Imajem : Senadu Estudantil UNTL hala’o komunikadu imprensa iha kampus sentral UNTL, 17/11/2024.
SAPNewsTL, Díli : Relasiona ho aniversáriu Universidade Nasionál Timor Lorosa’e (UNTL) ne’ebé kompleta ezisténsia ba dala XXIV, senadu estudantil parabeniza sivitas akadémkas no hush ezekutivu UNTL hosi rezolve problema infrastrutura iha universidade.
Universidade Nasional Timor Lorosa’e hanesan universidade públika ne’ebe estabelese husi dekretu lei no 16/2010 de 20 outobru ho vizaun mak sai sentru ekselénsia ba ensinu superior iha Timo-Leste.
Porta-voz Fladimar Oliveira Moruc parabeniza Universidade Nasionál Timor Lorosa’e (UNTL) ne’ebe selebra nia ezisténsia ba dala-XXIV iha povu Timor-Leste nia leet. Nune’e Asosiasaun Akadémika Estudantil (AAE) manifesta ho ksolok hato’o sira nia votus felisitasaun.
“Ohin loron 17/11/2024, Universidade Nacional Timor Lorosa’e (UNTL) selebra ona nia ezisténsia ba dala 24, ho selebrasaun ida ne’e, mak Assosiasaun Akademika Estudantil AAE-UNTL hakarak manifesta ami nia haksolok no hato’o ami nia votus de felisitasaun”. Dehan Porta-voz Fladimar Oliveira Moruc liu hosi komunikandu imprensa iha kampus sentral UNTL, 17/11/2024.
Fladimar Oliveira Moruc lori estudante hotu nia naran hato’o votus parabéns ba ezisténsia UNTL ne’ebe halo tinan ba dala-24, no ba ema hotu ne’ebe hamahan aan iha UNTL liu-liu ba estudante ne’ebe luta ba sira nia futuru.
“Lori estudante hotu nia naran hakarak hato’o parabens ba Ezistensia UNTL nian, ne’ebe halo ona ba tinan 24. Hakarak parabeniza mos ba ema hotu ne’ebe hamahan an iha UNTL, espesialmente parabens ba estudante hotu ne’ebe luta hela ba nia futuru Iha UNTL, no deseja susesu ba ita hotu”. Nia kongratula.
Iha ambitu selebrasaun ba ezisténsia UNTL nian, Asosiasaun Akademika Estudantil nota iha kazu barak ne’ebe akontese, presiza tebes rekoñese erru hodi aprende hosi fallansu, nune’e bele lori UNTL ba oin.
“Ho selebrasaun ezistensia Universidade Nasional Timor Lorosa’e nian ne’ebe halo ona 24 anos, Asosiasaun Akademika Estudantil UNTL nota katak durante ne’e kazu barak mak akontese ne’ebe presiza tebes rekoñese erru hodi aprende husi faillansu no hakotu ona kazu sira ne’ebe lamerese atu repete tan iha ita nia universidade”. Nia subliña.
Fladimar Oliveira Moruc sita fila fali problema hirak ne’ebé durante ne’e akontese iha UNTL maibe seidauk hetan solusaun adekuadu hosi governu liu hosi ezekutivu UNT mak hanesan:
“1. Problema Infrasturtura, dezenvolvimentu infrasturtura nafatin la’o hakadasak maski universidade ida ne’e finansia husi OGE maibe ladauk lori satisfasaun ba estudante sira hanesan, sala aula lato’o, ventuina la funsiona, fakuldade balun la iha edifisiu própriu, no kaza de banhu balun to’o agora ladauk hadia, biblioteka nafatin problema ba estudante sira tanba fakuldade barak la iha biblioteka”.
“2. Problema Dosentes, iha UNTL nafatin eziste dosente malandru ne’ebe pratika aktu sira hanesan halo asediu sexual hasoru estudante feto sira, abandona estudante nia monografia, baruk ten mai aula, halo koasaun moral hasoru estudante sira”;
“3. Gestor Universidade, Assosiasaun Akademika nota katak jestaun universidade nian la’o la transparénsia, estrutura balun nafatin komete korupsaun, abusu poder, mal administrasaun, falsifikasaun dokumentu ba viagen lokal, nst”. Nia sita.
Porta voz ne’e akresenta, iha kazu seluk ne’ebe daudaun ne’e estrutura universidade tenta hodi dezvia estudante sira nia hanoin atu labele kestiona hanesan osan kaisa UNTL ne’ebe seidauk klareza ezekusaun no kantina ne’ebe finaliza ona maibe ladauk utiliza.
