour ne’e importante tebes tanba bele ajuda jornalista sira atu aprende ideia husi agrikultór sira iha baze, ita haree kontestu oinsá bele ajuda jornalista sira, aprende esperiénsia husi ita nia agrikultór sira no hato’o informasaun sira kona-ba saida mak ita nia nasaun no estadu hala’o daudaun, maibé ha’u hakarak kongratula ba Oxfam ne’ebé bele servisu parseria ho AJTL durante tinan barak nia laran no bele aumenta koñesimentu ba Jornalista sira.” Dehan SEKOMS Expedito Dias Ximenes Loro.
Nia dehan, atividade ne’e atu habelar joven sira nia lian, lori sira nia istória dezafiu no realizasaun sira ba futuru ne’ebé naroman liu hodi promove vizibilidade ba asuntu foinsa’e sira hasoru iha ekonómika.
“Media tour la’ós de’it informa maibé mós inspira mudansa pozitivu iha persepsaun públiku no elabora polítika públiku sira nian. Liuhusi peskiza no komunikasaun bele kria Espasu ba foinsa’e sira atu espresa nia hanoin no ema bele rona sira-nia lian hodi estimula diálogu krusial entre joven, sosiedade sivil no líder polítiku sira”.
“Tanba ne’e, ita-nia responsabilidade atu buka solusaun inovadora no inkluzivu ne’ebé fó kbiit ba foinsa’e sira no kontribui ba seitór ekonómiku produtivu ida ne’ebé metin no sustentavel liu”.nia hakotu
Enkuantu, serimónia lansamentu ne’e hetan partisipasaun hosi SEKOMS Expedito Dias Ximenes Loro, representante OXFAM iha Timor-Leste, Prezidente AJTL, estudante, jornalista, sosiedade sivil, no grupu koligasaun agrikultura Timor-Leste.
Jornalista : Ermelinda Soares & Marciana da Conceição