Sikuentenáriu FRETILIN ! Lideransa Presiza Tur Hamutuk, Reflesaun & Rekonsiliasaun

SAPNewsTL, Díli : Partidu Frente Revolusionáriu Timor-Leste Independente (FRETILIN) selebra nia ezisténsia ba dala 50⁰, Lider troika FRETILIN Lere Anan Timur parabeniza povu maubere ho 99% Fretilin, maske balun muda ba partidu seluk maibe la haluha Fretilin nia existénsia ba dala-50.

“Ha’u nia parabéns ba povu maubere tomak tanba 99% Fretilin, sira balun mos agora iha partidu seluk maibe la haluhan Fretilin nia existénsia ba dala-50, parabéns mos ba fundadores sira hotu ne’ebe hamutuk ona hodi hari’i partidu Fretilin”.Tenik Jeneral Lere Anan Timur iha CCF Fatuhada,21/09/2024

Lere Anan Timur konsidera FRETILIN eziste nafatin nu’udar Partidu Istóriku no partidu lulik iha Timor-Leste.

“Iha partidu polítiku barak, ita bolu nasaun ida demokratiku, nasaun ukun an mosu partidu barak maibe aban bairua partidu bele hela rua ou tolu de’it mak sei iha, maibe Fretilin tinan ba tinan nafatin Fretilin hanesan partidu historiku, partidu lulik ne’ebe hari’i no hametin ezisténsia povu maubere nian”.LAT sublinha

Lere Anan Timur hatutan, “Kuadru Fretilin nian ohin mos fo certifikadu ba nia minitantes ne’ebé nia kontribuisaun no partisipasaun ba existensia partidu Fretilin nian, sem militante, laiha partidu, lideransa deit mos laiha partidu tanba ne’e sira nia esforsu abnegasaun ba existénsia partidu Fretilin nian”.

Fretilin kuandu halo funu hasoru kolonialismu maka liberta patria no povu, Fretilin mak povu, povu maka Fretilin, entaun Fretilin liberta ona Patria, agora tenki liberta povu husi kiak no mukit.

“Ita bele dehan Fretilin halo buat hotu-hotu, Fretilin nu’udar opozisaun ne’ebe kontribui, partidu ne’ebe ukun atu halo di’ak, foti responsabilidade hodi liberta povu husi kiak no mukit iha situasaun difisil nia laran”. Lere Anan hateten.

Selebrasaun Tinan limanulu Partidu FRETILIN 50, Lere Anan nu’udar reflesaun boot liliu ba militante bain-bain no lideransa partidu nian, saida maka tenki halo atu partidu bele boot no buras, saida maka lideransa halo iha tinan hirak ba kotuk.

“Ita prezisa halo reflesaun, tinan limanulu (50) signifika Estrutura Partidu Fretilin nian ne’e haree ba estatutu partidu, lideransa maka tenki hanoin, Fretilin manan mos la ukun, lakon mós la ukun, ita tenki halo balansu tanba saida maka lakon, tanba saida mak manan mos la ukun, ida ne’e reflesaun ba lideransa liu-liu membru Komite Sentral Fretilin maka halo ida ne’e”.

“Laos ita hanoin hasai ida hatama ida ne’e mos Ita hanoin katak lalos, ita mós tenki hatene nia problema tanba saida maka la ukun, tanba saida manan mós la ukun, tanba Fretilin hahú ho 55 kadeira iha Parlamento Nasionál, nusá maka tun ba 19 ne’e reflesaun lideransa partidu nian”. Lere preokupa

Liga ba mundansa estrutura, Lider Troika FRETILIN Lere dehan lideransa Partidu presiza tur hamutuk  liu hosi retiru, hafoin bele determina entre mudansa ka mantein.

“Mudansa estrutura laos kompeténsia ema ida rua nian no la’os mos kompeténsia militantes sira nian, maibe lideransa partidu tenke tur hamutuk, komite sentral tenke tur hamutuk, ita bele dehan iha retiru para ita bele hatene tanba saida to’o ona tempu para ita halo mudansa ka lae”.

Lere Anan deklara, “Fretilin laiha, ita mós laiha no la ukun an, 50 existênsia laos uitoan, tempu to’o ona atu Fretilin halo meditasaun no reflesaun, halo oinsa bele ukun, ita presiza iha unidade no rekonsiliasaun iha partidu laran no lider sira”. Nia hakotu

Iha ámbitu sinkuentenáriu FRETILIN, lideransa atuál hakarak selebra espesialmente militánsia metin tinan limanulu, sira ne’ebé nunka sees husi FRETILIN iha momentu ne’ebé de’it.

Presidente Partidu FRETILIN Francisco Gusterres Lú Olo fo agradese ba veteranu no veterana sira ne’ebé kontinua hamrik metin no haboot FRETILIN sai buras beibeik.

“Agradese ba kamarada sira hotu nia fiar metin, ho kamarada sira-nia kolen rohan-laek, no tanba mós eduka oan no beioan sira, mak família FRETILIN boot ba beibeik. Ho kamarada sira nia kontribuisaun mak FRETILIN kompleta jornada tinan lima nulu ona”.

“Lideransa FRETILIN konta nafatin ho kamarada sira-nia matenek, kbiit no dedikasaun tomak ba FRETILIN no apoiu husi kamarada sira nia família tomak ba ita-lia luta atu hakotu kiak husi aspetu hothotu iha ita-nia rai doben Timor-Leste”. Nia hakotu

Iha serimónia Sinkuentenariu FRETILIN konsege identifika veteranas no veteranus hamutuk 100 atu simu rekoñesimentu, maibé veteranu hamutuk 95 mak simu ona sertifikadu apresiasaun kompostu husi veteranu rai-laran hamutuk 67, Eis Prizionéiru 18 no luta externa na’in 10, entre sira inklui Lere Anan Timur, Roque Rodrigues, no seluk tan.

FRETILIN sei kontinua fahe sertifikadu rekunhesimentu veteranas no veteranus namkari iha rai-laran no iha rai-liur iha ámbitu programa selebra Sinkuentenáriu FRETILIN ne’ebé sei ramata iha 31 dezembru 2024.

Jornalista : Marciana da Conceição & Ermelinda Soares