Imajem : Klube Karketu FC kontra AD SLB iha Estadium Manatutu, 24/05/2025. Foto : Xanana Ba Ema Hotu
SAPNewsTL, Dili : Klube AD SLB Laulara lakon kontra Karketu Dili FC iha jogu abertura Liga Timorense epoka 2025 ho skore 1-0.
Augusto dos Santos – SAPNews
Jogu abertura entre Karketu Dili FC kontra AD SLB Laulara hala’o iha Estadium Mantuto iha loron 24 fulan Maiu 2025.
Iha jogu parte dahuluk remata ekipa rua mantein skore provizoriu 0-0 maski ekipa rua nia jogu halo presaun no kontra atake ba malu tanba Karketu Dili FC hatun jogador lokal ho estrajeiru husi nasaun Ghana, enkuantu AD SLB Laulara mai ho jogador lokal.
Hafoin jogu 90 minutu remata, Karketu Dili FC sai manan nain iha jogu refere tanba Karketu Dili FC nia jogador estrajeiru Assumany Maxuell konsege marka golu hodi rezulta ekipa AD SLB Laulara sofre golu iha minutu 51.
Depois jogu remata treinador Bernard Teye hatete, sira nia jogador hatudu jogu pasa bola ba malu diak tebes depois lina defeza mos organiza malu diak tebes.
“Ohin ha’u nia jogador sira hatudu jogu diak, sira konsege hetan oportunidade hodi suta bola ba baliza adversariu, jogador sira pasa bola ba malu kapas tebes no lina defeza mos organiza malu diak tebes” tenik Bernard
Treinador Karketu Dili FC hatutan, ohin loron sira hatudu sira nia jogu tuir sira nia treinu durante ne’e, nune’e sira manan jogu, jogador sira husi AD SLB sira pasa bola ba malu diak tebes nune’e nia haruka nia jogador sira mosu iha jogador adversariu nia kotuk atu sira bele joga delay bola.
Jogador sira hetan oportunidade barak iha minutu 45 dahuluk maibe la konsege utiliza hodi marka golu, nune’e tama minutu 45 nia jogador sira utiliza diak tempu kontra ataka diak.
Treinador estranjeiru ne’e informa tan, ida ne’e jogu dahuluk ba epoka ida ne’e nian, nia sei esforsu hadia jogu husi etapa ba etapa para jogador sira hatudu joga diak liután, nia promete sei fo tan vitoria ba Karketu Dili FC iha jogu tuir mai.
Iha sorin seluk, jogador kapitaun husi AD SLB Laulara Filomeno Junior da Costa dehan, golu Karketu Dili FC akontese ne’e falla husi sira nia koordenasaun jogador defeza.
“Golu Karketu Dili FC akontese ne’e falla husi sira nia koordenasaun jogador defeza no ohin sira nia jogador lina avasadu nian mos fo duni presaun ba Karketu Dili FC” Filomeno hateten
Filomeno salienta tan, jogu ohin nian ema barak nia espektasaun sira sei sofre golu barak tanba AD SLB Laulara mai ho jogador lokal kontra Karketu Dili FC ne’ebe mai ho jogador kualidade husi estranjeiru maibe rezultadu final mak 1-0.
Ohin sira joga aproveita kontra atake deit tanba sira nia jogador idade kiik kompara ho jogador Karketu Dili FC, depois jogu tuir sira sei hadia failansu iha lina defeza nian.