Imajem : Konferénsia Imprensa hosi LFTL iha sede LFTL Merkadu Lama Dili (12/05/2025).
SAPNewsTL, Dili : Klube AD SLB Laulara sei kontra Karketu Dili FC iha jogu abertura Liga Timorense epoka 2025 iha Estadium Manatutu iha loron 24 fulan maiu 2025.
“Ita nia jogu abertura ba divizaun dahuluk sei joga husi Klube AD SLB Laulara kontra Karketu Dili FC iha Estadium Manatutu iha loron 24 fulan maiu 2025, ita hili klube rua atu halo abertura tanba AD SLB Laulara nu’udar kampiaun ba Liga Futebol Amadora 2015 no Karketu Dili FC nu’udar kampiaun ba Liga Timorense 2023”, dehan porta voz LFTL Jordão Henrique ba jornalista sira iha sede LFTL Merkadu Lama Dili, (12/05/2025).
Porta voz hatutan, Ba klube sanulu kompete divizaun dahuluk Liga Timorense 2025 rejistu hotu ona no ba divizaun daruak nian janela tranferesia sei prolonga tan to’o loron 30 fulan maiu 2025 tanba jogu kick off ba divizaun daruak iha loron 13 fulan Juñu 2025 depois enseramentu iha loron 17 fulan Jullu 2025.
Iha Fatin hanesan, Diretor kompetisaun LFTL Frederico Martins hatete, Orgaun LFTL hakarak anunsia janela tranferensia ba jogador sira iha divizaun dahuluk Liga Timorense 2025 taka ona iha loron 11 fulan maiu 2025.
“Ami hakarak anunsia janela tranferesia ba jogador sira iha divizaun dahuluk Liga Timorense 2025 taka ona iha loron 11 fulan maiu 2025, nune’e klube sanulu rejistu ona inklui klube rua promovidu”, tenik Frederico
Frederico informa tan, parte departamentu verifikasaun no komunikasaun sei halo verifikasaun ba dokumentu klube sira durante loron tolu depois pasa fali informasaun ba klube sira karik dokumentu sira seidauk kompletu para klube sira bele kompleta fali.
Entretantu, klube sanulu sei kompete iha divizaun dahuluk Liga Timorense 2025 mk AD SLB Laulara, Karketu Dili FC, Emmanuel FC, AS Marca, DIT FC, AS Ponta Leste, Assalam FC, Academica FC, Porto Taibesi no Coração FC.
Klube hitu sei kompete iha divizaun daruak Liga Timorense 2025 mak FIEL FC, Kablaki FC, Santa Cruz FC, Nagarjo FC, Aitana FC, Zebra FC no Lica Lica Lemorai.
Reportajen: ADS