“Iha mos kazu sira seluk ne’ebe agora dadaun Estrutura Universidade tenta atu dezvia estudante sira nia hanoin atu labele kestiona mak hanesan, Osan Kaixa Untl ne’ebe to’o agora ladauk klareza nia ezekusaun. Kantina ne’ebe lokaliza iha kampus sentral to’o agora ladauk utiliza maski kantina ne’e finaliza ona”.
Senadu estudantil sira mos husu ba atual Magnifiku Reitor no Vise Reitor Asuntu Administrasaun Finansas no Administrasaun Jeral hodi esklarese osan ho montante 25,725,50$ ne’ebe utiliza hodi produz konvite no banner ba serimonia graduasaun UNTL ba dala-31, tamba sira nota iha indisius forte ba Administrasaun ne’ebe ladiak.
“Ami mos hakarak husu ba Magnifiku Reitor Ho Vise Reitor Asuntu Administrasaun Finansas No Administrasaun Geral atu esklarese osan ho montante $ 25,725,50 ne’ebe uza produz konvite no baner ba serimonia graduasaun UNTL dala tolunulu resin ida, tanba estudante nota katak iha indisius forte ba mal administrasaun”.
Ho kazu sira ne’ebe temi ona iha parte dahuluk, Asosiasaun Akademika Estudantil Universidade Nasional Timor Lorosa’e, (AAE-UNTL) rekomenda ba universidade liu hosi Magnifiku Reitor ne’ebe hanesan orgaun governsaun universidade hodi iha seriedade buka alternativa hodi solusiona problema ne’ebe universidade infrenta.
“Ami husu ba Magnifiku Reitor hanesan orgaun governsaun universidade nian, atu iha seriedade ba problema universidade nian no buka alternativu diak, atu bele solusiona problema sira mak universidade infrenta”.
Estudante sira ne’e mos husu ba manorin ne’ebe hanorin iha universidade hodi muda sira nia atitude atu estudante labele sai vitima beibeik no respeita nafatin estudante feto sira iha UNTL.
“Husu ba manorin sira atu muda nia atitude hanesan manorin, nune’e labele halo estudante sira sai vitima beibeik, nafatin respeita estudante feto sira iha kampus universitariu”.
Estudante sira husu orgaun universidade hodi jere rekursu ho lolos no tuir prinspiu governsaun diak. Assosiasaun Akadémika Estudantil mos la tolera individu hirak ne’ebe buka dalan hodi atinji sira nia interese pesoal no grupu ida nian.
“Husu ba orgaun universidade nian atu jere rekursu universidade nian ho lolos no tuir prinspiu boa governasaun, no assosiasaun akademika estudantil UNTL la tolera individu hirak ne’ebe pratika familarismu no buka dalan atu atinji nia interese pessoal no grupu ida nian”.
“Hakarak husu sivistas akademika UNTL atu nafatin halo kontrolu ida diak iha universidade no taka dalan ba grupu ne’ebe tenta aproveita universidade hodi atinji nia interese pesoal”. Fladimar hatutan.
Asosiasaun Akadémika Estudantil UNTL husu nafatin estuante sira hodi nafatin organiza no konsolida malu hamutuk ho AAE-UNTL tanba iha tempu badak sira sei halo asaun pasifiku relasiona ho osan kaixa UNTL no osan graduasaun ne’ebe la’o la transparensia.
“Ikus liu hakarak husu ba estudante UNTL tomak, Asosiasaun Estudantil Departamentu AED no Movimentu Estudantil sira iha UNTL, atu nafatin organiza no konsolida malu hamutuk ho Asosiasaun Akademika Estudantil UNTL tamba lakleur tan ita sei halo asaun pasifika hasoru Orgaun Universidade ligadu ho osan kaixa unti no osan ba graduasaun nian ne’ebe lao la transparansia”. Nia hakotu.
Entretantu, Universidade Nacional Timor Lorosa’e selebra ona ezistensia universidade ba dala XXIV iha loron sexta-feira,15 November 2024 liu hosi lansa 24 aplikativus dijitais ne’ebé hetan mos marka presenza hosi Prezidente Repúblika Jose Ramos Horta.
Hafoin notisia ne’e publika, SAP News TL seidauk halo komfirmasaun ho Reitor UNTL Join Soares Martins ligadu ho Orsamentu ba graduasaun no kaixa UNTL.
Jornalista : Ermelinda Soares & Marciana Conceição