Emprezariu Internasional husi Kuwait no Estadus Unidus Amerika Deklara Prontu halo investimentu iha Timor Leste liliu iha Infraestrutura no Turizmu

SAPNewsTL, Dili : Prezidente Repúblika, José Ramos-Horta, kuarta-feira liu ba, hasoru grupu emprezariál rua husi Kuwait no Estadus Unidus Amérika, hodi ko’alia kona-ba oportunidade investimentu.

       ‘’Sira hakarak hare oinsá sira bele kontribui bá finansiamentu projetu infrastutura iha Timor-Leste, grupu ne’e, grupu bo’ot ida, sira bele finansia diretamente ou bele mobiliza investedór seluk, inklui banku singnifika impréstimu, no tuir sira esplika katak funan sei kama’an, menus %3, la iha limite’’. haktuir Xefe Estadu hafoin enkontru informál ne’ebé hala’o iha Embaixada Timor-Leste iha Singapura.

Tuir Xefe Estadu, empreza hirak ne’e bele finansia Greater Sun Rise to’o billaun 12  no prefere halo mós investimentu iha area infrastrutura.

         “Sira mos hakarak iha atividade investimentu barak liu, tanba sira iha investimentu iha Áfrika no além ida ne’e, sira mos bele halo planu bá Timor-Leste kona-ba Aeroportu, Estrada, óspital, no uma ba kbi’it laek sira  rihun ba rihun tuir negosiasaun ruma karik governu interesadu bele hasoru sira, hodi prepara planu investimentu ida ne’e,’’ Esplika Horta.

Empreza husi Kwait, Al-Bader International Development Co.W.L.L disponivel atu ko’alia ho governu hodi hari’i uma ba sidadaun vulnerável, husi dezeñu, proposta orsamental no tuir padraun ne’ebé sira aplika ona iha rai barak.

          ” Sei la gratuita tanba halo konforme akordu entre investor ho governu. Além ida ne’e, xefe ekipa delegasaun husi empreza Al-Bader, Yousef A. Albader deklara mos katak sira prontu atu investe iha area turízmu”. salienta Xefe Estadu.

Prezidente Repúblika mós aproveita biban hodi hasoru malu ho Open Society-Asia Pacific, kona-ba planu investmentu ne’ebé antes ne’e Xefe Estadu ko’alia ona ho nia Fundadór George Soros Nu’udár billionáriu Amerikanu.

‘’Grupu ne’e ema billionáriu Amerikanu ida nian, ha’u enkontru ona ho sira iha Díli no dala-ida iha Nova Iorké, no ha’u husu ba sira ajuda halo revizaun ba Planu Estratéjiku Dezenvolvimentu Nasionál (PEDN) 2011-2030, tanbá hahu planu PEDN no iha implementasaun 2011, tinan 10 liu ona, atu hare saida mak halo di’ák, saida mak iha fallansu iha planu ne’e tanbá ekonomia mundiál ne’e troka an ba mai, se aspetu planu balun ita mantém ou bele halo alterasaun no adaptasaun konforme situasaun rejionál no mundiál’’  hateten Xefe Estadu.

Ba Xefe Estadu, revizaun ba PEDN presija duni, hodi adapta tuir nesesidade industrial ne’ebé hanaran  intelijénsia artifisiál teknolojia dijitalizasaun.

Prezidente Repúblika mós  husu atu ekipa avaliadór kontinua halo revizaun ba PEDN no bainhira remata bele halo diskusaun hamutuk entre revizaun husi Grupu Open Society no parte governu mós presija halo klean.

          ‘’Open Sosiety hahu servisu ona iha fulan sira ne’e nia laran, no inisiu tinan 2023, bele entrega ona ba Prezidente Repúblika sira nia estudu no proposta estratejia ba Timor-Leste’’ Subliña Horta.

Antes ne’e, Prezidente Repúblika, hala’o uluk entrevista ida ho Rádiu ida husi Melborne (Australia )  kona-ba saudoza Jill Jollife ne’ebé mate iha semana kotuk.

Horta koñese Jill Jolliffe hanesan sindikalista Australiana to’o sai nu’udár jornalísta koñesida iha Austrália tanba sempre publika no hakerek kona-ba luta povu Timor-Leste ba ukun-rasik-án, ne’ebé hahu husi akontesimentu Balibó Five to’o funu remata.

             ‘’ Nia mai Timor iha tinan 1975, mai nu’udár elementu delegasaun sindikalista Australianu nian no bainhira iha ha’u nia vizita solidariedade iha Jullu 1974, no liu tan tinan ne’e hakerek ona notísia kona-ba Timor’’ rekorda Xefe Estadu.

Entertanto:Akompaña Xefe Estadu  iha enkontru ne’e, , Membru governu Joaquim Amaral, Assesór Helder Lopes, embaixadora Maria Carrascalão, Prezidente Trad Investiment, Arcanjo Leite.

Jornalista : Vinsensius Saldanha