Imajem : Prezidente SAPNews Ermelinda Soares. Foto : Conzita Mota
SAPNewsTL, Dili – Ligadu ho Operador Telekomunikasaun Telkomcel ne’ebé kompleta ninia existelénsia ba dala XII, Prezidente SAPNews Ermelinda Soares kongratula no felisita lideransa Telkomcel tanba forte ona iha Timor-Leste.
Prezidente SAPNewsTL Ermelinda Soares konsidera telekomunikasaun Telkomcel hanesan operador ne’ebé alternativa ba povu Timor-Leste tanba bele expanda no hametin ninia ezisténsia iha Timor-Leste
“Telkomcel nu’udar operador telekomunikasaun ne’ebe forte no alternativa ba povu Timor-Leste, Telkomcel hatudu ninia kapasidade no kualidade atendimentu ba sidadaun sira, oferese Simkard gratuita, kliente sira kontaktu malu ho gratuita, oferese rede internet ne’ebé iha kualidade naton no fo satisfasaun ba kliente sira”. Tenik Presidente SAPNews Ermelinda Soares iha knaar fatin Fatuhada, 17/09/2024
Lideransa SAPNews ne’e parabeniza Telkomcel tanba kompleta ona tinan XII, hein katak bele sai forte, kualidade no diak liután ba ninia sistema fornesimentu rede internet ne’ebé ho lailais no expanda ba munisípiu hotu-hotu iha Timor-Leste.
“Ohin Telkomcel halo tinan XII, ha’u hakarak lori Mídia SAPNews nia naran hato’o parabens no parabens ba Chief Ezecutive Officer (CEO) Benedictus Ardiyanto Priyo hamutuk ho nia estrutura sira no nia funsionáriu sira hotu ne’ebé servisu makaas tebes to’o ohin halo tinan XII”.
“Espera katak ho ispíritu aniversáriu nian, bele hametin liután ninia ezisténsia iha Timor-Leste, fornese rede internet ne’ebé ho kualidade no velosidade lais ba kliente sira iha Timor-Leste, molok Fibra Ótika dada mai Timor-Leste”. Ermelinda Soares hateten
Lider Feto SAPNews ne’e dezeja, Telkomcel bele haburas liután atendimentu servisu ne’ebé ho kualidade, lais no fo satisfasaun ba kliente sira tuir kultura Telkomcel katak familia unidade, servisu ho domin no iha impaktu sosial. Telkomcel sai nafatin inspirasaun ba sosiedade, aspirasaun komunidade nian no lori inovasaun ne’ebé sustentavel ba povu Timor-Leste.
“Hein katak ho aniversáriu ba dala XII ne’e bele fanun no motiva funsionáriu hotu iha Telkomcel hodi moris iha fiar no hahalok ne’ebé loos sai kultura ba unidade familiar, servi ho domin, laran metin ba Maromak, tulun komunidade hodi fo impaktu sosial no moris ho toleránsia, fraternidade humana iha institusaun internasionál refere hodi lori inspirasaun, aspirasaun no inovasaun ba Timor-Leste”. Ermelinda Soares akresenta
Telkomcel nu’udar parte ida hosi Telekomunikasaun Internasionál (Telin) hari’i iha loron 17 Fulan Setembru Tinan 2012, tinan 2024, Telkomcel kompleta ninia existénsia ba dala sanulu resin-rua (XII).
Iha ámbitu aniversáriu Telkomcel, ligadu vizita Papa Francisco, Telkomcel apoia komisaun organizador, involve servisu voluntáriu, apoia simkard gratuita hamutuk 3.100 ba joven sira, fasilita internet estavel hodi fo susesu ba eventu istóriku vizita Santu Padre Papa Francisco iha Timor-Leste.
Imajem : CEO Telkomcel Benedictus Ardiyanto Priyo
Iha sorin seluk, CEO Telkomcel Benedictus Ardiyanto Priyo haktuir Telkomcel sei buras no fornese fuan barak liután liu hosi lori inspirasaun, aspirasaun no inovasaun ba nasaun
“Funu-na’in Telkomcel nian sei buras liután, no fornese fuan barak, Telkomcel nia viajen notável durante tinan 12 hodi serbí Timor Leste, pasu ida-idak hetan orientasaun hosi prinsipiu sira aspirasaun, inspirasaun no inovasaun, buat sira-ne’e hotu fó impaktu pozitivu ba sosiedade, tuir tema aniversáriu Telkomcel nian ba dala 12, “Hakbiit Inovasaun, Hakbiit Nasaun”, prinsipiu sira-ne’e iha objetivu atu dudu progresu nasaun no sosiedade nian”. CEO Telkomcel Benedictus Ardiyanto Priyo sita liu hosi nia karta aberta iha loron, 17/09/2024
Benedictus Priyo hatutan, realizasaun notável hirak ne’e sei la sai posivel, wainhira lahó dedikasaun no kompromisu ne’ebé maka’as hosi lideransa, funsionáriu no staff sira.
“Realizasaun notável hirak ne’e la sai possivél, wainhira la ho dedikasaun no komprimísiu husi ami nia Funu-na’in Telkomcel nian ne’ebé maka enkarna espíritu servisu ho laran tomak, iha lema “Moris iha Telkomcel hodi habelar liután Domin” ami fo agradesimentu ba Maromak ba bensaun sira ne’ebé haraik ba Telkomcel durante nia viajen tinan 12″. Nia agradese
“Orientadu husi Ispíritu Familia Unidade nian, mai ita kontinua Servi Ho Domin, garante katak Telkomcel kontinua iha Impaktu Sosial ne’ebé pozitivu. Hamutuk, ita sei la’o ba oin, hodi hamosu legadu ida hosi inovasaun inovadora sira ne’ebé sei dudu liután progresu nasaun nian, tuir ita-nia tema Empowering Innovation Empowering The Nations”. Nia sita
Tuir dadus ne’ebé SAPNews asesu antes ne’e, Telekomcel regista ona kliente hamutuk 450.000 resin no fó servisu ba Timoroan hamutuk 250, entre sira inklui ema ho kondisaun defisiensia.
Jornalista : Marciana da Conceição