Selebra Missa Moruk, Pe. Asa-Mau : Ha’u Kbi’it La’ek, Ho Kristu Ha’u Forsa

(SAP NewsTL) Ermera : Rui Asa-Mau sente haksolok tebes hamutuk ho nia familia hala’o misa  nova no moruk ba ninia ordenasaun saserdotal sai nai lulik iha igreja  Paroquia S. Jose Operario Atsabe, Ermera,  Padre Rui Asa-Mau ne’ebé ho nia moto “ha’u kbi’it laek, maibe iha kristu Ha’u Forsa, ne’e agradese ba maromak tanba bele akompanha no forsa ba nia ikus mai sai bibi-atan ba sarani sira

“Agradese ba Aman Maromak no Santisma Trindade ne’ebé mak fo ona forsa no kbi’it mai ha’u, hodi hatan ba maromak nia bolu loron ida ohin no ha’u sente  haksolok tebes tanba liu husi prosesu lubuk ida mak ha’u liu, ha’u konsege pasa mai to’o iha ohin loron hala’o misa nova no moruk hamutuk ho familia, ba hau nia  ordenasaun nailulik iha loron 08-12  Dezembru de 2022 ne’e” dehan Padre Rui Asa-Mau ba jornalista Sap News iha igreja paroquia S. Jose Operario Atsabe, Ermera segunda (12/12)

Nia Afirma, buat ne’ebé mak nia senti haksolok tebes, liu husi  esperansa ba maromak mak nia   hateke ba oin, ho nia pasensia no orasaun loron-loron, la falta, la kolen, la ta’uk atu reza, nune’e  bele to’o duni iha ida ne’e, nune’e nia hili lema ida ne’e mak dehan”ha’u kbi’it laek, maibe iha kristu, ha’u forsa” katak iha Kristu, hamutuk ho kristu hodi hala’o  kna’ar ne’e, ho maromak nia domin no grasa bele servi uma kreda no nai Lulik sira oras ne’e daudaun iha uma kreda diocese dili nian.

Nia afirma, hakarak hato’o ba sarani Atsabe no povu Timor-Leste ba festa natal atu mai tenki prepara hodi simu kristu atu nune’e bele hakmatek, no paz iha moris

“Ha’u hato’o mensajen  ba sarani atsabe no povu Timor-Leste, hanesan nai Lulik foun, ba    festa natal atu mai  ita tenki atu prepara,  hamos ita nia fuan, konfesaun, halo penitensia  atu bele simu kristu, ne’ebé daudauk atu mai, nia mai  atu moris iha sosiedade ne’ebé fuan mos liuliu  iha familia sira para  hakmatek, no dame iha ita nia moris”, tenik Rui

Iha fatin hanesan Alin husi familia, Antonio Timau hatete, nia agradese ba familia hotu-hotu ne’ebe mak suporta, fo kontribuisaun, dedikasaun no orasaun nia bele hakat mai altar ida ne’e, sarani Atsabe mos sente agradese mos ohin loron bele hetan bensaun husi nia

“Ha’u agredese ba familia hotu-hotu, liu-liu familia sira ne’ebé mak suporta hodi nia hakat ba altar santu ida ne’e, liu husi familia hotu nia kontribuisaun, didikasaun no orasaun ohin loron ami nia amululik hakat ba altar ida ne’e, nu’udar familia agradese ba buat sira ne’ebé nia halo no luta durante tinan barak,  ami familia mos luta ba nia diak ne’ebé ohin loron nia hetan, ami agredese la’os familia deit maibe sarani Paroquia S. Jose atsabe tanba hetan ona bensaun no, grasa ida ne’ebé  oferese ba sarani atsabe tomak”, tenik Antonio

Nia afirma,  deseju ba nia atu bele atu sai padre ne’ebé diak servi nafatin sarani sira, laos iha atsabe deit maibe iha Timor laran tomak no ba mundu tomak.

Reportajen: Ekipa Kobertura