Imajem : Presidente Assosiasaun Estudantil Fakuldade Engenharia Siénsia no Teknolojia (FEST-UNTL) Sergio Alves da Costa iha auditoriu kampus hera,20/05/2024. Foto : Gil Gomes
SAPNewsTL, Dili : Iha ámbitu semináriu no reflesaun ne’ebe Universidade Nasionál Timor-Lorosa’e (UNTL) nia Departamentu Geolojia no Petróleu (GeoPet) realiza semináriu no rerlesaun hodi selebra restaurasaun independénsia ba dala 22.
Iha diskursu, Presidente Assosiasaun Estudantil Fakuldade Engenharia Siénsia no Teknolojia (FEST-UNTL) Sergio Alves da Costa konsidera loron 20 Maiu ne’e sai reflesaun ba estudante sira atu hateke ba dook liu tan katak foinsa’e tenki aprende no aprende para hatene, hatudu, servi, kontribui no tane aas rai doben Timor-Leste.
“Ohin ita selebra 20 Maiu, ispiritu loron restaurasaun ne’e fanun ita atu hateke ba dook liu tan katak ita tenki aprende no aprende para hatene, hatudu, servi, kontribui no tane aas ita nia rai doben Timor-Leste, tanba ita nia heroi sira luta no mate barak liberta ona rai no entrega ba ita, entaun ita nia papel atu prepara an no kontribui ba dezenvolvimentu nasaun nian”. Tenik Senadu Estudantil Sergio Alves da Costa liu husi diskursu iha auditorium hera, 20/05/2024
Senadu Estudantil ne’e dehan, restaurasaun ukun rasik an ba dala XXII ne’e fo mensagem ba estudante hotu katak nasaun nia futuri iha joven sira nia liman, dezenvolvimentu país presiza rekursu humanu kualidade no kompetitivu tanba futuru sei nakonu ho kompetisaun no dejafiu boot liliu problema ekonomia, sosial no geopolítika.
“Selebrasaun 20 Maiu fo mensagem ba ita hotu katak futuru nasaun iha joven sira nia liman, dezenvolvimentu nasaun presiza ema matenek tanba futuru sei nakonu ho kompetisaun mundial no dejafiu geopolítika, ekonomia mundial no problema sosial”. Nia dehan
Sergio da Costa husu estudante sira hotu tenki hakaas an hodi hola parte iha programa extrakurikuláriu sira liliu semináriu sira, workshop no formasaun sira tanba oportunidade sira ne’e mak sei halo ema ida sai forte, matenek no susesu.
“Ita tenki esforsu an hodi hola parte iha programa extrakurikulariu sira, liliu semináriu, formasaun no workshop sira, ita mos tenki tahan an hasoru difikuldade sira no limitasaun sira tanba situasaun hirak mak sei halo ita sai forte, metin, matenek, kompetitivu, progresu no susesu iha futuru, ne’e tenki sai ita nia komprimisiu”. Sergio Alves da Costa hateten
Sergio informa, fundu petrolíferu ne’ebe sustenta despeza públika kada tinan kontribui 80% ba orsamentu jeral estadu, agora daudaun hela $ 18.45 billiaun, retornu hahu tun (400 millões), reiseitas tun (20 millões trimestre ne’e), dependénsia ba exportasaun, inflasaun ekonomia 2.7%, kiak 41% (tinan 2014).
“Ita preokupa tanba fundu minarai hela 18.45 mil milhões dolares, reseitas tun ba 20 milhões, retornu tun, Mina Bayu Undan ne’ebe hahu desmantela ona, kiak sei iha 41% husi total populasaun, dezempregu barak, situasaun ne’e fo reflesaun ba ita hotu katak futuru ne’e sei nakonu ho dejafiu ba ita joven sira hodi prepara an hasoru situasaun no kondisaun hotu”. Nia husu
Enkuantu, Partisipa iha semináriu, reflesaun no festa amizade ne’e mai husi estudante Departamentu GeoPet, alumni sira, representante estudante departamentu sira inklui konvidadu sira
Jornalista : Dircia Baptista Belo