Imajem : Bispu Dioseze Baukau Dom Leandro Maria Alves simu Revista Visita Papa Francisco hosi Diretor SAPNewsTL Sergio Alves da Costa Iha Pantai Kelapa Dili, 05/08/2025
SAPNewsTL, Díli : SAPNewsTL entrega revista visita Papa Francisco ba Bispu Dioseze Baucau, Dom Leandro Maria Alves iha Dili, 05 Agustu 2025.
Marino de Deus – SAP News TL
Hafoin simu revista hosi Diretor Mídia Sapnews, Dom Leandro Maria Alves fo agradese ba ekipa SAPNews ne’ebe konsege elabora no hakerek revista Papa Francisco mai Timor-Leste.
Bispu Dioseze Baucau ne’e simu ho laran ksolok no oin midar hosi dehan “obrigadu barak ba revista ne’e, agradese ba média SAPNews”. Dehan Dom Leandro Maria Alves iha Pantai Kelapa Dili, 05/08/2025
Iha oportunidade hanesan, entrega mos ba Padre Augusto Delfim de Sá (atual formador iha semináriu Fatumeta) no Pastor Própriu Kuaze Parokia Baguia, Mateus da Cruz ne’ebe selebra ninia loron ordenesaun ba dala XVIII iha misaun nu’udar Amu-Lulik.
Revista Visita Papa Francisco iha Timor-Leste, Singapura, Papua Nova Guiné no Indonésia ne’e lansa direta hosi Eis Primeiru Ministru Marí Bin Amude Alkatiri, SEKOMS Espedito Dias Ximenes, Presidente Konsellu Imprensa Otello Ote no konvidadu sira iha loron 26 fulan Fevereiru 2025 (loron aniversáriu média SAPNews ba datoluk).
Introdusaun Revista
Timor-Leste nu’udar estadu direitu demokrátiku ne’ebé ukun an, hari’i husi vontade popular no respeitu ba dignidade ema moris ida-idak nian, estadu ne’ebé povu 99,6% relijiaun katólika, sempre fo respeitu ba diversidade no universalidade.
Iha tinan 1989, Santu Padre João Paulo II vizita Timor-Leste ho lema ‘Imi Masin Rai Nian No Naroman Mundu Nian’, liu tiha tinan tolu nulu resin-lima, Papa Francisco halo vizita pastoral ho eslogaun ‘Atu Imi Nia Fiar Sai Imi Nia Kultura’ nu’udar tema sentral iha momentu istóriku ne’e.
Liafuan save maka fiar no kultura, fiar hanesan buat abstratu ne’ebé labele haree ho matan no kaer ho liman, maibe fiar ne’e bele expresa hosi hanoin, orasaun, hahalok no toman ema nian. Kultura mak ábitu ne’ebé sosiedade hatudu hosi atetude no prátika iha família, igreza no nasaun.
Tuir Biblia, Saun Tiagu haktuir, ‘fiar moris ho nia hahalok, fiar sai lolos ho hahalok mos, Abrão fiar ida ne’e nu’udar Maromak nia justisa’(Tiago 3:22-23). Fiar ne’ebe la ho hahalok, fiar ne’e mate, enkuantu hahalok ne’ebe la ho fiar, hahalok ne’e la folin.
Fiar ne’e konkretiza liu hosi hatudu dalan, serví no domin, karidade no moris ho unidade iha diversidade, la haree kor, ras, relijiaun, etnia no grupu. Mensagem, ‘atu imi nia fiar, sai imi nia kultura’(que a vossa fé, seja a vossa cultura), katak ita nia fiar sai identidade, sai adultu iha fiar no hahalok, hanesan Dom Bosco dehan ‘sai sarani di’ak no sidadaun honestu’ la‘os de’it iha igreja wainhira tuir missa, maibe sai kultura ba missa, toman iha orasaun, respeita malu, haraik an, perdaun, serví malu iha familia, grupu, instituasaun, nasaun no mundu inteiru.
Santu Padre nia visita ho vizaun hametin fiar katóliku, promove unidade nasionál, inspira ema hotu halo nia fiar sai kultura damen, amizade, fraternidade, solidariedade, karidade, toleránsia, halakon violénsia, diskriminasaun, explorasaun, exploitasaun, korupsaun, koluzaun, nepotismu no injustisa sosial iha mundu.
Mídia SAPNewsTL hanoin hamutuk no deside hakerek revista vizita Santu Padre Papa Francisco hodi prezerva no asegura nafatin memória furak no kmanek ne’e hodi hatutan hosi jerasaun ba jerasaun iha istória Timor-Leste nian, aliende ne’e bele promove kultura literasia iha sosiedade liu hosi halo leitura, análiza, peskiza no hakerek nu’udar papel krusiál ba juventude iha sékulu XXI.
Revista vizita Papa Francisco ne’ebé ho tema “Imi Nia Fiar Sai Imi Nia Kultura”, ne’e bele fanun no motiva ema hotu hodi moris iha fiar no hahalok ne’ebé loos, sai kultura familiar, servi, laran metin iha Maromak, tulun malu no moris hamutuk iha toleránsia, unidade iha diversidade nia laran tuir prinsípiu dokumentu fraternidade umana nian hahú husi família, instituisaun to’o nasaun.
Revista visita Papa Francisco ne’e livre baema hotu hodi asesu no lee mensagem importante sira hosi Papa durante vizita iha Sudeste Asiático iha fulan Setembru 2024. Karik iha interese atu asesu bele komunika ba ekipa SAPNews liu hosi Página SAP News TL.